Al-Layl

¹Inã rantsuwa da dare a lõkacin da yake rufẽwa.

²Da yini a lõkacin da yake kuranyẽwa.

³Da abin da ya halitta namiji da mace.

⁴Lãlle ne ayyukanku, dabam-dabam suke.

⁵To, amma wanda ya yi kyauta, kuma ya yi taƙawa.

⁶Kuma ya gaskata kalma[1] mai kyãwo.

⁷To, zã Mu sauƙaƙe masa har ya kai ga sauƙi.

⁸Kuma amma wanda ya yi rõwa, kuma ya wadãtu da kansa.

⁹Kuma ya ƙaryatar da kalma mai kyãwo.

¹⁰To, zã Mu sauƙaƙke masa har ya kai ga tsanani.

¹¹Kuma dũkiyarsa ba ta wadãtar masa da kõme ba, a lõkacin da ya gangara (a wuta).

¹²Lãlle aikin Mu ne, Mu bayyana shiriya.

¹³Kuma lalle ne Lãhira da duniya Namu ne.

¹⁴Sabõda haka, Na yi maku gargaɗi da wuta mai babbaka.

¹⁵Bãbu mai shigarta sai mafi Tabewa

¹⁶Wanda ya ƙaryata, kuma ya jũya bãya.

¹⁷Kuma mafi taƙawa[1] zai nisance ta.

¹⁸Wanda yake bãyar da dũkiyarsa, alhãli yana tsarkaka.

¹⁹Alhãli bãbu wani mai wata ni'ima wurinsa wadda ake nẽman sakamakonta.

²⁰Fãce dai nẽman yardar Ubangijinsa Mafi ɗaukaka.

²¹To, lalle ne zai yarda (da sakamakon da zã a bã shi).