An-Naml

¹Taa Siin,[1] ɗeen ko aayeeje Alqur'aanaare nden e deftere ɓanngunde.

²Ko nde Peewal e welo-welo wonan'de gooŋɗinɓe ɓen.

³Ɓeen ɓe no ñiiɓa e Juulde nden ɓe totta askal on, kamɓe heɓe njananaa fii Laakara on.

⁴Pellet, ɓeen ɓe ngooŋɗinaani Laakara on, Min cuɗanii ɓe golle maɓɓe ɗen, kamɓe heɓe mbumo.

⁵Ko ɓeen ngoni ɓen, ɓe woodani ɗum Lepte bonɗe ɗen, kamɓe ka Laakara ko kamɓe ngoni hayruɓe ɓeen.

⁶E pellet, an haɗa lonnginee Alqur'aanaare nden immorde ka Ñeeño gannduɗo.

⁷Tuma nde Muusaa maakannoo ɓeynguure makko nden: "Min dey, mi haynike yiite, mi addana on ka nge woni ɗon kumpital ma mi addana on docotal kuɓɓungal, bela jo'o onon on itwoto.

⁸Tuma nde o arnoo e magge, o noddaa: Ɗuum woni barkinaama on wonɗo ka yiite e ɓen wonɓe banŋe magge, e Senaare wonanii Alla Jooma winndere nden.

⁹Eey ma Muusaa, ko woni, ko Min woni Alla Tedduɗo Ñeeñɗo On.

¹⁰Liɓu tuggordu maaɗa ndun, Tuma nde o yi'unoo ndu hundu dilla, a wi'ayma kayru ko ndu mbooɗdi, o hucciti ko o doguɗo o yiltitaake. Ko an yo Muusaa: "Wata a hul, Min dey Nulaaɓe ɓen kulataa to Am".

¹¹Si wonaa oon tooñɗo, refti o lomtini ko moƴƴi ɓaawo bone ɗen. Pellet, Min ko Mi cuhroowo Jurmeteeɗo.

¹²Naatnu junngo ma ngon ka jiiba maaɗa, ngo yaltay ko ngo ranewo ko aldaa e bone, [ɗum no jeyaa] e ndeer aayeeje jeenay nulaaɗe e Fir'awna e yimɓe makko ɓen, pellet, kamɓe ɓe laatike yimɓe faasiqiiɓe.

¹³Tuma nde arnoo e maɓɓe Aayeeje amen ɗen ko yi'eteeɗe, ɓe mbi'i: "Ɗu'um, ko mbilewu ɓanngungu".

¹⁴Ɓe njeddi [aayeeje ɗen], tawi wonkiiji maɓɓe ɗin no yananaa fii majje, tooñe e mawnintinaare. Ndaaru ko honno laatornoo battane yedduɓe ɓen.

¹⁵Gooŋɗii Min ngokkii Daawuuda e Sulaymaana Ganndal ɓe maaki: "Yettoore nden woodanii Alla On ɓurnuɗo min e dow ɗuuɗuɓe immorde e jeyaaɓe makko gooŋɗinɓe ɓen".

¹⁶Sulaymaana roni Daawuuda, O maaki: "eey mon yimɓe, min nganndinaama haala colli ɗin, men okkaama immorde e kala hu'unde, Pellet, ɗumɗoo ko ɗum woni ɓural ɓanngungal".

¹⁷Sulaymaana mooɓanaa koneeli makko ɗi immorde ka jinnaaji e ka yimɓe e ka colli, kamɓe ko ɓe yuɓɓinaaɓe.

¹⁸Haa nde ɓe ngrnoo e aynde korndolli ɗin, korndolil mbi'i i'i: "eey mon korndolli, naatee ka koɗanɗi mooɗon, fii wata Sulaymaana e koneeli mu'um ɗin muncu on, tawa kamɓe ɓe tinaa".

¹⁹[Sulaymaana] moosi ko o jaluɗo immorde e konngol maggi ngol, o maaki: "Jooma, lonnginam no mi yettira neema maaɗa mo neeminɗaa e dow am on, e jibibinɓe lam ɓen, e nde mi gollata ko moƴƴi mbeltoraa ɗum, naatnaami ka Yurmeende Maaɗa wond'ude e jiyaaɓe Ma moƴƴuɓe ɓe".

