At-Takwir

¹Igihe izuba ryazingwazinzwe ntiribe rigisubira kwaka;

²Igihe n’inyenyeri zahungurutse ntizibe zigisubira kuboneka;

³Igihe n’imisozi yasunitswe igahoka;

⁴Igihe n’ingamiya zifise amezi zirengagijwe;

⁵Igihe n’inyamaswa zegeranirijwe hamwe, kugira Imana Allah Ihorere izarenganijwe n’izindi;

⁶Igihe n’ibiyaga vyakijwe umuriro bikarurumba;

⁷Igihe n’imishaha yahujwe n’iyindi mishaha hari ico ihuriyeko;

⁸Igihe n’umwigeme yahambwe abona yabajijwe ku musi w’izuka;

⁹Ku co yahowe, kigatuma yicwa mu guhambwa abona!

¹⁰Igihe n’ibitabu vy’ibikorwa vy’ibiremwa vyashizwe ahabona bikugururwa;

¹¹Igihe n’ijuru ryuguruwe rigakurwaho;

¹²Igihe n’umuriro wa Jahannamu wegenyejwe;

¹³Igihe n’Ubwami bw’ijuru bwegerejwe abemeramana;

¹⁴Ivyo vyose nivyashika, umuntu wese rero azomenya ico yakoze; caba iciza canke ikibi.

¹⁵Jewe Allah, Ndarahiye ku nyenyeri zitaka ku murango!

¹⁶Zigendera ahatabona mu nzira-ntasobwa zazo!

¹⁷Ndarahiye kandi no kw’ijoro iyo bwije!

¹⁸No ku gitondo iyo hakeye bugatamanzura!

¹⁹Ko mu vy’ukuri iyo Qor’ani, ari ijambo ry’Uhoraho Allah rishikirizwa n’Intumwa yubashwe (Umumalayika Jibrili);

²⁰Nyeninguvu n’ubushobozi bwo kwubahiriza amabwirizwa, afise icubahiro kinini imbere ya Nyenubuhangamo Allah;

²¹Agamburukirwa n’abandi bamalayika, umwizigirwa mu guhishurira Intumwa.

²²Umugenzi wanyu Muhamadi (nyakugira amahoro n’impuhwe z’Imana Allah), si umusazi namba;

²³Mu vy’ukuri Intumwa Muhamadi (nyakugira amahoro n’impuhwe z’Imana Allah), yarabonye umumalayika Jibrili ukuri kwamye mu buseruko bw’i Makka[1];

²⁴Kandi Intumwa Muhamadi (nyakugira amahoro n’impuhwe z’Imana Allah), ntiyigungirako ijambo ry’Imana Allah;

²⁵Kanatsinda, iyo Qor’ani si ijambo rya shetani yavumwe. Ahubwo ni ijambo ry’Imana Allah.

²⁶Mbega, mwebwe mugana hehe, mu guhakana Qor’ani inyuma y’ivyo vyemezo vyose?

²⁷Iyo Qor’ani ntagatifu si ikindi, kiretse ko ari urwibutso ku bantu bose;

²⁸Kuri uwo wese muri mwebwe ashaka gutumbera inzira igororotse.

²⁹Kandi ntimuzoshaka kugororoka ngo mubishobore, kiretse igihe Imana Allah Ibishatse, Umubungabunzi w’ibiremwa vyose.