Al-Hijr

¹Alif, Laam, Raa.[1] ɗeen ko aayeeje deftere e janngeteende ɓannginnde.

²Na waawi heeferɓe ɓen njeloyto sinno ɓe laatino juulɓe.

³Accu ɓe, ɓe ñaama ɓe dakmitoo, yela soklina ɓe; arma ɓe nganndoya.

⁴Min kalkaani saare woo, si wanaa hara no woodani nde happu ganndaaɗo.

⁵Mofte woo adotaako lajal mun, ɓe neeɓnantaake kadi.

⁶Ɓe mbi'i: "Ko aan yo mo deftere nden jippinaa e mun, an ko a peetuɗo.

⁷Ko haɗno addanaa men maleyikaaji si a laatike gooŋɗuɗo?"

⁸Min njippinirtaa maleykaaji si wonaa fii goonga; ɓe wonataa ontuma, neeɓnanteeɓe.

⁹Minen min njippinii deftere nden, minen kadi ko min reenooɓe nde.

¹⁰Gooŋɗii min nuliino ado maa, e leƴƴi adinooɓe.

¹¹Nulaaɗo (woo) araani e maɓɓe si wonaa ɓe njalkitay mo.

¹²Ko wano nii min naadiri ɗum e ɓerɗe bonɓe ɓeen.

¹³Ɓe ngooŋɗintaa nde, gooŋɗii sunna aramɓe ɓen yawtiino.

¹⁴Hay si minn udditanno ɓe damal ka kammu, ɓe mbaɗtini hiɓe ƴawra heen.

¹⁵ɓe mbi'ayno: "nganndee gite amen ɗeen kippa. Wurin ko min yimɓe wilaaɓe".

¹⁶Gooŋɗii min mbaɗii ka kammu koode, min cuɗirani ɗe ndaarooɓe.

¹⁷Min ndeeni mbo e kala seytaane diiwaaɗo.

¹⁸Si wonaa oon guujjuɗo nanɗe, o jokkintina hoodere-fiɗaynnde jalɓunde.

¹⁹Leydi ndin, min weerti ndi min werlii e mayri pelle, min puuɗini e mayri kala huunde eɓɓaande.

²⁰Min mbaɗani on e mayri wuurirɗe, e ɓeen ɓe on laatanooki arsikooɓe ɗum.

²¹Huunde alaa si wanaa marga mun ko ka amen, min njippintaa ɗuum si wanaa e eɓɓoore anndaande.

²²Min ngurti keneeli ɗiin hawrondirooji e duule; min njippiniri ka kammu ndiyam min njarniri on ɗaam, wonaa onon mari ɗam.

²³Ko minen kadi ngoni ko wuurnata min mbara, ko minen ngoni ronooɓe ɓeen.

²⁴Gooŋɗii min nganndii adiiɓe e mon ɓen Gooŋɗii min nganndii sakkitiiɓe ɓen.

²⁵Pellet, Joomi maa, ko Kaŋko mooɓoyta ɓe. Kaŋko ko o ñeeño, gannduɗo.

²⁶Gooŋɗii min tagii neɗɗaŋke on e senƴayngal, e (cenlatngal) loopal-ɓalewal ɓowrungal.

²⁷E jinnaaji ɗin, min tagiri ndu ko adii, e yiite ooyunge.

²⁸Jaŋto tuma nde Joomi maa daalannoo maleykaji'en: "min ko Mi tagiroowo ɓanndiŋke immorde e senƴayngal, e loopal-ɓalewal ɓowrungal

²⁹si mi fotndiii mo, mi wuttii e makko ruuhu am on, haray suuyanee mo ko on sujjuɓe".

³⁰Maleykajien fof cujji ɓe denndaangal.

³¹si wonaa ibliisa, o salii tawdeede e sujjooɓe ɓen.

³²O daali: "eey ma ibliisa, e ko heɓ maa a laatodaaki e sujjuɓe ɓeen?"

