Al-Ma'arij

¹Usaba yasabye ko ibihano bigomba kuzabaho bisohora,

²(Nyamara ibyo bihano) nta kizabibuza kugera ku bahakanyi,

³(Bizabageraho ku munsi w’imperuka) biturutse kwa Allah, nyir’amayira azamuka (agana mu ijuru).

⁴Abamalayika ndetse na Roho (Malayika Jibrilu) bazamuka iwe (Allah) mu gihe cy’umunsi umwe ungana n’imyaka ibihumbi mirongo itanu (ya hano ku isi, abandi batari bo bakoresha muri urwo rugendo).

⁵Bityo, ihangane (yewe Muhamadi) wifashishije ukwihangana kwiza.

⁶Mu by’ukuri bo babona (imperuka) iri kure,

⁷Nyamara twe tukabona iri hafi.

⁸Umunsi ikirere kizaba nk’umushongi w’umuringa.

⁹N’imisozi ikaba nk’ubwoya (bukemurwa ku matungo bukorwamo imyambaro)

¹⁰Kandi nta nshuti izigera ibaza iby’inshuti yayo,

¹¹N’ubwo bazaba barebana (ndetse bakanamenyana, ariko nta cyo bazamarirana). Kubera ibihano by’uwo munsi, umunyabyaha azifuza gutangaho incungu abana be,

¹²Umugore we, umuvandimwe we,

¹³N’umuryango we yahungiragaho (akiri ku isi igihe ahuye n’ibimuteye ubwoba).

¹⁴Ndetse n’abari mu isi bose (azifuza kubatangaho incungu) kugira ngo arokoke.

¹⁵Ariko nta cyo bizamumarira! Ahubwo azajya mu muriro ugurumana,

¹⁶Uhubuzaho uruhu rw’agahanga,

¹⁷Uzaba uhamagara uwo ari we wese wateraga umugongo akanirengagiza (ukuri gukubiye muri Qur’an),

¹⁸Akanakusanya (umutungo) akawuhunika (ntawukoreshe mu nzira ya Allah).

¹⁹Mu by’ukuri umuntu yaremanywe ukutihangana,

²⁰Iyo ikibi kimugezeho, ariheba cyane.

²¹Naho icyiza cyamugeraho, akaba umunyabugugu cyane.

²²Uretse abakora iswala,

²³Ba bandi bahozaho iswala zabo,

²⁴Na ba bandi bagena umugabane uzwi (Zakat) mu mitungo yabo,

²⁵Wagenewe usaba n’uwiyumanganyije (nyamara akeneye ubufasha);

²⁶Na ba bandi bemera ko umunsi w’ibihembo ari ukuri,

²⁷Na ba bandi batinya ibihano bya Nyagasani wabo.

²⁸Kubera ko mu by’ukuri ibihano bya Nyagasani wabo nta n’umwe wakwizera ko bitamugeraho.

²⁹Na ba bandi barinda ubwambure bwabo (ubusambanyi),

³⁰Uretse ku bagore babo cyangwa se ku bo bafiteho ububasha (abaja). Mu by’ukuri bo ntibabigayirwa.

³¹Ariko abazashaka (kwinezeza) ku batari abo (bavuzwe), rwose abo bazaba batandukiriye.

³²Na ba bandi barinda ibyo baragijwe ndetse bakubahiriza n’amasezerano yabo.

³³Na ba bandi batanga ubuhamya bw’ukuri.

³⁴Na ba bandi bahozaho iswala zabo (ku bihe byagenwe);

³⁵Abo bazajya mu busitani (Ijuru) kandi bubashywe,

³⁶None se ni iyihe mpamvu ituma abahakanyi bakugana (yewe Muhamadi) bihuta (bashaka kukumva, kandi batakwemera)?

³⁷(Bicaye) mu matsinda iburyo n’ibumoso bwawe?

³⁸Ese buri wese muri bo ararikiye kuzinjizwa mu Ijuru ryuje ingabire?

³⁹Ntabwo ari ko bimeze! Mu by’ukuri twabaremye tubakomoye mu byo bazi[1] (ariko banga kwemera).

⁴⁰Bityo, ndahiye ku izina rya Nyagasani w’Uburasirazuba bwose n’Uburengerazuba bwose, ko rwose dushoboye,

⁴¹Kubasimbuza abeza kubarusha, kandi ntibyatunanira.

⁴²Bityo, bareke bavuge ibidafite umumaro, banikinire kugeza ubwo bazahura n’umunsi wabo basezeranyijwe.

⁴³Umunsi bazasohoka mu mva zabo bihuta, nk’uko bihutaga bagana amabuye ashinze (ibigirwamana byabo).

⁴⁴Bazaba bubitse amaso (kubera ikimwaro), batwikiriwe n’ugusuzugurika. Uwo ni wo munsi bajyaga basezeranywa.