Al-Layl

¹Për natën që mbulon (me terr),

²për ditën që agon

³dhe për Atë që ka krijuar mashkullin dhe femrën!

⁴Vërtet, veprat tuaja janë të ndryshme.

⁵Sa për atë që jep (për hir të Allahut), ka frikë (nga Ai)

⁶dhe dëshmon për vërtetësinë e më të bukurës (besimit),

⁷Ne do t’ia lehtësojmë atij rrugën drejt shpëtimit.

⁸Kurse atij që është koprrac, ndihet i vetëmjaftueshëm,

⁹dhe e quan gënjeshtër më të bukurën (besimin),

¹⁰Ne do t’ia lehtësojmë rrugën drejt dënimit,

¹¹e, kur të hidhet (në zjarr), pasuria e tij nuk do t’i bëjë dobi.

¹²Neve na përket që t’ua tregojmë rrugën e drejtë,

¹³dhe, me të vërtetë, e Jona është ajo botë dhe kjo botë!

¹⁴Prandaj Unë ju kam tërhequr vërejtjen me një zjarr që flakëron,

¹⁵ku do të hidhet vetëm më i keqi,

¹⁶që ka mohuar dhe është larguar nga besimi.

¹⁷E do të mbahet larg tij (zjarrit) më i devotshmi (që ruhet nga gjynahet),

¹⁸që e jep pasurinë e tij, duke pastruar veten

¹⁹dhe duke mos pritur shpërblim prej dikujt tjetër për këtë,

²⁰por vetëm për të kërkuar Fytyrën (kënaqësinë) e Zotit të tij, më të Lartit.

²¹Dhe ai, me siguri, do të jetë i kënaqur!