Al-Qalam

¹Nuun.[1] Mi wooɗndirii kuɗol e ko ɓe mbinndirta ko!

²Aan a wonaa, sabu neema Joommaa o, kaangaaɗo.

³Ko pellet, hino woodani-ma njoɓdi ndi taƴondirtaa.

⁴E ko pellet, haɗa e jikku mawɗo.

⁵Aray nde nji'aa, ɓe nji'a kamɓe kadi

⁶ko hombo e mon woni kaangaaɗo oon.

⁷Pellet, ko Joommaa ɓuri anndude majjuɗo on laawol makko ngol, ko Kaŋko kadi ɓuri anndude feewɓe ɓe.

⁸Wota a tefto yeddooɓe ɓen.

⁹Heɓe njiɗi si a newantono (ɓe), ɓe newano-(maa).

¹⁰Wota a tefto kadi kala ɗuuɗuɗo woondugol, koyɗo.

¹¹ɗuuɗuɗo ño'ougol, ɗuuɗuɗo yaarugol baɗdi.

¹²ɗuuɗuɗo kaɗgol moƴƴere, jaggitoowo, bakkodi'ɗo.

¹³yo'ora-ɓerndeejo e hoore ɗum, keɓiraaɗo nii(.ɓiy jina).

¹⁴fii o wonii joom jawdi e ɓiɗɓe.

¹⁵Si aayeeje amen ɗeen janngaama e [tawnde] makko, o wi'a: "Ko tinndi adinooɓe".

¹⁶Aray nde min maandina mo e hoore kinal.

¹⁷Min njarribor ɓe wano Min njarribornoo jeyɓe ngesa mba : fewndo ɓeen ngooɗndunoo pellet, ɓe coñat ba subaka ko ɓe dawɓe.

¹⁸ɓe itti tinaani [wi'ide] :"Si Allah jaɓii".

¹⁹Jayngol immori ka Joomi maa ari huuɓiti ba tawi heɓe ɗaanii.

²⁰Ba wa'iti wa jemma ɓaleejo.

²¹Ɓe noddindiri bimmbi oon :

²²"Kori ndawee ta ngesa mon, si tawii ko on soñooɓe".

²³Ɓe pokkiti heɓe ɗuumbo.

²⁴Won'de "miskiino woo naatataa e mabba hannde".

²⁵Ɓe ndawidi e ɗawugol [wa'asuɓe ɓeen] ko ɓe eɓɓuɓe.

²⁶Nde ɓe nji'unoo ba, ɓe mbi'i: "Pellet, min majjii [laawol ngol]".

²⁷wurin ko min ɗawaaɓe!".

²⁸Ɓurɗo ɓe moƴƴude oon wi'i: "mi wi'anaano on : haanii ko cubbunhinoɗon?"

²⁹Ɓe mb'i: "Senaare woodanii Joomi amen ! Pellet, hari ko min tooñɓe".

³⁰Woɗɓe e maɓɓe feewtiti ɓeya, heɓe pelindira.

³¹Ɓe mbi'i: "Ee bone amen ! Pellet, hari ko min bewɓe.

³²Hino gasa ka Joomi amen wattitana min ɓuri baan ɗon moƴƴude. Ko ka Joomi amen ko min reerɗube e [ya'afeede] .

³³Ko noon tigi woni leɓte ɗeen; ko lette La'akara ɗeen non ɓuri manude, sinno heɓe nganndunoo !

³⁴Pellet, hino woodani gooŋɗuɓe ɓeen ka Joomi maɓɓe, Aljannaaji ne'ema.

³⁵Kere Min mbaɗay jebbiliiɓe ɓeen wano bonɓe ɓeen?

³⁶Ko heɓi on, si ɗon ñaawira noon?

³⁷Kaa hoɗon mari deftere, nde janngoton e mum?

³⁸Pellet, ko woodani on e mayre, ko ko cuɓotoɗon.

³⁹Ka ko podooje woodani on e amen, koolniiɗe haa Ñande Darngal, won'de pellet, hino woodani on ko ñaawoton kon?

⁴⁰Laɓndii ɓe ko hommbo e maɓɓe fawtaniiɓe ɗuum?

⁴¹Kaa ko kafidiiɓe woodani ɓe? yoo ɓe ngaddu kafidiiɓe maɓɓe ɓen, si tawii ko ɓe gooŋuɓe !

⁴²Ñande belenru ñoroytee, ɓe noddee e cujjugol kono ɓe mbaawataa.

⁴³Hara gite maɓɓe ɗeen no heli, koyeera no suddi ɓe. Ko tawde ɓe noddeteno e cujjugol fewndo ka ɓe mbaawunoo...!

⁴⁴Accidam e kala jedduɗo ndee yeewtere; aray nde Min suynira ɓe nokku ka ɓe nganndaa.

⁴⁵Miɗo neeɓnan ɓe. Pellet noon, pewje am ɗen ko tiiɗɗe.

⁴⁶Kaa a laɓndi ɓe njoɓdi, hara ko yoɓugol ndi teddani ɓe?

⁴⁷Kaa ɓe nganndu fii wirniiɗi ɗiin, hara hiɓe mbinndira [ɗim hujjaaji maɓɓe]?

⁴⁸Muññor ñaawoore Joommaa nden, hara a wa'aali wa wonndiiɗo linngii ngii fewndo o noddunoo [Joom makko] homo sunii.

⁴⁹Si tawno moƴƴere immorde e Joomi makko hewtitanooki mo, ko pellet, o bugeteno e wulaa hara ko o pelniiɗo.

⁵⁰Joomi makko suɓii mo, o waɗi mo e moƴƴuɓe ɓeen.

⁵¹Hay yedduɓe ɓeen eɓɓiinoo yuwirgol ma gite maɓɓe ɗeen, nde ɓe nanunoo Jaŋtoore nden, hiɓe mbi'a: "on ko kaangaaɗo!".

⁵²Ndee [Alqur’aanaare] wonaani, si wonaa waajo winndere nde!