Ar-Rahman

¹Joom yurmeende e on.

²O anndinii alqur'aana.

³O tagi neɗɗaŋke o.

⁴O anndini mo ɓanngingol.(laɓɓin'gol)

⁵Nayange ngen e lewru ndun [hiɗi ndogira] limoore,

⁶koode ɗeen kadi e leɗɗe ɗeen, hino cujjude.

⁷Kammu ngun, o toowni ngu. O waɗi nunɗal ngal,

⁸fii wota on mbewu ka pe'esirɗe.

⁹Ñinniron petgol ngol no nunɗiri. Wata on ustu pe'esirɗe ɗeen.

¹⁰Leydi ndiin, O waɗanndi tagoore ndeen:

¹¹Muuyanteeɗi hino e mayri, e leɗɗe tamaro marɗe poƴƴi.

¹²e gabbe marɗe ña'ande, e uurngol.

¹³E ko holɗi e ne'emaaji Joomi mon ɗin woni ko njeddoton?

¹⁴O tagiri neɗɗo on immorde e loopal, ba'ngal e ko juɗaa.

¹⁵O tagiri jinnaaji ɗiin, immorde e lew lewndu yiite laaɓuki.

¹⁶E ko holɗi e ne'emaaji Joomi mon ɗiin njeddoton?

¹⁷Jeyɗo fuɗirɗe ɗeen ɗiɗi Jeyi kadi mutirɗe ɗeen ɗiɗi.

¹⁸E ko holɗi e ne'emaaji Joomi mon ɗin njeddoton?

¹⁹O Tuppindiri maaje ɗeen ɗiɗi, hiɗe potta.

²⁰heedo hino hakkunde majje, ɗe njillondirtaa.

²¹E ko holɗi e ne'emaaji Joomi mon ɗin njeddoton?

²²Hino yalta e ɗeen [maaje] ɗiɗi: kaŋŋe "Lu'lu'u" e "marjaan".

²³E ko holɗi e neemaaji Joomi mon ɗin njeddoton?

²⁴Ko Kaŋko woodani dogooje lesaaɗe ka ndeer maayo, ba'aɗe na pelle.

²⁵E ko holɗi e ne'emaaji Joomi mon ɗin njeddoton?

²⁶Kala ko woni e hoore mayri ko ko re'oyta,

²⁷heddoo Jaati Joomaa Kiin, Jom mawngu e teddungal.

²⁸E ko holɗi e ne'emaaji Joomi mon ɗin njeddoton?

²⁹Ɓeen ngonɓe ka kammuuji e ka leydi hino naamnoo mo. Ñande woo, Himo e fiyaaku.

³⁰E ko holɗi e ne'emaaji Joomi mon ɗiin njeddoton?

³¹Aray nde Min fa'andii hasbude on, onon yo tedda ko'e en ɗiɗo en..

³²E ko holɗi e ne'emaaji Joomi mon ɗin njeddoton?

³³Eey mon yo dental jinna e yimɓe ! Si on kattanii wuɗɗirgol ka seraaji kammuuji e ka leydi, haray nguɗɗee. On wuɗɗirtaa si wonaa e doole.

³⁴E ko holɗi e ne'emaaji Joomi mon ɗiin njeddoton?

³⁵Hino wurtee e mon - [onon jinna e yimɓe] - ɗemngal yiite e curki [maa sila taayuɗo], on paabondirtaa.

³⁶E ko holɗi e ne'emaaji Joomi mon ɗin njeddoton?

³⁷Si wonii kammu nguun seekiima, ngu wojjirii wa piindi hono pentiir boɗe.

³⁸E ko holɗi e ne'emaaji Joomi mon ɗin njeddoton?

³⁹Nden ñande, wonaa neɗɗo maa jinne woni ko laɓnditetee fii bakkaat mum.

⁴⁰E ko holɗi e ne'emaaji Joomi mon ɗin njeddoton?