²⁰O ƴewtii colli ɗin, o maaki: "Ko heɓi kam, mi yiaani Hud-huda. Kaa ndu laati jiyaandu e wirniiɗi ɗin?"

²¹Maa mi lepta ndu sanne lepte caɗtuɗe ma maa mi hirsandu sanne, ma ndu addana kam hujja ɓannguɗo.

²²Ndu ñiiɓe ko woɗɗaani, ndu wi'i: "mi huɓindike ko a huɓindaaki ɗum, mi addanii ma immorde to Saba'i kumpital yananaangal".

²³Min dey, mi tawii sonnaajo no laamii ɓe homo okkaa immorde e kala hu'unde, no woodami mo kadi jullere [laamu] mawnde.

²⁴Mi tawii mo kaŋko e yimɓe makko ɓen heɓe cujjana na'ange nge ga Alla; Seytaane no cuɗaniɓe golle maɓɓe ɗen o faddii ɓe ga Laawol ngol, kamɓe ɓe peewataa.

²⁵Ko haɗata ɓe cujjana Alla oon jaltinoowo ko suuɗii kon ka kammuuli e ka leydi homo Anndi ko cuuɗoton e ko peñinton.

²⁶Alla, Deweteeɗo alaa si wonaa Kaŋko Jooma Arsi Tedduki kin.

²⁷O maaki: "Aray min ndaara si a gooŋɗu, maaɗum si laati jiyaaɗo e fenɓe ɓen".

²⁸Yahdu e nduu talkuru am mbernoɗaa ndu ka maɓɓe, refti kuccaa ɓe ndaaraa ko holɗum ɓe nduttata.

²⁹[Sonnaajo on] wi'i: "eey mon mbatu, min dey wernaama ka am talkuru teddundu".

³⁰Pellet, nduu ko immorde e Sulaymaana, pellet, ko woni e mayru ko: "Innde Alla kuuɓuɗo Yurmeende keeriiɗo Yurmeende Oon".

³¹Wota on townitano kam, ngaree e am ko jebbiliiɓe.

³²O wi'i: "eey mon mbatu, mbaɗtee kam e feere e ɗee fiyaake am, mi laataaki taƴoowo fiyaake haa tawteɗon e am".

³³Ɓe mbi'i: "Enen ko en jooma doole e jooma hare caɗtuɗe, fiyaake ɗen ko ka maaɗa woni, ndaaru ko holɗum njamirtaa".

³⁴[Debbo on] wi'i: "Pellet, laamɓe ɓen si ɓe naatii e saare ɓe mbonnat nde, ɓe mbaɗa tedduɓe mayre ɓen hoyɓe, ko wanonii ɓe ngollirta.

³⁵Awa miin, mi nulay e maɓɓe neldaari, mi ndaara ko holɗum nulaaɓe ɓen nduttodata.

³⁶Tuma nde ɓe arnoo ka Sulaymaana, o maaki: "Enee, on ɓeydiray kam jawdi, kon ko Alla okkimmi, no ɓuri moƴƴude diini kon ko O okki on, ko woni, onon hoɗon farnora neldaari mooɗon ndin".

³⁷Rutto ka maɓɓe, mamen ngaddana ɓe koneeli ɗi ɓe maraa feere muuɗum, mamen njaltin ɓe ton ko ɓe ja'asɓe hara kamɓe ko hoyɓe.

³⁸O maaki: "eey mon mbatu, ko hommbo e mooɗon addanta kam jullere laamu makko nden, ko adii ɓe arude ka am ko ɓe jebbiliiɓe?"

³⁹Ngaari jinna ndin wi'i: "Min, mi addante nde ko adii a immaade e darnde maaɗa nden, e pellet, min e dow ɗum ko mi cemmbuɗo koolaaɗo".

