Al-Infitar

¹Igihe ikirere kizasatagurika,

²N’igihe inyenyeri zizanyanyagira,

³N’igihe inyanja zizuzura (amazi yazo akarenga inkombe),

⁴N’igihe imva zizabirindurwa (zigakurwamo ibizirimo),

⁵(Icyo gihe) umuntu azamenya ibyo yakoze mbere n’ibyo yigijeyo ngo azabe abikora (byaba ibyiza cyangwa ibibi).

⁶Yewe muntu! N’iki cyaguteye kwirengagiza Nyagasani wawe, Nyirubutagatifu?

⁷We wakuremye akagutunganya ndetse akanaguha imiterere igukwiye?

⁸Yaragutunganyije aguha ishusho ashaka.

⁹Oya! Nyamara muhakana umunsi w’ibihembo.

¹⁰Ariko mu by’ukuri mufite ababagenzura (abamalayika babashinzwe),

¹¹Bubashywe kandi bandika (ibikorwa byanyu byiza n’ibibi),

¹²Bazi ibyo mukora byose.

¹³Mu by’ukuri abakora ibyiza bazaba mu munezero uhambaye (Ijuru);

¹⁴Naho abangizi bazaba mu muriro ugurumana,

¹⁵Bazawuhiramo ku munsi w’ibihembo,

¹⁶Kandi ntibazigera bawuvamo.

¹⁷None se ni iki kizakumenyesha umunsi w’ibihembo?

¹⁸Nanone, ni iki kizakumenyesha umunsi w’ibihembo?

¹⁹(Uzaba) ari umunsi umuntu atazagira icyo amarira undi, kandi kuri uwo munsi itegeko ryose rizaba ari irya Allah.