المعارج
The Ascending Stairways • 44 ayahs • Meccan
بِسْمِ ٱللَّهِ ٱلرَّحْمَٰنِ ٱلرَّحِيمِ
1(Мушриктерден) бир суроочу[1] собол кылды түшүүчү азап жөнүндө -
2– каапырлардын башына. (Азап сөзсүз келет. Ошондо) аны кайтаруучу (күч) болбой калат!
3(Ал азап) Маьариж – тепкичтердин[1] ээси Аллах тарабынан (келет).
4Периштелер менен Рух Ага (Аллах таалага) өлчөмү элүү миң жылга тең болгон күндө көтөрүлүп барышат.[1]
5(Оо, Мухаммад!) Сен (мушриктердин «жалган» деген сөзүнө жана зыяндуу иштерине) эң сонун сабыр кыл!
6Алар аны (кайра тирилүүнү акылдардан) алыс деп ойлошот.
7Биз болсо, жакын (анык) деп билебиз.
8Ал күндө асман эритилген жез сыяктуу,
9Ал эми, тоолор тытылган жүн сыяктуу болуп калат.
10(Ал күнү) дос өзүнүн жакын досун(ун абалын) сурай албайт!
11Аларды (бири-бирине) көрсөтүлөт. Күнөөкөр (тозоку) адам ошол күндүн азабына(н кутулуш үчүн) перзенттерин,
12аялын жана ага-инилерин,
13өзүнө арка-жөлөк болгон тууган уруктарын...,
14жана деги эле, жер бетиндеги бардык адамдарды садага чаап, анан (ушул төлөмү) өзүн (тозоктон) куткарып кетүүсүн каалайт.
15Жок! Ал (тозок) – алоолонгон от,
16терилерди шылып алуучу!
17Ал от (кучагына) чакырат (акыйкаттан) жүз буруп, артка кеткендерди
18жана (адал-арамына карабай дүйнө-мүлк) жыйнап, (андан садака кылбай) басып-чогултуп жаткан адамдарды!
19Чынында инсан чыдамсыз жаратылган.
20Эгер аны жаман (тагдыр) кармаса, чыдамсыздык кылат.
21Жакшы (тагдыр) кармаса кызганчаак болуп калат.
22Намаз окуучулар гана андай эмес.
23Алар намаздарын дайым окушат.
24Алардын дүйнө-мүлкүндө белгилүү акы (үлүш) бар,
25муктаждар жана сурагандар үчүн.
26Алар Эсеп (Акырет) күнүн тастыкташат…
27Алар Раббисинин азабынан коркушат…
28Чынында, Раббисинин азабы(нан) аманда болуу (эч ким үчүн кепилденген) эмес.
29Жана алар жыныс мүчөлөрүн (арамдан) сакташат.
30Өздөрүнүн (ак никедеги) аялдарына жана күңдөрүнө гана («барышат»). Ошондо алар (күнөөлүү деп) айыпталбайт.
31Ким ушундан кийин (башкаларды никесиз) «кааласа», алар чектен чыккандар!
32Жана алар өз аманаттарын, убада-келишимдерин бекем сакташат...
33Күбөлүк бергенде (жалган аралаштырбай) түз болушат…
34Алар намаздарын(ын убактысын) сакташат…
35Алар – бейиштерде сыйлануучулар!
36(Оо, Мухаммад), каапырларга эмне болду, сен тарапка шашылышат?
37Оң каптал жана сол капталдан топурап?[1]
38Алардын ар бири Нээмат бейишине кирүүнү каалайбы?
39Жок, (эч андай болбойт!) Биз аларды өздөрүнө белгилүү нерседен (бир тамчы атырылган бел суудан) жараттык.
40Чыгыштар менен батыштардын Раббисине ант, Биз кудуреттүүбүз:
41аларды жакшыраак (ыймандуу элдерге) алмаштырып коюуга! Жана Биз (буга) алсыз эмеспиз![1]
42(Оо, Мухаммад) эми, жөн кой аларды. Убада кылынган (өлүп, азапка дуушар боло турган) күндөрүнө жолукканга чейин (күнөө деңизине) чумкуп, ойноп-күлүп жүрө беришсин!
43(Ал эми) ошол күндө алар мүрзөлөрүнөн чыгып, бир байракты ээрчиген сыяктуу (чогуу жана) тез келишет.
44Көздөрү (жер тиктеп) бөжүрөйүп, (ар тараптан) кордук ороп турат. Мына ушул – аларга убада кылынган Күн!