Sad

¹Swad. Ninaapa kwa Qur-ani yenye ukumbusho.[1]

²Lakini waliokufuru wamo katika majivuno na upinzani.

³Mataifa mangapi tumeyaangamiza kabla yao, na wakapiga kelele, lakini wakati wa kuokoka ulikwishapita.

⁴Na walistaajabu kuwajia mwonyaji anayetokana nao wenyewe, na makafiri wakasema: Huyu ni mchawi, mwongo mno.

⁵Amewafanya miungu wote kuwa ni mungu mmoja tu? Hakika hili ni jambo la ajabu.

⁶Na wakaondoka wakubwa wao wakiwaambia: Nendeni zenu na dumuni na miungu yenu, kwani hili ni jambo lililopangwa.

⁷Sisi hatukusikia haya katika mila hii ya mwisho. Haya si chochote ila ni uzushi tu.

⁸Ati yeye tu ndiye aliyeteremshiwa mawaidha peke yake katika sisi? Lakini hao wana shaka na mawaidha yangu, bali hawajaionja adhabu yangu.

⁹Au wanazo wao hazina za rehema za Mola wako Mlezi, Mwenye nguvu, Mpaji?

¹⁰Au wao wana ufalme wa mbingu na ardhi na vilivyo kati yavyo? Basi na wazipande njia za kwendea huko!

¹¹Hao ni askari watakaoshindwa miongoni mwa makundi yatakayoshindwa.

¹²Walikanusha kabla yao kaumu ya Nuhu, na kina A'adi na Firauni mwenye majengo.

¹³Na Thamud na kaumu Luti na watu wa Machakani. Hayo ndiyo makundi.

¹⁴Hao wote waliwakadhibisha Mitume; basi wakastahiki adhabu yangu.

¹⁵Na hawa hawangojei ila ukelele mmoja tu usio wa kuchelewa.

¹⁶Na walisema: ‘Mola wetu Mlezi! Tuletee upesi sehemu yetu ya adhabu kabla ya Siku ya Hesabu.’

¹⁷Subiri kwa hayo wayasemayo, na umkumbuke mja wetu Daudi, mwenye nguvu. Hakika yeye alikuwa mwingi wa kutubia.

¹⁸Hakika tuliidhalilisha milima pamoja naye ikisabihi jioni na asubuhi pamoja naye.

¹⁹Na pia ndege waliokusanywa makundi kwa makundi; wote walikuwa wanyenyekevu kwake.

²⁰Na tukautia nguvu ufalme wake, na tukampa hekima, na kukata hukumu.

²¹Na je, imekufikia habari ya wagombanao walipopindukia ukuta kuingia chumbani?

²²Walipomuingilia Daudi, naye akawaogopa. Wakasema: Usiogope! Sisi ni wagombanao wawili, mmoja wetu amemdhulumu mwenziwe. Basi tuhukumu kwa haki, wala usipendelee. Na utuongoe kwenye njia iliyo sawa.

²³Hakika huyu ndugu yangu ana kondoo wa kike tisini na tisa; na mimi ninaye kondoo mke mmoja. Akasema: Nipe huyo nikufugie! Na amenishinda kwa maneno.

²⁴Akasema: Kweli amekudhulumu kwa kumtaka kondoo wako mmoja kuongezea kwenye kondoo wake. Na hakika washirika wengi hudhulumiana wao kwa wao, isipokuwa walioamini na wakatenda mema. Na hao ni wachache. Na Daudi akajua kuwa tumemfanyia mtihani. Basi akamwomba msamaha Mola wake Mlezi, na akaanguka kusujudu na kutubia.

²⁵Basi tukamsamehe kwa hayo. Naye kwa hakika anao mkaribisho mkubwa na marejeo mazuri kwetu.

