Al-Haqqah

¹Ukuri kudakumirwa (umunsi w’izuka).

²Ukuri kudakumirwa ni iki?

³Ni iki kizakubwira ukuri kudakumirwa?

⁴Aba Thamudu n’aba Adi bahinyuye umunsi w’imperuka.

⁵Aba Thamudu borekeshejwe urusaku ndengakamere.

⁶Naho aba Adi borekeshwa umuyaga uvuza ubuhuha, usenya.

⁷(Allah) yawubateje mu gihe cy’amajoro arindwi n’amanywa umunani bikurikiranye. Wabonaga abantu ari imirambo irambaraye imeze nk’ingiga z’ibiti by’imitende (byaranduwe) birangaye (birimo ubusa mo imbere).

⁸Ese urabona hari n’umwe wasigaye muri bo?

⁹Farawo n’ababayeho mbere ye ndetse n’abo mu midugudu yabirinduwe (abantu ba Loti) bakoze ibyaha,

¹⁰Nuko bigomeka ku Ntumwa ya Nyagasani wabo, maze (Allah) abahanisha ibihano bikaze.

¹¹Mu by’ukuri ubwo amazi yarengaga inkombe (mu gihe cy’umwuzure wo ku bwa Nuhu, abamwemeye) twabatwaye mu bwato.

¹²Kugira ngo tubigire urwibutso kuri mwe ndetse n’amatwi yumva abizirikane.

¹³Ubwo impanda izavuzwa inshuro imwe (ya mbere).

¹⁴Isi n’imisozi bigaterurwa, bigahondwa inshuro imwe.

¹⁵Kuri uwo munsi, imperuka izaba igeze.

¹⁶N’ikirere kizasatagurika, maze uwo munsi kibe cyoroshye (ku buryo cyakwiyasagura).

¹⁷N’abamalayika bazaba bakizengurutse (ikirere) impande zacyo. Kandi kuri uwo munsi abamalayika umunani biyongera kuri abo bazaba bateruye Ar’shi[1] ya Nyagasani wawe.

¹⁸Uwo munsi muzahagarikwa (imbere ya Allah). Nta kintu na kimwe cyanyu kizayoberana.

¹⁹Bityo, uzahabwa igitabo cye mu kuboko kw’iburyo, azavuga (aratira abandi) agira ati “Nimuze musome igitabo cyanjye.”

²⁰Rwose njye nari nzi neza ko nzahura n’ibarura ryanjye nk’iri (kubera ibikorwa byiza nakoze).

²¹Azaba mu buzima bw’umunezero,

²²Mu busitani buhebuje,

²³Imbuto zabwo zizaba ziri bugufi (yabo).

²⁴(Bazabwirwa bati) “Nimurye munanywe kandi muryoherwe, ibyo ni ukubera ibyo mwakoze mu minsi yahise (mukiri ku isi).”

²⁵Naho uzahabwa igitabo cye mu kuboko kw’ibumoso, azavuga (yicuza n’agahinda kenshi) ati “iyaba ntari mpawe iki gitabo cyanjye!”,

²⁶Sinamenye iby’ibarura ryanjye!

²⁷Iyaba urupfu (rwanjye napfuye mva ku isi) rwari rwo rwa burundu.

²⁸Umutungo wanjye nta cyo wamariye!

²⁹N’ubutware bwanjye bwabaye imfabusa (bwancitse).

³⁰(Abarinzi b’umuriro bazabwirwa bati) “Mumufate mumubohe,

³¹Maze mumutwikire mu muriro,

³²Nyuma mumuboheshe umunyururu ufite uburebure bwa Dhira’a[1] mirongo irindwi.

³³Mu by’ukuri ntiyemeraga Allah w’ikirenga.

³⁴Nta n’ubwo yajyaga ashishikariza (abantu) kugaburira abakene.

³⁵None hano uyu munsi nta nshuti ari bugire (yamuvuganira cyangwa ngo imurinde ibihano)

³⁶Nta n’ibyo kurya (ari buhabwe) uretse amashyira (y’abantu bo mu muriro),

³⁷Nta bandi (bahabwa) ibyo biribwa uretse abanyabyaha.”

³⁸Rwose ndahiye ibyo mureba,

³⁹N’ibyo mutareba.

⁴⁰Mu by’ukuri iyi (Qur’an) ni ijambo (rya Allah risomwa) n’Intumwa yubahitse (Muhamadi).

⁴¹Ntabwo ari imvugo y’umusizi. Dore ko mwemera gake!

⁴²Nta n’ubwo ari imvugo y’umupfumu. Ariko mwibuka gake!

⁴³(Ahubwo ni igitabo) cyahishuwe giturutse kwa Nyagasani w’ibiremwa.

⁴⁴N’iyo (Muhamadi) aza kugira ibyo aduhimbira (tutavuze),

⁴⁵Twari kumufatisha imbaraga n’ukuboko kw’iburyo.

⁴⁶Maze tukamuca umutsi w’umujyana w’ibanze (uvana amaraso mu mutima uyohereza hose mu mubiri).

⁴⁷Nta n’umwe muri mwe wari kugira icyo amumarira (ngo amutabare).

⁴⁸Kandi mu by’ukuri (Qur’an) ni urwibutso ku bagandukira Allah.

⁴⁹Rwose tuzi neza ko muri mwe hari abahinyura (iyi Qur’an).

⁵⁰Kandi rwose (ku munsi w’imperuka, Qur’an) izaba amakuba ku bahakanyi.

⁵¹Kandi mu by’ukuri (Qur’an) ni ukuri kudashidikanywaho.

⁵²Bityo, tagatifuza izina rya Nyagasani wawe, Uhambaye.