المزمل
The Enshrouded One • 20 ayahs • Meccan
بِسْمِ ٱللَّهِ ٱلرَّحْمَٰنِ ٱلرَّحِيمِ
1Fa ianao, ilay misaron-damba !
2Mitsangàna ianao mandritry ny alina afa-tsy amin'ny ampahany kely ihany .
3Ny antsasany na alatsaho kely noho izany .
4Na ampitomboy kely ary vakio miadana sady mazava ny koroany.
5Fa hanambara teny manan-danja aminao izahay.
6Mety kokoa ny vavaka amin'ny alina sady mifanaraka amin'ny vakiteny.
7Fa manana andraikitra maharitra ianao, mandritra ny andro.
8Koa tsarovy ny anaran'ny Tomponao, ary manokàna tena tanteraka Aminy.
9Ilay Tompon'ny fiposahana sy ny filentehana. Tsy misy Tompo hafa, afa-tsy Izy. Koa ataovy mpihay anao ary Izy.
10Ary hiareto izay tenenin'izy ireo ary miataha aminy amim-pahamendrehana.
11Ary avelao aho hiaraka amin'ireo mpiampanga lainga, izay mihaina ao anatin'ny fiadanana ; ary omeo fe-potoana fohy izy ireo.
12Ny tena marina dia manana rojo vy mavesatra sy afobe ho azy ireo Izahay.
13Ary sakafo mahasempotra sy famaizana mamirifiry.
14Amin'ny andro hampihorohoro ny tany sy ny tendrombohitra, ka hiparitahan'ny tendrombohitra ho toy ny vondro-pasika.
15Nandefa Iraka taminareo tokoa Izahay mba ho vavolombelona hanohitra anareo, tahaky ny nandefasanay Iraka tamin'i Faraona.
16Nefa tsy nankato ny Iraka i Faraona ka nosazinay mafy.
17Ahoana no hiarovanareo tena raha tsy mino ianareo amin'ilay andro hahatonga ny zaza ho tahaky ny lahy antitra fotsy volo.
18Hampitresaka ny lanitra.Tsy hisalasalana fa ho tanteraka ny fampanantenany.
19Tena fampatsiahivana marina ity. Koa aoka handeha amin'ny lalana mankany amin'ny Tompony izay tia izany.
20Fantatry ny Tomponao tokoa, fa mitsangana mandritra ny roa ampahatelon'ny alina ianao, na ny antsasany, na ny ampahatelony. Toy izany koa ny ampahany amin'ireo izay miaraka aminao. Allah no mametra ny andro sy ny alina, fantany fa tsy afaka handany ny alina manontolo amin'ny fivavahana ianareo. Namela anareo Izy. Vakio ary izay vitanareo amin'ny koroany. Fantany, fa misy harary aminareo, misy handeha hivahiny hitady ny fahasoavan'I Allah, ary ny sasany koa handeha hiady amin'ny lalan'I Allah. Vakio ary izay azonareo vakiana. Tanterao ny vavaka fanompoana, omeo ny harena fiantrana, ary mampindrama amin-kitsim-po amin'I Allah ianareo. Fa izay tsara rehetra nomaninareo ho an'ny tenanareo, dia ho hitanareo any amin'I Allah, izany no tsara sy lehibe indrindra ho valisoanareo. Ary mangataha famelan-keloka amin'I Allah ianareo, fa mpamela heloka sy be indrafo tokoa I Allah.