An-Nazi'at

¹Sumpa man sa mga [anghel na] nag-aalis[1] sa isang paghatak [na marahas],

²sumpa man sa mga [anghel na] humahablot[2] sa isang paghunos [malumanay],

³sumpa man sa mga [anghel na] lumalangoy sa isang paglangoy,[3]

⁴saka sa mga [anghel na] nag-uunahan sa isang pag-uunahan [sa pagtalima],

⁵saka sa mga [anghel na] nagpapatupad ng utos,

⁶sa araw na yayanig ang tagayanig,[4]

⁷at susunod dito ang kasunod [na pag-ihip sa tambuli].[5]

⁸May mga puso sa araw na iyon na kakabug-kabog.

⁹Ang mga paningin ng mga ito ay nagpapakumbaba.

¹⁰Nagsasabi sila [sa Mundo]: “Tunay bang kami ay talagang mga pababalikin sa dating kalagayan?

¹¹Kapag ba kami ay naging mga butong nabukbok?”

¹²Magsasabi sila: “Iyon samakatuwid ay isang pagbalik na lugi.”

¹³Ngunit ito[6] ay nag-iisang bulyaw lamang,

¹⁴saka biglang sila ay [buhay] sa balat ng lupa.

¹⁵Nakarating kaya sa iyo ang sanaysay kay Moises?

¹⁶Noong nanawagan sa kanya ang Panginoon niya sa pinabanal na lambak ng Ṭuwā:

¹⁷“Pumunta ka kay Paraon – tunay na siya ay nagmalabis –

¹⁸saka magsabi ka: Ukol kaya sa iyo na magpakabusilak ka

¹⁹at magpatnubay ako sa iyo tungo sa Panginoon mo para matakot ka [sa Kanya]?”

²⁰Kaya ipinakita niya[7] rito ang tandang pinakamalaki[8] [na himala ng tungkod at puting kamay],

²¹ngunit nagpasinungaling ito[9] at sumuway ito.

²²Pagkatapos tumalikod ito na nagpupunyagi [laban kay Moises].

²³Kaya kumalap ito [ng mga kawal] saka nanawagan

²⁴saka nagsabi: “Ako ay ang panginoon ninyong pinakamataas.”

²⁵Kaya nagpataw rito si Allāh ng parusang panghalimbawa[10] sa Kabilang-buhay at Unang-buhay.

²⁶Tunay na sa gayon ay talagang may maisasaalang-alang para sa sinumang natatakot [kay Allāh].

²⁷Kayo ba ay higit na matindi sa pagkakalikha o ang langit, na ipinatayo Niya?

²⁸Nag-angat Siya ng tuktok nito at humubog Siya nito.

²⁹Nagpakulimlim Siya ng gabi nito at nagpalabas Siya ng kaliwanagan nito.

³⁰Sa lupa, matapos niyon, ay naglagak Siya nito.

³¹Nagpalabas Siya mula rito ng tubig nito at pastulan nito.

³²Sa mga bundok ay nag-angkla,

³³bilang natatamasa para sa inyo at para sa mga hayupan ninyo.

³⁴Ngunit kapag dumating ang Tagapag-umapaw na Pinakamalaki –

³⁵sa Araw na magsasaalaala ang tao sa pinagpunyagian niya [na mabuti o masama]

³⁶at itatanghal ang Impiyerno para sa sinumang makakikita –

³⁷hinggil sa sinumang nagmalabis

³⁸at nagtangi sa buhay na pangmundo,

³⁹tunay na ang Impiyerno ay ang kanlungan;

⁴⁰hinggil sa sinumang nangamba sa pagtayo sa [harap ng] Panginoon niya at sumaway sa sarili laban sa pithaya,

⁴¹tunay na ang Paraiso ay ang kanlungan.

⁴²Nagtatanong sila sa iyo tungkol sa Huling Sandali kung kailan ang pagdaong niyon?

⁴³Nasa ano ka para bumanggit niyon?

⁴⁴Tungo sa Panginoon mo ang pagwawakasan [ng kaalaman] niyon.

⁴⁵Ikaw ay isang tagapagbabala lamang ng sinumang natatakot doon.

⁴⁶Para bang sila, sa Araw na makikita nila iyon, ay hindi namalagi [sa Mundo] maliban sa isang hapon o isang umaga nito.