Al-Muddaththir

¹Yã wanda ya lulluɓa da mayãfi.

²Ka tãshi dõmin ka yi gargaɗi

³Kuma Ubangijinka, sai ka girmama Shi,

⁴Kuma tutãfinka, sai ka tsarkake su,

⁵Kuma gumãka, sai ka ƙaurace musu.

⁶Kada ka yi kyauta kana nẽman ƙãri

⁷Kuma sabõda Ubangijinka? Sai ka yi haƙure

⁸To, idan aka yi bũsa a cikin ƙaho.

⁹To, wannan, a rãnar nan, yini ne mai wuya

¹⁰A kan kãfirai, bã mai sauƙi ba ne.

¹¹Ka bar Ni da wanda Na halitta, yana shi kaɗai,

¹²Kuma Na sanya masa dũkiya shimfiɗaɗɗiya

¹³Da ɗiyã halartattu,

¹⁴Kuma Na shimfiɗa? masa kõme shimfiɗãwa.

¹⁵Sa'an nan, yanã kwaɗayin in yi masa ƙãri!

¹⁶Faufau! Lalle ne, shĩ yã kasance, ga ãyõyin Mu, mai tsaurin kai.

¹⁷Zã Ni kallafa masa wahala mai hauhawa.

¹⁸Lalle ne, Shi, yã yi tunãni, kuma yã ƙaddara (abin da zai faɗã game da Alƙur'ãni)

¹⁹Sabõda haka, aka la'ane shi, kamar yadda ya ƙaddara.

²⁰Sa'an nan, aka la'ane shi kamar yadda ya ƙaddara.

²¹Sa'an nan, ya yi tunãni

²²Sa'an nan, ya gintse huska? kuma ya yi murtuk.

²³Sa'an nan, ya jũya bãya, kuma ya bunƙãsa,

²⁴Sai ya ce: "Wannan abu dai bã kõme ba ne fãce wani sihiri, wanda aka ruwaito."

²⁵"Wannan maganar mutum dai ce."

²⁶Zã Ni ƙõna shi da Saƙar.

²⁷Kuma mẽ ya sanar da kai abin da akẽ cẽwa Saƙar!

²⁸Bã ta ragẽwa, kuma bã ta bari.

²⁹Mai nãcẽwa ga jiki ce (da (ƙũna).

³⁰A kanta akwai (matsara) gõma shã tara.

³¹Kuma ba Mu sanya ma'abũta wutã (wãto matsaranta) ba, fãce malã'iku, kuma ba Mu sanya adadinsu (gõma sha tara) ba, fãce dõmin fitina ga waɗanda suka kãfirta domin waɗanda aka bai wa littãfi su sãmi yaƙĩni kuma waɗanda suka yi ĩmãni su ƙãra ĩmãni, kuma waɗanda aka bai wa littãfi da mũminai bã zã su yi shakka ba, kuma domin wa ɗanda a cikin zukatansu akwai wata cuta da kãfirai su ce: "Mẽ Allah Yake nufi da wannan, ya kasance misãli?" Haka dai Allah ke ɓatar da wanda Ya so, kuma Ya shiryar da wanda ya so. Kuma bãbu wanda ya san mayãƙan Ubangijinka fãce Shi, kuma ita (wutar) ba ta kasance ba fãce wata tunãtarwa ce ga mutum.

³²A'aha! Ina rantsuwa da watã.

³³Da dare a lõkacin da ya jũyar da baya.

³⁴Da sãfiya idan ta wãye.

³⁵Ita (wutar) ɗayan manyan masĩfũ? ce.

³⁶Mai gargaɗĩ ce ga mutum.

³⁷Ga wanda ya so, daga cikinku, ya gabãta ko ya jinkirta.

³⁸Kõwane rai ga abin da ya aikata jingina ce.

³⁹Fãce mutãnen dãma.

⁴⁰A cikin Aljanna suna tambayar jũna.

⁴¹Game da mãsu laifi.

⁴²(Su ce musu) "Me ya shigar da ku a cikin Saƙar?"

⁴³Suka ce: "Ba mu kasance munã a cikin mãsu salla ba."

⁴⁴"Kuma ba mu kasance muna ciyar da matalautã ba."

⁴⁵"Kuma mun kasance muna kũtsãwa tãre da mãsu kũtsãwa."

⁴⁶"Mun kasance munã ƙaryata rãnar sãkamako."

⁴⁷"Har gaskiya (wãto mutuwa) ta zo mana."

⁴⁸Sabõda haka cẽton mãsu cẽto bã zai amfãne su ba.

⁴⁹Haba! Me ya same su, suka zama mãsu bijirewa daga wa'azin gaskiya.

⁵⁰Kamar dai sũ, jãkuna firgitattu ne.

⁵¹Sun gudu daga zãki.

⁵²A'aha! Kõwãne mutum daga cikinsu yanã son a zo masa da takardu (da sũnansa) ana wãtsãwa

⁵³A'aha! Kai dai, bã su jin tsõron Lãhira.

⁵⁴A'aha! Lalle ne, shi (Alƙur'ãni) tunãtarwa ce.

⁵⁵Dõmin wanda ya so, ya tuna.

⁵⁶Kuma bã zã su tuna ba fãce idan Allah Ya so, Shi ne Ya cancanta a bi Shi da taƙawa kuma Ya cancanta ga Ya yi gãfara.