Sad

¹Saad.[1] Mi wooɗndirii Alqur'aana, jom waa.

²Si ko woni, yedduɓe ɓe ngonii e townitaare e lurral !

³Ɗuuɗii e gire ɗen Min kalki, ado maɓɓe, ɓe noddi faabo, kono tawi ko bonatno bonii.

⁴Ɓe ŋalɗi, nde jeertinoowo jiyaaɗo e maɓɓe, arata ɓe. Yedduɓe ɓen mbi'i: "Oo, ko bileejo keewuɗo fenaande,

⁵Kere o waɗay deweteeɗi ɗin, deweteeɗo gooto? Pellet, ɗum ko hu'unde haawniinde non".

⁶Mbatu maɓɓe ngun huccitiri wiide: "Yehee, tabiton e deweteeɗi mon ɗin. Ɗuum ɗoo, ko hu'unde eɓɓanaande.

⁷Min nanaali fii ɗum, e diina sakkitiika kan. Ɗum wonaani, si wonaa ko fefkindaa.

⁸Kere ko e makko Jaŋtoore nden jippotoo hakkunde amen?" Si ko woni, ɓe ngonii e cikkitagol Jantoore am nden. Wurin, ko fii ɓe meeɗaali taho, lepte am ɗen!

⁹Kaa ɓe njogiti ngaluuji yurmeende Joomi maa, pooluɗo, Dokko O?

¹⁰Kaa ko kamɓe woodani laamagol kammuuji ɗin e leydi ndin e ko woni hakkunde majji? Haray yo ɓe ƴeenŋu ɓe ƴawa!

¹¹Ko ɓe konu hoyngu no, foolet e 'peɗle ɗen!

¹²Ado maɓɓe, yimɓe Nuuhu ɓen njedduno, e Aadi'en e Fir'awna jom-peme,

¹³e Samuuda'en, e yimɓe Luutu ɓe, e yimɓe pitaaji ɓen; ko ɓeen ngoni fedde (fennuɓe) ɓeen.

¹⁴Kala ɓee wonaani, si wonaa o njeddi ii Nulaaɓe ɓen. Lepte Am ɗen jojji e maɓɓe!

¹⁵Ɓee cabbaaki, si wonaa ha'acaango gooto, ngo alaa ruttorde.

¹⁶Ɓe mbii': "Joomi amen, yaccinan min geɗal lepte amen, ado Ñalaande hasboore nden".

¹⁷Muñño e kon ko ɓe mbi'ata; annditaa jiyaaɗo Amen on, Daawuuda, joom doole. Ko o ɗuuɗunooɗo tuubugol.

¹⁸Min eeltii pelle ɗen, hiɗe cubbunhinoda e makko, ka kiikiiɗe e ka bimmbi.

¹⁹e colli ɗin, hiɗi mooɓindiraa, kala e majji no tuubana mo.

²⁰Min cemmbini laamu makko ngun, Min yeɗi mo Annabaaku e fasinteegal.

²¹Hara kumpital wenooɓe ɓen arii maa, nde ɓe ƴawunoo ka ganngunal !

²²Nde ɓe naatunoo ka Daawuuda, o ɗenƴii ɓe. Ɓe mbi'i: "Wota a hul ! Ko wennjuɓe ɗiɗo; goɗɗo e amen tooñii oya. Ñaawir goonga hakkunde amen, wota a tooñ, tinndinaa min e laawol Pocciingol ngol.

²³Oo ko musiɗɗo am: homo jogii baali cappanɗe jeenay e jeenay, miin miɗo jogii baalii gootii. O wi'i: "Henndinam ngii"; o foolimi e yeewtere.

²⁴O maaki: "Pellet, o tooñirii ma laɓndagol baalii maa ngii, waɗtugol e baali makko ɗin". Ɗuuɗii ko hawtuɓe tooñindirta hakkunde maɓɓe, si wonaa ɓen gooŋɗiinɓe, ɓe ngolli moƴƴuɗi - ɓen non no fanɗi. - Daawuuda felliti, won'de Min njarribike mo. O imsinanii Joomi makko, o suuyiri sujjugol, o tuubi.

²⁵Min njaafanii mo ɗum. Pellet non, hino woodani mo ko amen, ɓadal e moƴƴude ruttorde.

