An-Nazi'at

¹Jewe Allah, Ndarahiye ku bamalayika bashikurana inguvu inkomoko y'ubuzima "Roho" mu mitima y’abagarariji!

²No ku bamalayika bakuramwo bukebuke mu bwitonzi inkomoko y'ubuzima "Roho" mu mitima y’abemeramana!

³No ku bamalayika baguruka mu kirere banyaruka, bagana mw’ijuru canke bavayo!

⁴No ku bamalayika banyaragasa mu gushira mu ngiro amabwirizwa y’Imana Allah!

⁵No ku bamalayika batunganya mu bukerebutsi nta ngere, ivyo bategetswe gushira mu ngiro kw’isi!

⁶Nta nkeka rero ko muzozurwa mugaharurirwa, umusi isi n’imisozi bizonyiganyiga cane havugijwe inzamba ya mbere yo guhonya ibiremwa;

⁷Hace hakurikira ivuzwa rya kabiri ry’inzamba y’izuka.

⁸Kuri uwo musi rero, imitima y’abagarariji izohinda agashitsi, yugarijwe n’ubwoba n’akantu.

⁹Bazoba bijiriwe mu maso, bajumarariwe;

¹⁰Abahakana bivuye inyuma izuka ry'ibiremwa, bavuga batebura n'akantu bati: “Mbega, ni ivy’ukuri, tuzosubizwa ubuzima inyuma yo gupfa nk’uko twahora kw’isi!

¹¹Ubu nitwaba amagufa yabunzwe, tuzozuka koko!”.

¹²Bazoheza bavuge bihebura bati: “Emwe! Iryo garuka ryacu rero, ni ryaba ari iry'ukuri, rizoba ari iry’agahombo”.

¹³Mu vy’ukuri, rizoba ivuzwa rimwe gusa ry’inzamba ya kabiri;

¹⁴Maze bace bisanga ari bazima ku mugongo w’isi.

¹⁵Ntumwa y’Imana! Mbega, warashikiriwe n’inkuru ya Musa (nyakugira amahoro y’Imana Allah)!

¹⁶Igihe Imana yiwe Rurema Allah Yamuhamagara ari mu kabande gatagatifu “Twuwa”, hambavu y’umusozi Sinayi.

¹⁷Maze Imubwira Iti: “Genda kwa Firawuni, mu vy’ukuri yarimonogoje mu buhakanyi;

¹⁸Uheze umubwire uti: “Ubwo ntiwokwiyeza, ukemera Imana Imwe Rudende Allah!

¹⁹Maze nkakurongora mu nzira y’Imana yawe Rurema Allah, ugaheza ukayigamburukira””.

²⁰Ni ho rero Musa yereka Firawuni igitangaro gihambaye co guhindura inkoni inzoka.

²¹Firawuni ashoka ahakana yivuye inyuma Musa (nyakugira amahoro y’Imana Allah), aranagabitanya ku Mana Allah.

²²Hanyuma agenza umugongo yirengagiza ukwemera, abandanya ubwononyi bwo guhakana Musa (nyakugira amahoro y’Imana Allah).

²³Ni ho Firawuni yakoranya abantu, arasemerera;

²⁴Avuga ati: “Ni jewe imana yanyu iri hejuru ya vyose”.

²⁵Maze Imana Allah Ica Iramwihora, Imuha ibihano vy’akarorero mu buzima bwo kw'isi, Ikazomuha n'ibihano vyo mu buzima bw’inyuma yo gupfa.

²⁶Mu vy’ukuri inyifato ya Firawuni n’ivyamushikiye, harimwo inkebuzo ku bantu batinya ibihano vy'Imana Allah.

²⁷Mbega bantu! Izurwa ryanyu, ni ryo ryoba rigoye cane kurusha; canke ukurema ijuru, Imana Allah Yubatse hejuru yanyu, ni co kigoye!

²⁸Yahanitse ikirere caryo, Iraheza Irariringaniza.

²⁹Igira ijoro ryaryo umwijima iyo izuba rirenze, Ikabonesha umurango waryo iyo riserutse.

³⁰Inyuma y’ivyo, Yagura isi Irayisasa, Iyishiramwo ibintu vyose nkenerwa.

³¹Iraserura amariba y’amazi yayo, Imeza n’uburagiro bw’ibitungwa.

³²Imisozi na yo Irayishinga;

³³Ivyo vyose Yabibaremeye, kugira muryoherwe mwebwe n’ibitungwa vyanyu[1], muvyikoreko.

³⁴Igihe haje rero ikiza nya kiza c’umusi w’izuka;

³⁵Umusi umuntu azokwerekwa ivyo yakoze, aheze avyibuke, anavyemange;

³⁶Umuriro ururumba ugashirwa ahabona;

³⁷Uwo wese rero, yimonogoje mu buhakanyi;

³⁸Agahitamwo ubuzima bwo kw’isi, akirengagiza ubuzima bw’inyuma yo gupfa;

³⁹Mu vy’ukuri, umuriro ururumba wa Jahannamu, ni bwo bushikiro bwiwe.

⁴⁰Nayo uwitwararitse kurengutswa imbere y’Imana yiwe Rurema Allah, akanareka gukora ivyo umutima wiwe wipfuza;

⁴¹Mu vy’ukuri, Ubwami bw’ijuru ni ryo cumbi ryiwe.

⁴²Ntumwa y’Imana! Ababangikanyamana barakubaza igihe umuhero w’isi uzoberako!

⁴³Wewe, nta bumenyi bw’igihe uzoberako ufise.

⁴⁴Ubumenyi bwawo buri ku Mana yawe Rurema Allah.

⁴⁵Wewe gusa, uri umugabisha w’uwutinya akitegurira uwo musi w’umuhero.

⁴⁶Umusi bazowubona, bazomera nk’aho batigeze baba kw’isi, kiretse igihe kingana n’umuhingamo[2] canke umusase gusa[3].