³³O wi'i: "mi wonatah sujjanoowo ɓanndinke mo taguɗaa immorde e senƴayngal, e loopal-ɓalewal ɓowrungal".

³⁴O daali: "Yaltu toon, aan o ko a diiwaaɗo,

³⁵pellet, kuddi fawike e ma haa ñande njoɓdi diina".

³⁶O wi'i : "joomi am, neeɓnitanam haa ñande ndeɓe immintintee".

³⁷O daali:"Aa,ko a jeyaaɗo e neeɓnitanteeɓe ɓen.

³⁸haa e ñalaande happu ganndaaɗo".

³⁹O wi'i: "Joomi am, sabu ko mbewnuɗaa mi kon, ma mi cuɗinan ɓe ka leydi, ma mi bewnu ɓe fow maɓɓe,

⁴⁰si wanaa jeyaaɓe maa, laɓɓinaaɓe ɓen e maɓɓe".

⁴¹O daali: "nogol ɗoo ko laawol ka am poocciingol.

⁴²Pellet, jeyaaɓe am ɓen, a alanaa ɓe cemmbe, si wonaa ɓeen bewɓe jokkuɓe ma.

⁴³Pellet Jahannama on wonii fodoore maɓɓe ɓe fof.

⁴⁴Henge mari dame jeeɗiɗi; damal kala e majje no mari geɗal senndaangal.

⁴⁵Pellet, gooŋɗuɓe ɓeen wonii e aljannaaji e ɓulli.

⁴⁶"Naatiree ɗi e kisial, ko on hooliiɓe".

⁴⁷Min ɗoofi kala ko woni e ɓerɗe maɓɓe e konnaagu(cokotaagal): ɓe ngonti musiɗɓe fewtondirɓe e danɗe.

⁴⁸Tampere heɓataa ɓe toon,, ɓe ngonah kadi yaltintee ɓe toon.

⁴⁹Yeetito jeyaaɓe am ɓen, ko miin woni jaafotooɗo, jurmtooɗo On

⁵⁰e wonnde lepte am ɗeen, ko ɗen ngoni lepte muusɗe ɗen.

⁵¹haɓru ɓe kadi fii hoɓɓe Ibraahiima ɓeen,

⁵²Tuma ɓe naatunoo ka makko ɓe mbi'i: "Salaam (Kisiyee mon)". O maaki: "minen ko min ɗenƴii ɓe on".

⁵³Ɓe mbi'i: "Wota a faay, minen miɗen mbeltinirma [ɓiɗɗo] gorko ganndo".

⁵⁴O maaki: "E on mbeltiniratkam [ɗuum] e hoore ko mi naywi ko? E ko mbeltinirton mi?"

⁵⁵Ɓe mbi'i: "min mbeltininirii ma goonga, wota a jeye e taƴiiɓe ɓeen".

⁵⁶O maaki: "Ko hommbo taƴotoo e yurmeende Joomi mun nden, si wonaa majjuɓe ɓeen?"

⁵⁷O maaki: "Ko woni fii mon, onon ɓee imminaaɓe?"(nuleeɓe.)

⁵⁸Ɓe mbi'i: "minen min nulaa ko e yimɓe bonɓe,

⁵⁹si wonaa ɓeynguure Luuti nde, pellet ko min daɗndooɓe ɓe denndaangal,

⁶⁰si wonaa debbo makko on". min koddirii oon ɗon ko jeyaaɗo e halketeeɓe ɓen.

⁶¹Nde imminaaɓe ɓen ngaruno ka ɓeynguure Luuti,

⁶²O maaki: "onon ko on yimɓe faaytaa ɓe".

⁶³Ɓe mbi'i: "Wurin min ngaddanii ma ko ɓe ngonnoo e sikkitaade kon.

⁶⁴Min ngaddanii ma goonga kan, pellet ko min goonŋɗuɓe.

⁶⁵Yahdu e ɓeynguure maa ndeen ka taƴitannde jem- ma, jokkaa ɓaawo maɓɓe; hara gooto e mo'on yeƴƴitaaki, ndewon ka njamiraɗon".