²⁶Eey ma Daawuuda, Min mbaɗii ma lomto ka leydi. Ñaawir goonga hakkunde yimɓe ɓen, wota a jokku mbeleeɗe, sakko ɗe majjine e laawol Allah ngol". Pellet, ɓen majjooɓe e laawol Allah ngol, hino woodani ɓe lepte tiiɗuɗe, sabu ko ɓe yejjitiri kon, Ñalaande hasboore nden.

²⁷Min tagiraali kammu ngun e leydi ndin e ko woni hakkunde majji kon, meere. Ɗum ko sikke yedduɓe ɓen. Bone woodanii ɓen yedduɓe, e Yiite ngeen!

²⁸Ka Min mbɗay ɓen gooŋɗinɓe ɓe ngolli moƴƴi, wano bonnooɓe ɓen ka hoore leydi? Kaa Min mbaɗay gooŋɗuɓe ɓen, wano faajireeɓe ɓeen?

²⁹Ko deftere barkinaande, woni ko Min njippini e maaɗa, fii no ɓe taskora aayeeje mayre, e ko joomiraaɓe haqqille ɓen mbaajitora.

³⁰Min njeɗi Daawuuda Sulaymaana, - jiyaaɗo moƴƴo - Ko o ɗuuɗuɗo tuubugol-ruttoo.

³¹Jaŋto nde o hollanoo kiikiiɗe, pucci yooɗuɗi yaawuɗi,

³²o maaki: "Min ɓurnorii joɗgol jawdi, dii ko mi jaŋtotoo Joomi am kon, haa [na'ange] ngen mutoyii.

³³Nduttee kam ɗi". O woni e sodugol ɗi ka taape e ka daaɗe.

³⁴Gooɗii Min njarribike Sulaymaana, Min mbernii e jullere makko nden ɓanndu. refti o tuubi.

³⁵O maaki: "Joomi am, haforanam, yeɗaa kam laamu, ngu heertantaako goɗɗo goo, ɓaawo am. Pellet, ko an woni jeɗoowo On".

³⁶Min eeltani mo henndu ndun, tawi hindu wifira e sago makko, neweende, nokku kala to o yiɗi.

³⁷E seytanuuji ɗiin, mahaynooɗi e mutaynooɗi.

³⁸Goɗɗi ɗi, ko dummbaaɗi e peŋɗe.

³⁹"Ɗuum ko dokkal Amen. Okkitir, maa njogitoraa ko aldaa e laɓnditoreede".

⁴⁰Ko pellet, hino woodani mo ka amen, ɓadal e moƴƴude ruttorde.

⁴¹Jaŋto kadi jiyaaɗo Amen on Ayyuuba, nde o noddunoo Joomi makko, won'de : "Seytaane memirii lam tampere e muuseendi".

⁴²[Allah wi'ani mo]: "Latir tunndawal maa ngal [ka leydi]: Ɗam ɗoo, ko lootorɗam, ɓuuɓɗam e njaram".

⁴³Min njeɗi mo ɓeynguure makko nden, e yeru maɓɓe tawti ɓe, yurmeende immorde e amen, e waaju wonan'de marɓe haqqille ɓen.

⁴⁴"Nanngir sookewo maa ngon, tamere huɗo, piyiraa ɗum [cuddiiɗo maa on], fii wata a firtu (woondoore nden)". Min tawu mo, muññiiɗo. O moƴƴii jiyaaɗo. Pellet, ko o ɗuuɗuɗo tuubugol-ruttoo.

⁴⁵Jaŋto kadi, jiyaaɓe Amen ɓen, Ibraahiima e Ishaaqa e Yaaquuba, joomiraaɓe semmbe e yi'anɗe.

⁴⁶Min keertinanii ɓe heertinannde, annditugol galle (laakara) ɗen.

⁴⁷E kadi ɓee ka amen, ko jiyaaɓe e suɓaaɓe moƴƴuɓe suɓaaɓe.

⁴⁸Jaŋto kadi Ismaa'iila, e Yuusa'u, e Zal-Kifli, kala maɓɓe, ko jiyaaɓe e suɓaaɓe.

⁴⁹Ɗum ko waaju. Ko pellet, hino woodani gooŋɗuɓe ɓen, ruttorde moƴƴunde.

⁵⁰Ɗuum ko Aljannaaji ñiiɓal, ɗi ɓe udditanaa dame mum,

⁵¹hara ko ɓe soɓɓindii ɓe ton, heɓe nodda ton muuyanteeɗi ɗuuɗuɗi e njaram.

⁵²Hino woodani ɓe (ton): raɓɓuɓe ndaarɗe, goreeɓe.