⁴¹Bonɓe ɓeen hino ngaannditiree Ma'andeeji maɓɓe ɗiin. Ɓe nanngiroyee ka njubuuji-tin tinɗi- e ka koyɗe.

⁴²E ko holɗi e ne'emaaji Joomi mon ɗin woni ko njeddoton?

⁴³Ko ngee woni Jahannama nge bonɓe ɓen njeddynoo fii mum.

⁴⁴Hiɓe mbanngoo hakkunde magge e fatayɗam kattuɗam wulde.

⁴⁵E ko holɗi e ne'emaaji Joomi mon ɗin njeddoton?

⁴⁶Hino woodani kala kulɗo daragol ye'eso Joomi mum, aljannaaji ɗiɗi;

⁴⁷E ko holɗi e ne'emaaji Joomi mon ɗin njeddoton?

⁴⁸(joomiraji)marɗe calɗi ɗiɗi dukke.

⁴⁹E ko holɗi e ne'emaaji Joomi mon ɗin njeddoton?

⁵⁰Ɓulli ɗiɗi hino e ndeer majji, ilayɗi.

⁵¹E ko holɗi e neemaaji Joomi mon ɗin njeddoton?

⁵²Hino e ndeer majji kala muuyanteeɗi ɗiin, noone ɗiɗi.

⁵³E ko holɗi e neemaaji Joomi mon ɗin njeddoton?

⁵⁴Hara ko ɓe soɓɓindiiɓe e ndaɗɗule tekkirɗe ndeer, dimɗe majje ɗeen ɗiɗi ko ɓadiiɗe.

⁵⁵E ko holɗi e ne'emaaji Joomi mon ɗin njeddoton?

⁵⁶(Rewɓe) ɗaɓɓiɗa ndaarɗeɓe hino toon, ɓe neɗɗo memaani ado maɓɓe wonaa kadi jinna.

⁵⁷E ko holɗi e ne'emaaji Joomi mon ɗin njeddoton?

⁵⁸[Labiraaɓe] hono kaŋŋe yaaquutu e marjaan.

⁵⁹E ko holɗi e neemaaji Joomi mon ɗin njeddoton?

⁶⁰Hara njoɓdi moƴƴere no woodi, si wonaa moƴƴere?

⁶¹E ko holɗi e ne'emaaji Joomi mon ɗiin njeddoton?

⁶²Hino ga ɗiin ɗiɗi, aljannaaji ɗiɗi kadi.

⁶³E ko holɗi e neemaaji Joomi mon ɗin njeddoton?

⁶⁴Kecciɗɗi ɗiɗi.

⁶⁵E ko holɗi e ne'emaaji Joomi mon ɗiin njeddoton?

⁶⁶Ɓulli ɗiɗi hino e ndeer majji, ɓulayɗi.

⁶⁷E ko holɗi e ne'emaaji Joomi mon ɗin njeddoton?

⁶⁸Hino e majji : muuyanteeɗi, e leɗɗe tamarooje e rummaana.

⁶⁹E ko holɗi e ne'emaaji Joomi mon ɗin njeddoton?

⁷⁰Hino e ɗiin ɗiɗi : rewɓe suɓaaɓe (labaaɓe).

⁷¹E ko holɗi e ne'emaaji Joomi mon ɗin njeddoton?

⁷²huurul'ayniiɓe(yaaja gite), soomaaɓe e tillisooji,

⁷³E ko holɗi e ne'emaaji Joomi mon ɗin njeddoton?

⁷⁴neɗɗo memaani ɓen ado maɓɓe, wonaa kadi jinna.

⁷⁵E ko holɗi e neemaaji Joomi mon ɗin njeddoton?

⁷⁶Ko ɓe soɓɓindotooɓe e dow ngawluuji haakooji, e ndaɗɗule abqari labaaɗe.

⁷⁷E ko holɗi e ne'emaaji Joomi mon ɗin njeddoton?

⁷⁸Barkinii innde Jooma nden, Jom mawngu e teddungal !