⁴⁰Oon mo woni ka mu ganndal immorde ka deftere wi'i: "Min mi anndante nde ko adii a nde ndarɗe maaɗa ɗen ruttotoo e maaɗa". Tuma nde o yi'unoo nde ko nde ñiiɓunde ka makko, o maaki: "Ɗum ɗoo, ko immorde e Ɓural Joomi am, fii yo o ndarndo lam si mi jarnay [mo] maaɗum si mi yeddat [mo], kala jarnuɗo anndu ko o jarni kon wonanay wonkii makko kin, kala yedduɗo kadi pellet, Joomi am ko o Galo Tedduɗo".

⁴¹O maaki: "Faytinanee mo jullere laamu makko nden, ndaaren si on annditat, kaa o laatoto jiyaaɗo e ɓen ɓe anndittaa".

⁴²Tuma nde o arnoo, [o] wi'aa: "Enee, ko nii jullere maaɗa nden wa'i?" O wi'i: "Awi'ayma ko kayre tigi nii". Min ndokkaama ganndal ko adii mo, min laatii jebbiliiɓe.

⁴³Faddii mo, ɗum ko o laatinoo homo rewa ga Alla, pellet, kaŋko o laatinoke jiyaaɗo e yimɓe yedduɓe.

⁴⁴Wi'anaa mo: "Naatu ka huɓeere". Tuma nde o yi'unoo nde o sikki ko nde duneere(tewru), o ñori dense (korle)makko ɗen. [Sulaymaana] maaki: "Pellet, ndee ko huɓeere newɗiniraande ndaarorɗe". [Debbo on] wi'i: "Jooma, min dey mi tooñii woŋkii am, mi jebbilanike Alla Jooma winndire nden, wond'ude e Sulaymaana".

⁴⁵Gooŋɗii Min Nulii fa'ade e Samuudinkooɓe ɓen musiɗɗo maɓɓe on Saalihu, ɗum woni rewee Alla. Tawi kamɓe ko ɓe feddeeji ɗiɗi hiɓe beeñondira.

⁴⁶O maaki: "Ko onon yo yimɓe am, ko fii holɗum heñornton bone ɗen ko adii moƴƴere nden?" "Ko haɗi imsinanao Alla mbelejo'o onon on njurminoyte".

⁴⁷Ɓe mbi'i: "Min kiitinorii ma e ɓen won'ɗuɓe e maaɗa". O maaki: "kiite mooɗon on ko ka Alla woni, ko woni, onon ko on yimɓe fitneteeɓe"

⁴⁸Laatinoke ka saare ton worɓe njeenayo heɓe mbonna ka leydi ɓe moƴƴintaa.

⁴⁹Ɓe mb'i: Ɓe ngooɗndirii Alla, ma min waalanan mo ka suudu kaŋko e ɓeynguure makko nden refti ma min wi'an jeyɓe mo ɓen; men tawaaka bargol yimɓe makko ɓen, e pellet, menen ko men gooŋɗuɓe".

⁵⁰Ɓe kodi hodoore Minen kadi Min pewji fewjoore, tawi kamɓe ɓe so'ataa.

⁵¹Ndaaru, ko honno laatorno battane hodo maɓɓe ngon, Minen Min njirbinno ɓe kamɓe e yimɓe maɓɓe ɓen ɓe fof maɓɓe.

⁵²Ɗin cuuɗi maɓɓe ko jeewuɗi sabu ko ɓe tooñunoo kon. Pellet, wonii e ɗum Ma'ande wonan'de yimɓe haqqilooɓe ɓen.

⁵³Min danndi ɓen gooŋɗinɓe, ɓe ngoni hulooɓe [Alla].

⁵⁴E Luutu, tuma nde o wi'anno yimɓe makko ɓen: 'Enee, on aray paŋkare ɗen hara hoɗon cutii?"

⁵⁵Eyoo, onon on ngarat e worɓe ɓen ka tuuyo ngccon rewɓe ɓen?! Si ko woni, onon ko on yimɓe majjaaɓe.

⁵⁶Jaabawol yimɓe makko ɓen ngonaano si wonaa ko ɓe mbi'i : "Yaltinee yimɓe Luutu ɓen ka hoɗo (wura) mooɗon ; kamɓe ko ɓe yimɓe laɓɓintintooɓe".