⁵³Ko ɗum woni ko podaɗon, fii Ñalaande hasboore ndeen.

⁵⁴Pellet, ɗum ko arsike amen, gasugol alanaa mo.

⁵⁵Ɗuum, [ko njoɓdi maɓɓe]. Pellet, hino woodani kadi bewɓe ɓeen, ko ɓuri bonnde e ruttorde,

⁵⁶woni Jahannama, nge ɓe naatoyta. Nge bonii ndaɗɗudi!

⁵⁷Ɗuum, ko yo ɓe meeɗ: ko fatata, e ƴiƴƴiri,

⁵⁸Woɓɓe ɓen, nannduɗe e majje, ko nooneeji.

⁵⁹E hino dental naatiroyat ngal doole e mon, toolii alanaa ɓe; tawde ko ɓe naatooɓe Yiite !

⁶⁰Ɓeen mbia: bismilla alanaa mon, ko onon ndefi min ɗum". Nge bonii ñiiɓirde.

⁶¹Ɓe mbi'a: "Joomi amen, defuɗo min ɗuim on, ɓeydan mo leptte cowalle ka Yiite".

⁶²Ɓeya mbi'i: "Ko haɗi men jiugol worɓe, ɓe min limtaynoo e boonɓe ɓen?

⁶³Hara min njogitorno ɓe toon jalnori, kaa ko gite (amen) yawti ɓe?"

⁶⁴Pellet, ka goonga, ko ɗuum woni yeddondiral yimɓe Yiite ɓeen.

⁶⁵Maaku: "Anndee ko mi jeertinoowo. Deweteeɗo woo alaa, si wonaa Allah Gooto, pooluɗo On,

⁶⁶Jeyɗo kammuuji ɗin e leydi ndin, e kon ko woni hakkunde ɗin ɗiɗi, pooluɗo, kaforoowo On".

⁶⁷Maaku: "(ndee Alqur'aanaare), ko nde kabaaru mawɗo,

⁶⁸kono hoɗon ɗuurnii ɗum.

⁶⁹Ganndal alanaano kam, e fii mbatu ngun dowrowu, tuma nde ɓe weeñidaynoo.

⁷⁰Wahayinaaka e am, si wanaa won'de min on, ko mi jeertinoowo ɓanngina".

⁷¹Jaŋto nde Joomi maa daalannoo Malaa'ika'en: "Min mi tagiroowo ɓanndiŋke, immorde loopal.

⁷²si mi fotindirii mo, Mi wuttii e makko ruuhu am on, haray suuyanee mo cujjon".

⁷³Malaa'ika'en fof cujji ɓe denndaangal.

⁷⁴si wonaa Ibuliisa, o mawnintinii, o woni jiyaaɗo e yedduɓe ɓen.

⁷⁵(Allah) daali: "eey ma yo Ibuliisa, ko haɗu maa sujjangol ko Mi tagiri juuɗe am? A mawnintini kaa a jeya e townitiiɓe ɓeen?"

⁷⁶O wi'i: "Ko min ɓuri mo moƴƴude. A tagirii lam e yiite, A tagirii mo kaŋko e loopal".

⁷⁷O daali: "Yaltu ton, aan, ko a diiwaaɗo;

⁷⁸pellet, kuddi sm ndin fawike ma haa Ñande njoɓdi diina".

⁷⁹(Ibuliisa) wi'i : "Joomi am, neeɓnitanam, haa ñande nde ɓe immintintee".

⁸⁰O daali: "A jeyaama e neeɓnitanteeɓe ɓen,

⁸¹haa e ñalaande happu ganndaaɗo".

⁸²O wi'i: "Mi wooɗndirii mawngu maa ngun ! Ma mi bewnuɓe fof maɓɓe,

⁸³si wonaa jiyaaɓe Maa, laɓɓinaaɓe ɓen e maɓɓe".

⁸⁴(Allah) daali: "Mi wooɗndirii goonga, ko goonga mi wowlata,

⁸⁵ma Mi hebbinire Jahannama, e ɓen jokkuɓe ma fof e maɓɓe".

⁸⁶Maaku: "Mi laɓndaaki on njoɓdi e fii ɗum; mi wonaali jeyaaɗo e sincooɓe(deftatoobe).

⁸⁷Ndee [Alqur’aanaare] wonaani, si wonaa waaju tageefo ngon.

⁸⁸Ma on nganndu (fii) kabaaru mayre, ko neeɓaa !".