⁶⁶Min anndini mo on fiyaaku: wonn´de wattannde ɓee ɗoo, ko taƴeteeɗum ka subaka.

⁶⁷Yimɓe saare nden ngri heɓe mbeltoro.

⁶⁸O maaki: "ɓee ɗoo ko hoɓɓe am, wata on wirtam.(cuhritam).

⁶⁹Kulee Alla, wota on koynam".

⁷⁰Ɓe mbi'i: "e min kaɗaali ma [weernugol] tagoore nden?"

⁷¹O maaki: "ɓee ɗoo ko jiwɓe am, si wonii ko on waɗooɓe [goɗɗum]!"

⁷²Mi woondirii nguurndam maa! ɓe ngonii e siwrugol maɓɓe heɓe mbeemi.

⁷³Haacaango ngoon nanngiri ɓe ka puɗal,

⁷⁴Min mbɗtiniri dow mayre on ley mayre, min saaƴini(toɓri) e maɓɓe kaaƴe iwruɗe e loope juɗaaɗe.

⁷⁵Wonii e ɗuum, maandeeji wonan´de ɓen teskotooɓe.

⁷⁶Pellet, ɗeen [ca'e] no e jurol(bolol) ñiiɓngol.

⁷⁷Wonii e ɗuum, maande wonan´de ɓeen gooŋɗinɓe.

⁷⁸Gooŋɗii yimɓe fitaare(sutu) ɓeen [kadi] ko tooñɓe.

⁷⁹Min yoɓtii e maɓɓe. Pellet ɗeen [ca'e] ɗiɗi ngonii e laawol ɓanngungol.

⁸⁰Gooŋɗi yimɓe (aynde) Hijiri nden njeddii nulaaɓe ɓeen.

⁸¹Min ngaddani ɓe aayeeje amen ɗen, ɓe laatii ɗuurniiɓe ɗe.

⁸²Hari heɓe lesoynoo e pelle ɗeen cuuɗi, ko ɓe hooliiɓe.

⁸³Haacaango ngoon nanngi ɓe ka subaka.

⁸⁴Nafaaniɓe ɗuum ko ɓe laatinoo heɓe paggitoo.

⁸⁵Min tagiraani kammuuli ɗiin e leydi ndin, e ko woni hakkunde majji kon, si wonaa e goonga. Pellet, darngal ngal ko arayngal! yaafora jaafaggol labaangol.

⁸⁶Tabitii ko Joomi maa woni Takɗo, gannduɗo.

⁸⁷Gooŋɗii min okkii ma jeeɗiɗi ummorde ɗimmitaa-ngol, e Alqur'aanaare mawnde nden.

⁸⁸Wata a ɓamtu gite maa ɗen e neemaaji ɗi lin dakmiti ɓe e mum en, wata a sunu e maɓɓe, lesɗin becce maa ɗen gooŋɗinɓe ɓen.

⁸⁹Maaku: "min ko mi jertinoowo ɓannginoowo".

⁹⁰Wano min njppinirnoo e senndooɓe [defte Alla] ɓen [lepte],

⁹¹Ɓeen waɗɓe Alqur'aanaare nden geɗe-geɗe.

⁹²Mi wooɗndirii Joomi maa! Ma min laɓndoyo ɓe fof maɓɓe.

⁹³fii ko ɓe ngonnoo e huuwude.(gollude).

⁹⁴Feññin ko njamira-ɗaa kon, ɗuurno-ɗaa sirkooɓe ɓeen.

⁹⁵minen min njonii ma e ɓen jalkitooɓe.

⁹⁶Ɓeen waɗdooɓe e Alla deweteeɗo goo. arma ka ɓe ngannda.

⁹⁷Gooŋɗii miɗen nganndi won´de bernde maa nde na ɓiɗtora ko ɓe kaalata kon.

⁹⁸Subbhinor yettugol Joomi maa, laato-daa e sujjooɓe ɓee.

⁹⁹ndewaa Joomi haa yananeede (maayde) ara e maa.