⁵⁷Min daɗndi mo kaŋko e yimɓe makko ɓen, si wonaa debbo makko on; [on ɗon] Min hoddiranii mo ko o jiyaaɗo e halketaaɓe ɓen.

⁵⁸Min toɓini e dow maɓɓe toɓo, bonii toɓo jeertinaaɓe ɓen.

⁵⁹Maaku: Yettoore nden ko Alla woodani, kisiyee wonii e jiyaaɓe makko ɓen ɓe O suɓii. Enee, ko Alla ɓuri moƴƴude, kaa ko ɗin ɗiɓe sirkanta?

⁶⁰Kaa ko hommbo tagi kammuuji ɗin e leydi ndin O jippinani on immorde ka kammu ndiyam? Min puɗiniri ɗam gese joomiraaje ŋari. Wonantaa on nde puɗinon leɗɗe majje. Enee, hara deweteeɗo no woodi wond'ude e Alla? Ko woni, kamɓe ko ɓe yimɓe ooñotooɓe.

⁶¹Kaa ko hommbo waɗi leydi ndin ñiiɓndi, O waɗi hakkunde mayri calluɗi O waɗani ndi pelle o waɗi hakkunde maaje ɗen ɗiɗi heedo?, hara na woodi deweteeɗo [goo] wond'ude e Alla? ko woni, ɓurɓe ɗuuɗude ɓen e maɓɓe ɓe nganndaa.

⁶²Kaa ko hommbo jaabato ɓittiiɗo on si o noddi mo o hunca bone ɗen o waɗa on lontiiɓe ka leydi? Na woodi Koreweteeɗo goo wond'ude e Alla? Famɗii ko mbaajitoɗon.

⁶³Kaa ko hommbo feewnata on ka niɓe njoorndi e ka maayo, e ko hommbo accitata keni ɗin wewlinirayɗi fii Yurmeende Makko nden? Enee, ko deweteeɗo goo wond'ude e Alla? Alla Toowii ga ko ɓe cirkata kon.

⁶⁴Kaa ko hommbo woni puɗɗuɗo tagoore nde refti O rutta ngu, e ko hommbo arsikata on immorde ka kammu e ka leydi? Enee, ko deweteeɗo goo wond'ude e Alla? Maaku: "Addee daliili mooɗon on si tawii ko on gooŋɗuɓe".

⁶⁵Maaku: "Anndaa ko wirnii kon ɓen wonɓe ka kammuuli e ka leydi si wonaa Alla. Ɓe so'ataa kadi ko honnde tuma ɓe immintinoytee".

⁶⁶Ko woni, ganndal maɓɓe ngal hattii fii Laakara on, ko woni, kamɓe heɓe e sikke fii [Laakara], ko woni, kamɓe ko ɓe wumuɓe fii ɗum.

⁶⁷Ɓeen yedduɓe mbi'i: " Enee, hay si min laatike mbullaari e baabiraaɓe amen ɓen kadi, e hara minen ko min yaltinoyteeɓe?"

⁶⁸Gooŋɗii min podanooma ɗum minen e baabiraaɓe amen ko adii, ɗum wonaani si wonaa tinndi adinooɓe.

⁶⁹Maaku : "njehee ka leydi ndaaron ko honno battane bonɓe ɓen laatornoo".

⁷⁰Wota a suno fii maɓɓe, wota a laato e ɓitteende immorde e ko ɓe peewjata kon.

⁷¹Heɓe mb'a: "Ko honnde tuma woni ndee Fodoore, si on laatike gooŋuɗɓe?"

⁷²Maaku: "No tijjaa de tawata ɓadanike on yoga e kon ko ɗaɓɓuɗon yaccinaneede".

⁷³Pellet, Joomi maaɗa ko O Jom Ɓural e dow yimɓe ɓeen, kono ɓurɓe ɗuuɗude ɓen e maɓɓe ɓe njaarnataa [Alla].

⁷⁴Pellet, Joomi maaɗa hiMo Anndi ko ɓerɗe maɓɓe ɗen coomi e ko ɗe 'eññinta ko.