²⁶Ewe Daudi! Hakika Sisi tumekufanya wewe uwe Khalifa katika nchi. Basi wahukumu watu kwa haki, wala usifuate matamanio yakakupoteza ambali na Njia ya Mwenyezi Mungu. Hakika wanaoipotea Njia ya Mwenyezi Mungu wakaiacha, watapata adhabu kali kwa sababu ya kusahau kwao Siku ya Hisabu.

²⁷Na hatukuziumba mbingu na ardhi na vilivyo kati yake bure. Hiyo ni dhana ya waliokufuru. Ole wao waliokufuru kwa Moto utakaowapata.

²⁸Je, tuwafanye walioamini na wakatenda mema kama wafanyao uharibifu katika nchi? Au tuwafanye wacha Mungu kama waovu?

²⁹Na hiki Kitabu, tumekuteremshia wewe, kimebarikiwa, ili wazizingatie Aya zake, na wawaidhike wenye akili.

³⁰Na Daudi tukamtunukia Suleiman. Alikuwa mja mwema. Na hakika alikuwa mwingi wa kutubia.

³¹Alipopelekewa jioni farasi wasimamao kidete, tayari kutoka shoti.

³²Basi akasema: Navipenda vitu vizuri kwa kumkumbuka Mola wangu Mlezi. Kisha wakafichikana nyuma ya boma.

³³(Akasema:) Nirudishieni hao! Basi akaanza kuwapapasa miguu na shingo.

³⁴Na tulimtia mtihanini Suleiman, na tukauweka mwili juu ya kiti chake, kisha akarejea kwa kutubu.

³⁵Akasema: Mola wangu Mlezi! Nisamehe na unipe ufalme usiomwelekea yeyote baada yangu. Hakika Wewe ndiye Mpaji.

³⁶Basi tukaufanya upepo umtumikie, ukenda kwa amri yake, popote alipotaka kufika.

³⁷Na tukayafanya mashetani yamtumikie, wote wajenzi na wapiga mbizi.

³⁸Na wengine wafungwao kwa minyororo.

³⁹Hiki ndicho kipawa chetu. Basi toa au zuia, bila ya hisabu.

⁴⁰Na hakika yeye kwetu Sisi ana cheo cha kukaribishwa kwetu, na pahala pazuri pa kurejea.

⁴¹Na mkumbuke mja wetu Ayubu alipomwita Mola wake Mlezi akasema: Kwa hakika Shetani amenifikishia udhia na adhabu.

⁴²(Akaambiwa:) Piga-piga ardhi kwa mguu wako! Basi haya maji baridi ya kuogea na ya kunywa.

⁴³Na tukampa ahali zake na wengine kama wao pamoja nao, kuwa ni rehema itokayo kwetu, na iwe kumbusho kwa watu wenye akili.

⁴⁴Na shika kicha cha vijiti tu mkononi mwako, kisha ndio upigie nacho, wala usivunje kiapo. Hakika tulimkuta mwenye subira, mbora wa waja, kwa hakika alikuwa mwingi wa kutubu.

⁴⁵Na wakumbuke waja wetu, Ibrahim na Is-haqa na Yaa'qubu waliokuwa na nguvu na busara.

⁴⁶Sisi tumewahusisha wao kwa sifa ya ukumbusho wa Akhera.

⁴⁷Na hakika wao kwetu sisi ni wateuliwa walio bora.

⁴⁸Na mtaje Ismail na Alyasaa na Dhulkifli, na wote hao ni katika walio bora.

⁴⁹Huu ni ukumbusho. Na hakika wacha Mungu wana marudio mazuri.

⁵⁰Bustani za milele zitakazofunguliwa milango yao kwa ajili yao.

⁵¹Humo wataegemea matakia, wawe wanaagiza humo matunda mengi na vinywaji.

⁵²Na pamoja nao wake zao wenye kutuliza macho, hirimu moja.

⁵³Haya ndiyo mliyoahidiwa kwa Siku ya Hisabu.

⁵⁴Hakika hii ndiyo riziki yetu isiyomalizika.

