Al-Muddaththir

¹Yewe uwitwikiriye (uvugwa aha ni Intumwa Muhamadi)!

²Haguruka uburire (ibiremwa),

³Unahe ikuzo Nyagasani wawe.

⁴Unasukure imyambaro yawe.

⁵Unitarure ibigirwamana.

⁶Ntukanatange (ikintu) ugamije indonke zitubutse.

⁷Kandi ujye wihangana kubera Nyagasani wawe.

⁸Ubwo impanda izavuzwa.

⁹Uwo munsi uzaba ari umunsi ukomeye,

¹⁰Uzaba utoroheye abahakanyi.

¹¹(Yewe Muhamadi) ndekera uwo naremye ari wenyine (uvugwa aha ni Al Walid bun al Mughirat),

¹²Nkamuha imitungo itubutse,

¹³N’urubyaro rumukikije,

¹⁴Nkanamworohereza ubuzima.

¹⁵Nyuma y’ibyo byose, akaba yifuza ko namwongera,

¹⁶Oya! Mu by’ukuri yajyaga ahinyura amagambo yacu cyane.

¹⁷Nzamunaniza muhanisha ibihano bikomeye.

¹⁸Mu by’ukuri yaratekereje maze afata umwanzuro (wo gutuka Allah n’Intumwa ye ndetse na Qur’an),

¹⁹Bityo, navumwe kubera umwanzuro yafashe!

²⁰Niyongere avumwe kubera umwanzuro yafashe!

²¹Nuko (yubura amaso) areba (abari bamukikije),

²²Maze azinga umunya, akambya agahanga,

²³Nuko atera umugongo (ukuri), maze aribona.

²⁴Aravuga ati “Ibi (Muhamadi yigisha) nta kindi biri cyo uretse ko ari uburozi (akomora ku barozi bo hambere bakomeye)!”

²⁵“Ibi (Muhamadi yigisha) nta kindi biri cyo uretse ko ari amagambo y’umuntu!”

²⁶Nzamutwikira mu muriro.

²⁷N’iki cyakumenyesha uwo muriro?

²⁸Nta cyo ureka ndetse nta n’icyo usigaza,

²⁹Utwika imibiri ukanayishiririza.

³⁰Urinzwe (n’abamalayika) cumi n’icyenda.

³¹Kandi nta bandi twagize abarinzi b’umuriro batari abamalayika. Ndetse twanashyizeho umubare wabo (cumi n’icyenda) kugira ngo tugerageze abahakanyi, no kugira ngo abahawe ibitabo bemere badashidikanya (ko Qur’an ari ukuri kuko ihuriye kuri uwo mubare wanditse mu bitabo byabo); ndetse no kugira ngo abemeramana barusheho kwemera, no kugira ngo abahawe igitabo n’abemeramana batagira ugushidikanya (ku byo bemeye), ndetse no kugira ngo abafite uburwayi (bw’uburyarya) mu mitima n’abahakanyi bavuge bati “Allah yari agamije iki mu gutanga uru rugero?” Uko ni ko Allah arekera mu buyobe uwo ashaka akanayobora uwo ashaka. Kandi nta wamenya ingabo za Nyagasani wawe utari We. Kandi uyu (muriro) nta kindi uri cyo usibye ko ari urwibutso ku bantu.

³²Oya si ko biri! Ndahiye ukwezi.

³³N’ijoro igihe ricyeye.

³⁴N’igitondo igihe gitangaje.

³⁵Mu by’ukuri uwo (muriro) ni kimwe mu (byago) bihambaye,

³⁶Ukaba n’umuburo ku bantu;

³⁷Ku wo ari we wese muri mwe ushaka kujya imbere (yiyegereza Nyagasani we) cyangwa gusubira inyuma (amwigomekaho).

³⁸Buri wese azafungirwa (mu muriro) bitewe n’ibibi yakoze.

³⁹Uretse abantu b’iburyo (b’abemera nyakuri),

⁴⁰Bazaba bari mu busitani (Ijuru), babazanya

⁴¹Ku byerekeye inkozi z’ibibi, (maze bazibaze bati)

⁴²“Ni iki cyabateye kuba muri mu muriro?”

⁴³(Izo nkozi z’ibibi) zizavuga ziti “Ntitwari bamwe mu basenga,”

⁴⁴Nta n’ubwo twajyaga tugaburira abakene,

⁴⁵Kandi twajyaga tugirana ibiganiro n’abavuga ibidafite umumaro,

⁴⁶Ndetse twajyaga duhinyura umunsi w’ibihembo (imperuka).

⁴⁷Kugeza ubwo ukuri kudashidikanywaho (urupfu) kutugezeho.

⁴⁸Bityo, nta buvugizi bw’abavugizi buzagira icyo bubamarira.

⁴⁹None se ni iyihe mpamvu ituma (abahakanyi) batera umugongo urwibutso?

⁵⁰Bameze nk’indogobe z’agasozi ziruka (zifite ubwoba),

⁵¹Zihunga intare!

⁵²Ahubwo buri wese muri bo aba ashaka ko yahishurirwa ibitabo birambuye (bishimangira ko Isilamu ari idini ry’ukuri).

⁵³Oya si ko biri! Ahubwo ntibatinya umunsi w’imperuka.

⁵⁴Oya si ko biri! Mu by’ukuri iyi (Qur’an) ni urwibutso.

⁵⁵Bityo, ushaka (ko imubera urwibutso) nayibuke (ayisoma, anatekereza ku nyigisho ziyikubiyemo).

⁵⁶Kandi ntibashobora kwibuka keretse Allah abishatse. Ni We ukwiriye gutinywa, ndetse ni na We utanga imbabazi.