⁷⁵Alaa e birniikum ka kammu e ka leydi si wonaa [fii makkun] no e ndeer deftere ɓanngunde.

⁷⁶Pellet ndee Alqur'aanaare, hende filloo e dow ɓiɗɓe Israa'iila ɓen fii hu'unde nde ɓe ɓuri luutondirde nden e fii muuɗum.

⁷⁷Pellet, kayre ko nde peewal e Yurmeende wonan'de gooŋɗinɓe ɓen.

⁷⁸Pellet, Joomi maaɗa O ñaawirat hakkunde maɓɓe Ñaawoore makko ngal, ko Kaŋko woni Tedduɗo gannduɗo.

⁷⁹Wakkilo e Alla, pellet, an haɗa e hoore Goonga ɓannguka ka.

⁸⁰Pellet, an a nanintaa maayɓe ɓen, a nanintaa fa'aɗuɓe ɓen noddaandu ndun si ɓe ɗuurnike ɓe nduŋitii.

⁸¹An a wonaani peewnoowo wumɓe ɓen e ga majjere maɓɓe nde. A nanintaa si wonaa ɓen gooŋɗinɓe Aayeeje Amen ɗen hara kamɓe ko ɓe jebbiliiɓe.

⁸²Si konngol ngol yanii e dow maɓɓe, Min yaltinana ɓe daabewa immorde ka leydi himba kaalana ɓe won'nde yimɓe ɓen laatike ɓe yananaaka aayeeje Amen ɗen.

⁸³E ñande Min mooɓoyta immorde e kala mofte dental jeyaaɓe e ɓen yennooɓe Aayeeje Amen ɗen hara kamɓe heɓe coggee.

⁸⁴Haa si ɓe ngarii, O Daala: "Eyoo, on yenniino Aayeeje Am ɗen, hara on huɓindoraali ɗi ganndal. Kaa ko holɗum wonɗon e gollude?"

⁸⁵Konngol [Lepte] ngol yani e maɓɓe sabu ko ɓe tooñi ko, kamɓe ɓe kaalataa.

⁸⁶Enee, hara ɓe yiaani, Minen Min mbaɗii jemma on fii yo ɓe deeƴu e maako, e ñalawma on nji'irɗo? Pellet, wonii e ɗum Aayeeje wonan'de yimɓe gooŋɗinooɓe ɓen.

⁸⁷E Ñande wuttoytee ka alaadu, ɗenƴoo ɓen wonɓe ka kammuuli e ɓen wonɓe ka leydi, si wonaa ɓen ɓe Alla muuyi, gooto kala e maɓɓe aray e makko hara ko ɓe hoykiniiɓe.

⁸⁸Haɗa tina pelle ɗen, cikka ko ɗe fenndiiɗe, hara le kannje heɗe wuloo wulagol duule ɗen, ɗuum ko kuugal Alla, On ŋarɗinɗo kala hu'unde, pellet, Kaŋko ko O kumpitiiɗo ko ngolloton kon.

⁸⁹Mo ardii e moƴƴere nden haray no woodani mo ko ɓuri nde moƴƴude, hara kamɓe ko ɓe hooliiɓe immorde e ɗenƴere nden Ñande.

⁹⁰Mo ardii kadi e bone ɗen, j'eece maɓɓe ɗen kippete ka Yiite. Yalli on yoɓete si wonaa kon ko laatinoɗon hoɗon ngolla?

⁹¹Anndu ko mi yamiraa ko yo mi rewJooma ndii leydi ndi Alla harmini ɗum, no woodani mo kala hu'unde. Mi yamiraama kadi yo mi laato jiyaaɗo e jebbiliiɓe ɓeen.

⁹²E yo mi janngu Alqur'aanaare ndeen, mo feewii ko hoore-makko o feewani, mo majjii kadi maaku: "Min dey, ko mi jiyaaɗo e jeertinooɓe ɓeen.

⁹³Maaku kadi: "jettooje nden ngoodanii Alla, aray O holla on Aayeeje makko ɗeen ngaanndon ɗe". Joomi maaɗa wonaani belsindiiɗo ga e kon ko ngolloton.