At-Tur

¹Ndahiye Umusozi wa Twuur.[1]

²N’igitabo cyanditse (Qur’an),

³Ku mpapuro zikozwe mu ruhu (rusukuye) ruramburwa (kugira ngo gisomwe).

⁴N’ingoro (yo mu ijuru) ihora isurwa (n’abamalayika).

⁵N’igisenge gihanitse (ikirere).

⁶N’inyanja zibirinduye (ku munsi w’imperuka)

⁷Mu by’ukuri ibihano bya Nyagasani wawe bizabaho nta kabuza,

⁸Ntagishobora kuzabikumira.

⁹Umunsi ikirere kizatigita umutingito (ukomeye).

¹⁰N’imisozi ikagenda (nk’uko ibicu bigenda).

¹¹Kuri uwo munsi ibihano bikomeye bizaba ku bahinyuye (ukuri),

¹²Ba bandi bahugira mu kwishimisha mu biganiro byuzuye ibinyoma, bidafite akamaro.

¹³Umunsi bazasunikirwa mu muriro wa Jahanamu ku ngufu.

¹⁴(Bazabwirwa bati) “Uyu ni wo muriro mwajyaga muhinyura.”

¹⁵Ese ibi (bihano mubona) ni uburozi cyangwa ntimubona?

¹⁶Ngaho nimuhiremo, kandi mwabyihanganira cyangwa mutabyihanganira, byose ni kimwe kuri mwe. Mu by’ukuri (ibyo muri kubona) ni ibihembo by’ibyo mwakoraga.

¹⁷Mu by’ukuri abagandukira (Allah) bazaba bari mu busitani n’inema (bihoraho).

¹⁸Binezeza mu byo Nyagasani wabo yabahaye, ndetse no kuba Nyagasani wabo yabarinze ibihano by’umuriro.

¹⁹(Bazabwirwa bati) “Nimurye munanywe kandi mugubwe neza kubera ibyo mwajyaga mukora.”

²⁰Bazaba begamye ku bitanda bitondetse ku murongo. Tuzanabashyingira Huur ul-a’in (abagore bo mu Ijuru b’igikundiro, b’amaso manini).

²¹Naho ba bandi bemeye maze ababakomokaho bakabakurikira mu kwemera, tuzabahuza n’ababakomotseho (mu ijuru), kandi nta cyo tuzigera tugabanya mu bikorwa byabo. Buri muntu azabazwa ibyo yakoze.

²²Tuzabaha imbuto n’inyama (by’amoko yose) bazajya bifuza.

²³Bazajya bahererekanyamo ibirahure by’ikinyobwa kitazabatera kuvuga amagambo adafite akamaro cyangwa ngo kibatere gukora ibyaha.

²⁴Bazaba bazengurukwamo n’abahungu b’abahereza babo, bameze nk’inigi zishashagirana (Lu’ulu’u) zikiri mu bubiko bwazo.

²⁵Bamwe muri bo bazajya bahindukira barebe bagenzi babo, babazanya,

²⁶Bavuga bati “Mbere (ku isi) twabaga turi mu miryango yacu dufite ubwoba n’impungenge (z’ibihano bya Allah)”,

²⁷“None Allah yatugororeye, aturinda ibihano by’umuriro utwika.”

²⁸Mu by’ukuri mbere twajyaga tumusenga (wenyine). Rwose ni We Mugiraneza, Nyirimbabazi.

²⁹Bityo, (yewe Muhamadi) komeza wibutse! Mu by’ukuri ku bw’ingabire za Nyagasani wawe (zo kuba warahawe ubutumwa), ntabwo uri umupfumu cyangwa umusazi (nk’uko babivuga).

³⁰Ahubwo (abahakanyi) baravuga bati “(Muhamadi) ni umusizi, reka tumutege iminsi (azapfe nk’uko abandi basizi bapfuye)!”

³¹Babwire uti “Ngaho nimutegereze, mu by’ukuri ndi kumwe namwe mu bategereje.”

³²Cyangwa imitekerereze yabo ni yo ibategeka (kuvuga) ibyo? Cyangwa ahubwo ni abantu barengera (imbibi za Allah)?

³³Ndetse bavuga ko (Qur’an) yayihimbiye? (Oya), ahubwo ntibemera!

³⁴Ngaho nibazane inkuru zimeze nk’iziyivugwamo (Qur’an), niba koko ari abanyakuri.

³⁵Ese (bibwira ko) baremwe nta cyo bakomowemo, cyangwa ni bo baremyi?

³⁶Cyangwa bibwira ko baremye ibirere n’isi? Ahubwo ntibizera!

³⁷Cyangwa bibwira ko bafite ibigega bya Nyagasani wawe? Cyangwa ni bo bagenga (b’isi, bakora ibyo bashaka)?

³⁸Cyangwa bibwira ko bafite urwego buririraho (bajya mu ijuru) ngo bumvirize ibivugirwayo? Ngaho umwumviriza wabo nazane ibimenyetso simusiga!

³⁹Cyangwa bibwira ko (Allah) afite abakobwa, mwe mukagira abahungu?

⁴⁰Cyangwa bibwira ko (wowe Muhamadi) ubasaba igihembo, none bakaba baremererwa n’ubwishyu?

⁴¹Cyangwa bibwira ko bazi ibyihishe, bakaba babyandika (badakeneye ibyo ubabwira)?

⁴²Cyangwa icyo bashaka ni ubugambanyi? Nyamara abahakanye ni bo bazahanirwa ubugambanyi bwabo.

⁴³Cyangwa bafite indi mana itari Allah? Ubutagatifu ni ubwa Allah kandi nta ho ahuriye n’ibyo bamubangikanya na byo.

⁴⁴N’iyo baza kubona igice cy’ikirere kigwa hasi, bari kuvuga bati “Ni igicu gicucitse!”

⁴⁵Bareke kugeza ubwo bazahura n’umunsi wabo, aho bazagwa igihumure bagapfa (kubera ibihano).

⁴⁶Umunsi imigambi mibisha yabo itazagira icyo ibamarira, ndetse nta n’ubwo bazatabarwa.

⁴⁷Kandi mu by’ukuri abakora ibibi bazahanishwa ibindi bihano (ku isi) mbere y’ibyo (ku munsi w’imperuka); ariko abenshi muri bo ntibabizi.

⁴⁸Bityo (yewe Muhamadi), ihanganire itegeko rya Nyagasani wawe, kuko mu by’ukuri tuguhanzeho amaso. Ndetse unasingize ikuzo rya Nyagasani wawe igihe ubyutse (ugiye gusali),

⁴⁹No mu ijoro ujye umusingiza, ndetse n’igihe urumuri rw’inyenyeri ruba rugenda rukendera.