Al-Muddaththir

¹O ti i mbështjellë (o Muhamed)!

²Çohu dhe paralajmëro!

³Zotin tënd madhëroje,

⁴petkat e tua pastroji

⁵dhe largohu nga ndyrësia (adhurimi i idhujve)!

⁶Mos jep gjë me synimin që të marrësh më shumë

⁷dhe për hir të Zotit tënd duro,

⁸se, kur të fryhet në Sur,

⁹ajo do të jetë një ditë e rëndë.

¹⁰Për jobesimtarët nuk do të jetë aspak e lehtë.

¹¹Më lër Vetëm (të merrem) me atë që e krijova

¹²dhe i dhashë pasuri të pamasë

¹³e djem pranë vetes!

¹⁴Unë ia bëra kamjen të lehtë e të shtruar,

¹⁵e, megjithatë, ai lakmon që t’i jap më tepër.

¹⁶Jo, kurrsesi! Vërtet, ai i mohoi me kryeneçësi shpalljet Tona,

¹⁷prandaj Unë do ta ngarkoj atë me dënime të rënda.

¹⁸Ai mendoi dhe kurdisi (kundër Kuranit),

¹⁹dhe qoftë mallkuar, si kurdisi!

²⁰Dhe sërish qoftë mallkuar, si kurdisi!

²¹Pastaj vështroi rreth vetes,

²²mblodhi vetullat e u vrenjt,

²³pastaj u kthye i kapardisur

²⁴dhe tha: “Ky (Kuran) nuk është gjë tjetër, veçse magji e trashëguar!

²⁵Këto janë vetëm fjalë të një vdekatari!”

²⁶Do ta hedh në Sekar (Xhehenem)!

²⁷E si mund ta dish ti tamam se çfarë është Sekari (zjarri përvëlues)?

²⁸Ai nuk lë gjë dhe nuk kursen asgjë,

²⁹lëkurat i shkrumbon.

³⁰Atij i rrinë roje nëntëmbëdhjetë (engjëj).

³¹Ne kemi bërë rojtarë të zjarrit vetëm engjëjt dhe numrin e tyre e kemi bërë sprovë (objekt polemikash) për jobesimtarët, me qëllim që të binden ata që u është dhënë Libri e t’u shtohet besimi atyre që besojnë; që të mos dyshojnë ata që u është dhënë Libri dhe besimtarët e vërtetë dhe që të thonë ata që kanë sëmundjen e dyshimit në zemër dhe jobesimtarët: “Ç’ka dashur të thotë Allahu me këtë shembull?” Kështu, Allahu lë në humbje atë që do dhe çon në rrugë të drejtë atë që do. Askush tjetër, përveç Tij, nuk e di numrin e ushtrisë së Zotit tënd. Ky është vetëm një përkujtesë për njerëzit.

³²Kurrsesi! Betohem për Hënën,

³³për natën që largohet

³⁴e për agimin që zbardhëllon

³⁵se ai (Xhehenemi) është vërtet një nga fatkeqësitë më të mëdha,

³⁶paralajmërim për njerëzit,

³⁷për ata nga ju që dëshirojnë të ecin përpara (me vepra të mira) ose të kthehen mbrapsht (me vepra të këqija).

³⁸Çdo njeri është peng i veprave të veta,

³⁹përveç njerëzve të krahut të djathtë;

⁴⁰të cilët në kopshtet e Xhenetit pyesin njëri-tjetrin

⁴¹për keqbërësit:

⁴²“Çfarë ju ka sjellë në Sekar?”

⁴³Ata do të përgjigjen: “Nuk ishim nga ata që falnin namaz

⁴⁴dhe as prej atyre që i ushqenin të varfrit.

⁴⁵Ne lëshoheshim në biseda të kota me llafazanët

⁴⁶dhe mohonim Ditën e Llogarisë,

⁴⁷derisa na erdhi vdekja.”

⁴⁸Prandaj, kurrfarë ndërmjetësimi i cilitdo ndërmjetësuesi nuk do t’i ndihmojë ata.

⁴⁹Atëherë, përse shmangen ata nga këshillimi,

⁵⁰sikur të ishin gomarë të egër

⁵¹e të frikësuar që ikin prej luanit?!

⁵²Vërtet, çdonjëri prej tyre kërkon që t’i jepen shkrime të hapura (nga Zoti).

⁵³Kurrsesi, pasi ata nuk i frikësohen jetës tjetër!

⁵⁴Në të vërtetë, ky (Kuran) është këshillë,

⁵⁵prandaj, kush të dojë, le t’ia vërë veshin!

⁵⁶Por atij ia vënë veshin vetëm ata që do Allahu. Vetëm Ai është i Denjë për t’u pasur frikë dhe vetëm Ai është i Denjë për të falur.