Al-Buruj

¹Ndahiye ikirere gifite inyenyeri nini nyinshi (zimurika nijoro),

²N’umunsi w’isezerano (umunsi w’imperuka),

³N’umunsi w’ubuhamya (umunsi wa Idjuma) ndetse n’umunsi w’ikoraniro (umunsi wa Arafat).

⁴Abantu bacukuriye abemeramana imyobo (yo kubatwikiramo) baravumwe,[1]

⁵Ubwo bacanaga umuriro ugurumana cyane,

⁶Ubwo babaga bawicaye impande,

⁷Kandi babaga bashungereye ibyo bakoreraga abemeramana (babatwika).

⁸Kandi nta kindi babahoraga usibye kuba baremeye Allah, Umunyacyubahiro uhebuje, Ushimwa cyane,

⁹Ufite ubwami bw’ibirere n’isi! Kandi Allah ni Umuhamya wa buri kintu.

¹⁰Mu by’ukuri abatoteje abemeramana n’abemeramanakazi (babakorera iyicarubozo), nyuma ntibicuze (kuri Allah), bazahanishwa ibihano by’umuriro wa Jahanamu, banahanishwe ibihano bitwika.

¹¹Mu by’ukuri abemeye bakanakora ibikorwa byiza, bazagororerwa ubusitani butembamo imigezi (Ijuru). Iyo ni yo ntsinzi ihebuje.

¹²Mu by’ukuri ibihano bya Nyagasani wawe (yewe Muhamadi) birakaze.

¹³Mu by’ukuri ni We waremye (ibiremwa bitari biriho) kandi ni na We uzabigarura (ku munsi w’imperuka).

¹⁴Kandi ni We Ubabarira ibyaha, Umukunzi (w’abemeramana),

¹⁵Nyiri Ar’shi[1], Nyirikuzo,

¹⁶Ukora ibyo ashaka akanabinoza.

¹⁷Ese wamenye inkuru z’ingabo?

¹⁸Za Farawo n’iz’aba Thamudu?

¹⁹Ahubwo abahakanye (bakomeje) guhinyura (ukuri).

²⁰Kandi Allah azi neza ibikorwa byabo byose (kandi azabibahanira).

²¹Ahubwo iyi ni Qur’an yubahitse,

²²(Yanditse) ku rubaho rurinzwe (Lawuhul Mahfudh).