Al-Inshiqaq

¹Igihe ikirere kizasandara (ku munsi w’imperuka),

²Nuko kikumvira (itegeko rya) Nyagasani wacyo, kandi ibyo birakwiye (ko kimwumvira),

³N’igihe isi izaringanizwa,

⁴Maze igasohora ibiyirimo (abapfuye), igasigarira aho,

⁵Nuko ikumvira (itegeko rya) Nyagasani wayo, kandi ibyo birakwiye (ko imwumvira),

⁶Yewe muntu! Mu by’ukuri ukorana umuhate imirimo yawe ugana kwa Nyagasani wawe, kandi muzahura (ku munsi w’imperuka).

⁷Bityo, uzahabwa igitabo cye (cy’ibikorwa bye) mu kuboko kw’iburyo,

⁸Azabarurirwa mu buryo bworoshye,

⁹Kandi azasubira mu bantu be (umuryango we wakoze neza ku isi, ndetse n’abagore azagororerwa bo mu ijuru) yishimye!

¹⁰Naho uzahabwa igitabo cye (cy’ibikorwa bye, akacyakirira) inyuma y’umugongo,

¹¹Azisabira kurimbuka,

¹²Kandi azahira mu muriro ugurumana.

¹³Mu by’ukuri (mu buzima bwo ku isi) yabaga mu muryango we yishimye,

¹⁴Mu by’ukuri yibwiraga ko atazagaruka (kwa Nyagasani we).

¹⁵Nyamara si byo! Mu by’ukuri Nyagasani we yabaga amubona neza.

¹⁶Bityo, ndahiye igicu gitukura cy’izuba rirenga,

¹⁷N’ijoro n’ibyo ritwikira (byose),

¹⁸N’ukwezi igihe kuzuye,

¹⁹Ko rwose muzanyura mu byiciro bitandukanye (mu buzima bwa hano ku isi no ku munsi w’imperuka)

²⁰Ese babaye bate, kuki batemera?

²¹Ndetse n’iyo basomewe Qur’an ntibajya bubama.

²²Ahubwo abahakanye bahinyura (Intumwa Muhamadi n’inyigisho ze).

²³Kandi Allah azi neza ibyo bahisha (mu mitima yabo).

²⁴Bityo, bagezeho inkuru y’ibihano bibabaza.

²⁵Uretse abemeye bakanakora ibikorwa byiza, bazagororerwa ibihembo bidashira (Ijuru).