An-Naba

¹Ababangikanyamana, babazanya ku nkuru nyabaki?

²Babazanya ku nkuru ihambaye y’umusi w’izuka ry’ibiremwa, ivugwa muri Qor’ani ntagatifu;

³Ari yo badahurizako bigatuma bayihakana bivuye inyuma.

⁴Nibateshwe bate, barahumba! Bitebe bitebuke, bazomenya ukuri kw’iyo nkuru igihe babonye inkurikizi z’igarariza ryabo ku musi w’izuka.

⁵Eka, nibateshwe bate, barahumba! Kandi nibageze aho uguhakana! Bitebe bitebuke, bazomenya ukuri kwa Qor’ani n’ukw’izuka rivugwa muri yo.

⁶Mbega Twebwe Allah, ntitwagize isi nk’isaso!

⁷Tugira n’imisozi nk’imambo ziyigumya!

⁸Tubaremamwo imigwi ibiri; igitsina-gabo n’igitsina-gore!

⁹Tugira n’itiro ryanyu kuba uburuhuro bw’umubiri n’umutima!

¹⁰Tugira n’ijoro kuba nk’impuzu ipfuka umubiri, iyo umwijima waryo ubanyegeje!

¹¹Tugira n’umurango kuba umwanya wo kurondera ikibabeshaho!

¹²Twubaka n’amajuru indwi akomakomeye mu kirere hejuru yanyu!

¹³Tugira n’izuba riba nk’itara ribasusurutsa!

¹⁴Tumanura n’amazi menshi y’imvura ava mu bicu;

¹⁵Kugira Tuyanagishe imbuto zifungurwa n’abantu, n’ivyatsi birishwa n’ibikoko;

¹⁶N’amashamba atotahaye, arimwo ibiti vy’amashami azitanye.

¹⁷Mu vy’ukuri, umusi w’izuka wo gutunganiriza ibiremwa urafise isango ntarengwa;

¹⁸Ni umusi hazovuzwa inzamba igira kabiri, mugaca muzuka mu migwimigwi[1];

¹⁹Amajuru na yo akugururwa, akagira imiryango myinshi;

²⁰Imisozi na yo igakurwaho, ikaba icirungu[2].

²¹Mu vy’ukuri umuriro wa Jahannamu kuri uwo musi, ni uburerekero bw’abahakanyi;

²²Ku barenga ku mabwirizwa y’Imana Allah, ni bwo buruhukiro bwabo;

²³Bazowubamwo ibihe n’ibihe bidahera.

²⁴Nta mbeho bazokwumvamwo ngo basame akayaga, eka nta n’ikinyobwa bazohabwa ngo bice inyota;

²⁵Atari amazi yasebuye akaryimara, urwuya hamwe n’amashira bitemba biva mu mibiri y’abantu bo mu muriro udahera.

²⁶Iyo, ni yo mpembo ikwiranye n’ivyo bakoze.

²⁷Mu vy’ukuri, ntibigeze batinya umusi w’iharurirwa ngo bawitegurire;

²⁸Baraheza barahakana bivuye inyuma Aayah zacu Twebwe Allah, Twarungikanye Intumwa.

²⁹Ibintu vyose rero, Twarabibungabunze mu kuvyandika mu Gitabu nyezina canditswemwo ivyagezwe n’ishirwa mu ngiro ryavyo “Lawhu Mahfuudhw”.

³⁰Kubera ivyo rero bagarariji, nimwumvirize indishi y’ivyo mwakoze. Nta n’ico Tuzobongererako atari ibihano ku bindi.

³¹Mu vy’ukuri, abatinya ibihano vy'Imana Allah mu kwubahiriza amabwirizwa yayo, bazoronka intsinzi y’Ubwami bw’ijuru;

³²Bazoronkamwo imirima itotahaye hamwe n’imizabibu;

³³N’inkumi zigishinze amabere, ziri mu runganwe rumwe;

³⁴N’ibirahuri vyuzuye inzoga zitaboreza.

³⁵Muri ubwo Bwami bw’ijuru, ntibazokwigera bumvamwo amajambo y’imburakimazi, eka ntibazonabeshuzanya.

³⁶Ivyo vyose rero, ni impembo ivuye ku Mana yawe Rurema Allah, impembo ikwiye ibereye;

³⁷Ni impembo ivuye ku Mana Allah, Mubungabunzi w’amajuru n’isi hamwe n’ibiri hagati yavyo, Nyenimpuhwe ku biremwa. Ntibazoshobora kugira ico bayibajije, kiretse ku vyo Itanzeko uburenganzira;

³⁸Ku musi Mutimamweranda Jibrili (nyakugira amahoro y’Imana Allah) hamwe n’abandi bamalayika bazotonda ku murongo, nta n’umwe bazovugira, kiretse uwuzohabwa na Nyenimpuhwe Allah uburenganzira bwo kuvugirwa, agaheza akavuga ibitomoye.

³⁹Uwo ni wo musi w’ukuri, ata makenga ko uzoshika. Uwushaka gukira intureka zawo rero, nakurikire inzira y’ibikorwa vyiza, imushikana ku Mana yiwe Rurema Allah.

⁴⁰Mu vy’ukuri Twebwe Allah, Twarabagabishije ku bihano biri hafi gushika. Umusi umuntu azobona ivyakozwe n’amaboko yiwe, vyaba ivyiza canke ibibi, maze umugarariji agashoka avuga ati: “Yoo! Amagorwa arama yemwe! Iyo nari gupfuma nibera ivu, simpeze ngo nzuke”.