Al-Inshiqaq

¹Kur qielli të çahet,

²duke dëgjuar me bindje Zotin e vet, siç e ka për detyrë;

³kur Toka të sheshohet (nga rrënimi i maleve)

⁴dhe të flakë atë që ka brenda e të zbrazet,

⁵duke dëgjuar me bindje Zotin e vet, siç e ka për detyrë,

⁶atëherë ti, o njeri, që përpiqesh shumë, mundin tënd do ta gjesh te Zoti yt.

⁷Ai, të cilit do t’i jepet libri i tij në dorën e djathtë,

⁸do ta ketë të lehtë llogarinë

⁹dhe do të kthehet i gëzuar te të afërmit e tij.

¹⁰Kurse ai, të cilit do t’i jepet libri i tij pas shpinës,

¹¹do të lutet për të vdekur

¹²dhe në zjarr do të digjet,

¹³sepse ai jetonte i shkujdesur në familjen e tij,

¹⁴duke menduar se kurrë nuk do të kthehej (për të dhënë llogari).

¹⁵Po, Zoti i tij, sigurisht që i ka ndjekur të gjitha punët e tij!

¹⁶Betohem në kuqërrimin e muzgut,

¹⁷në natën e në gjithçka që ajo kaplon me errësirën e saj,

¹⁸si dhe në hënën e plotë,

¹⁹se ju, me siguri, do të kaloni nga e keqja te më e keqja!

²⁰Çfarë kanë ata që nuk duan të besojnë?!

²¹E përse, kur u lexohet Kurani, nuk përulen në sexhde?!

²²Përkundrazi, ata që nuk besojnë e quajnë atë gënjeshtër.

²³Por Allahu e di mirë çfarë fshehin ata,

²⁴prandaj shpallu atyre dënimin e dhembshëm (që i pret të gjithë),

²⁵përveç atyre, që besojnë dhe bëjnë vepra të mira; ata do të shpërblehen pandërprerë.