⁵⁵Ndiyo hivi! Na hakika wenye kuasi bila ya shaka watapata marudio maovu kabisa;

⁵⁶Nayo ni Jahannamu! Wataingia humo. Nacho hicho ni kitanda kiovu mno cha kulalia.

⁵⁷Ndiyo hivi! Basi na wayaonje maji ya moto na ya usaha!

⁵⁸Na adhabu nyenginezo za namna hii.

⁵⁹Hili ndilo kundi litakalo ingia pamoja nanyi. Hapana makaribisho mema kwao. Hakika hao wanaingia Motoni.

⁶⁰Waseme: Lakini nyinyi! Hamna mapokezi mazuri! Nyinyi ndio mliotusababishia haya, napo ni pahala paovu kabisa!

⁶¹Waseme: Mola wetu Mlezi aliyetusababishia haya, mzidishie adhabu mara mbili Motoni.

⁶²Watasema: Tuna nini hata hatuwaoni wale watu ambao tukiwahisabu ndio katika waovu?

⁶³Tulikosea tulipowafanyia masihara, au macho yetu tu hayawaoni?

⁶⁴Hakika hayo bila ya shaka ndiyo mahasimiano ya watu wa Motoni.

⁶⁵Sema: Hakika mimi ni mwonyaji tu; na hapana mungu ila Mwenyezi Mungu Mmoja, Mtenda nguvu.

⁶⁶Mola Mlezi wa mbingu na ardhi na vilivyo baina yake, Mwenye nguvu, Mwenye kusamehe.

⁶⁷Sema: Hii ni habari kubwa kabisa.

⁶⁸Ambayo nyinyi mnaipuuza.

⁶⁹Sikuwa na elimu ya mambo ya viumbe wakuu watukufu walipokuwa wakishindana.

⁷⁰Haikufunuliwa kwangu isipokuwa ya kwamba hakika mimi ni mwonyaji dhahiri.

⁷¹Mola wako Mlezi alipowaambia Malaika: Hakika Mimi nitaumba mtu kutokana na udongo.

⁷²Na nitakapomkamilisha na kumpulizia roho inayotokana nami, basi muangukieni kwa kumtii.

⁷³Basi wakasujudu Malaika wote pamoja.

⁷⁴Isipokuwa Iblisi; alijivuna na akawa katika makafiri.

⁷⁵Mwenyezi Mungu akamwambia: Ewe Iblisi! Kipi kilichokuzuia kumtii yule niliyemuumba kwa mikono yangu? Je, umejiona mkubwa, au umekuwa katika wakuu kweli?

⁷⁶Akasema: Mimi ni bora kuliko yeye. Umeniumba kwa moto, na yeye umemuumba kwa udongo.

⁷⁷Akasema: Basi toka humo, kwani hakika wewe umelaaniwa.

⁷⁸Na hakika laana yangu itakuwa juu yako mpaka Siku ya Malipo.

⁷⁹Akasema: Mola wangu Mlezi! Nipe muhula mpaka siku watakayofufuliwa viumbe.

⁸⁰Mwenyezi Mungu akasema: Basi umekwisha kuwa miongoni mwa waliopewa muhula.

⁸¹Mpaka siku ya wakati maalumu.

⁸²Akasema (Iblisi): Naapa kwa utukufu wako, bila ya shaka nitawapoteza wote.

⁸³Isipokuwa wale waja wako miongoni mwao waliohitariwa.

⁸⁴Akasema: Haki! Na haki ninaisema.

⁸⁵Bila ya shaka nitaijaza Jahannamu kwa wewe na kwa hao wote wenye kukufuata miongoni mwao.

⁸⁶Sema (Ewe Mtume): Sikuombeni ujira juu ya haya, wala mimi si katika wadanganyifu.

⁸⁷Hayakuwa haya ila ni mawaidha kwa walimwengu wote.

⁸⁸Na bila ya shaka mtajua habari zake baada ya muda.