'Abasa

¹Intumwa (nyakugira amahoro n’impuhwe z’Imana Allah) yaranyinyiriwe mu maso, irirengagiza;

²Bivuye ku kuza kw’impumyi Abdullaahi mwene Ummu Maktuum yaje iyigana ngo iyibaze[1].

³Ntumwa y’Imana! Ni igiki cogutuma umenya ukuri kw’ikimuzanye, kumbure hari n’aho yokwiyeza!

⁴Canke ikibuka, ukwo kwibuka kukayungura.

⁵Nayo uwibona ko yikenuye, ntashake kwumvira Imana Allah;

⁶Ni we witwararitse kwumviriza!

⁷Kandi nta mwikomo kuri wewe mu gihe atokwiyeza.

⁸Nayo uwuje akugana n’umwitwarariko nta ngere, akaza anyaragasa;

⁹Kandi anatinya ibihano vy'Imana Allah, ashaka ubugororotsi;

¹⁰Ni we utitayeho ngo umwumvirize.

¹¹Si ukwo namba Ntumwa y’Imana! Mu vy’ukuri iki gisomwa ca Qor’ani, ni urwibutso kuri wewe no ku bandi bose.

¹²Uwushaka rero aribuka Imana Allah akurikire Qor’ani ntagatifu;

¹³Iri ku mpapuro zubahitse;

¹⁴Zubashwe, zisukuye, zitagira akanenge;

¹⁵Zanditswe n’iminwe y’abanditsi bahishurira Intumwa amajambo y’Imana Allah;

¹⁶Abamalayika batagatifu, beranda.

¹⁷Umuntu w’umugarariji yaravumwe; mbega yafashwe n’iki gituma yimonogoza mu kugarariza!

¹⁸Mbega, ntabona ico Imana Allah Yamuremyemwo!

¹⁹Yamuremye mw’ima ry’intanga, Iraheza Iramutegekaniriza ubuzima bwiwe;

²⁰Hanyuma Imutomorera inzira y’iciza n’iy’ikibi;

²¹Iraheza Iramwica, Iramushingura mu cubahiro;

²²Hanyuma igihe Yabishatse, Izomuzura, Imusubize ubuzima, kugira Imuharurire Inamuhembere ivyo yakoze.

²³Nateshwe ate, arahumba! Ntarakora ivyo Imana yiwe Rurema Yamutegetse mu mabwirizwa.

²⁴Maze umuntu nabanze yitegereze ukuntu Twaremye imfungurwa zimubeshejeho.

²⁵Si ivy’imbeshere, Twebwe Allah Twarasukiriye amazi y’imvura kw’isi;

²⁶Hanyuma Twatura isi imigaga ibiterwa bitanguye kugonda;

²⁷Maze Tuyinagishako intete;

²⁸Imizabibu n’ivyatsi vy’ibitungwa;

²⁹Imizayituni n’itende;

³⁰Amashamba atotahaye azitanye;

³¹Ibiti vy’ivyamwa bitandukanye hamwe n’uburagiriro;

³²Twaremye ivyo vyose, kugira muryoherwe, mwebwe n’ibitungwa vyanyu, muvyikoreko.

³³Igihe rero humvikanye ijwi nziba-matwi ry’inzamba yo kuzuka;

³⁴Umusi umuntu azohunga mwenewabo kubera intureka;

³⁵Akanahunga nyina wiwe, na se wiwe;

³⁶Umugore wiwe, n’ibibondo vyiwe;

³⁷Umuntu wese, kuri uwo musi azoba arajwe ishinga n’ibimuhanze ku gatwe kiwe.

³⁸Uwo musi, abemeramana bazosayangana mu maso;

³⁹Batwengatwenga, akanyamuneza nta ngere kabasya.

⁴⁰Uwo musi, hari n’abandi bazoba buzuye inkungugu mu maso, bajumarariwe;

⁴¹Bijiriwe, babuze ayo bacira n’ayo bamira, bagayitse.

⁴²Abo rero, ni bo bagarariji, abagizi ba nabi.