At-Takwir

¹Sε yεbobͻ awia ma ne nhyerεne no firi hͻ na εyε tumm a,

²Na sε Nsoromma tete hwe,

³Na sε mmepͻ tutu fri hͻ,

⁴Na sε yεto yoma bedeε a ͻnyem abosome du asaworam,

⁵Na yεboa nkeka-boaa ano wͻ faako ,

⁶Na sε ogya tͻ po mu na ehuru, anaasε eyiri ma no kabom yε ͻpo baako,

⁷Na sε yεka akra ne (honam) bͻ mu,

⁸Na yɛbisa abaayaa (akokoaa) a, yɛasie no animono so sε:

⁹“Ɛdeεn bͻne na ͻyεeε a yɛkum no?”,

¹⁰Na sε yɛbue (obiara adwuma a, odiiε ho) Nwoma no mu,

¹¹Na sε ͻsoro nkatanimu no yi na efiri ne tebea hͻ,

¹²Na yεsͻ Amanehunu gya no ano,

¹³Na yεde ͻsoro Aheman no bεn (agyidiefoͻ no) a,

¹⁴(Ɛhͻ na) ͻkra biara bɛhunu (dwuma pa anaasε dwuma bͻne a) ͻde aba.

¹⁵Mede Nsoromma a,

¹⁶Epue na εnante kͻtͻ,

¹⁷Ne anadwo, sε εde ne sum no ba (bεkata biribiara so),

¹⁸Ne ahomakye, εberε a εbεhome ayi ne nhyerεnee no adie no di nse sε:

¹⁹Nokorε, (Qur’aan) yε Ɔbͻfoͻ Nimuonyamfoͻ no asεm (a, Nyankopͻn de asomaa no).

²⁰(Ɔbͻfoͻ Gabriel) a ͻwͻ Tumi ne diberε wͻ Animuoyam Hene no anim no,

²¹(Gabriel) a (Abofoͻ) yε sotie ma no, Nokwafoͻ no.

²²Enti mo yͻnko (Muhammad) mmͻͻ dam;

²³Ԑyε ampa sε, ohunuu (Gabriel) pefee wͻ wiem.

²⁴(Muhammad) nyε obi a ͻde Asumade no sie, bͻ ho ayεmuͻnyono.

²⁵(Qur’aan) nyε ͻbonsam a yabͻ no dua no asεm.

²⁶Na afei εhen na morekͻ yi?

²⁷Nokorε sε (Qur’aan) yε afutusεm ma amansan nyinaa,

²⁸(Titiriw) de ma mo mu obi a ͻpε sε onya kwankyerε.

²⁹Na εnnyε sεdeε mopε, na mmom sεdeε Onyankopͻn, Abͻdeε nyinaa Wura no pε (na εbεyε hͻ).