Al-Layl

¹Jewe Allah, Ndarahiye kw’ijoro iyo ripfutse ibintu vyose kw’isi!

²No ku murango iyo hakeye, hakabona!

³No kw’irema ry’igitsina-gabo n’igitsina-gore!

⁴Bantu! Mu vy’ukuri ibikorwa vyanyu biri kwinshi; muri mwebwe harimwo uwukorera isi, hakabamwo n’uwukorera ubuzima bw’inyuma yo gupfa.

⁵Uwo wese rero azotanga atiziganya mu matungo yiwe ku bw’Imana Allah, akanagamburuka;

⁶Akanemera ijambo “LAA ILAAHA ILLA LLAAH[1]”, ivyo ryigisha, ivyo risaba n’indishi zaryo;

⁷Uyo rero Twebwe Allah, Tuzomworohereza mu buzima bwo kw’isi, Tunamushoboze gukora ivyiza bimushikana mu Bwami bw’ijuru.

⁸Nayo uwuzoba ingumyi mu gutanga, ntanakenere indishi ku Mana Allah;

⁹Agahakana n’ijambo “LAA ILAAHA ILLA LLAAH”, ivyo ryigisha, ivyo risaba n’indishi zaryo;

¹⁰Uyo, Twebwe Allah Tuzomworohereza gukora ibimushikana ku magorwa yo mu muriro udahera;

¹¹Amatungo yiwe, nta n’ico azomumarira igihe yahanantukiye mu muriro udahera.

¹²Mu vy’ukuri Twebwe Allah, Tujejwe kwerekana inzira igororotse iganisha mu Bwami bw’ijuru.

¹³Kandi mu vy’ukuri, ni Twe Tugaba Tukaganza ubuzima bw’inyuma yo gupfa n’ubwo kw’isi.

¹⁴Ni na co gituma Ndababuriye - bantu - Ndanabatinyisha n’ibihano vyo mu muriro ururumba.

¹⁵Nta wuwinjiramwo ubutavayo atari uwimonogoje mu bugarariji;

¹⁶Uwuhakana Umuvugishwamana Muhamadi (nyakugira amahoro n’impuhwe z’Imana Allah), agaheza akagenza umugongo yirengagiza ukwemera Imana Allah n’Intumwa yayo.

¹⁷Hazokwegezwa kure y’uwo muriro, uwugamburukira Imana Allah bikwiye;

¹⁸Uwutanga amatungo yiwe ku bw’Imana Allah, arondera kubandanya yiyeza;

¹⁹Kandi nta n’umwe agirira ineza mu ntumbero yo gusubirizwa mu ndumane;

²⁰Ariko agira ineza arondera gushimwa n’Imana yiwe Rurema Allah, Nyenicubahiro-ntangere.

²¹Kandi nta kibuza ko azoshima impera n’inema zayo mu Bwami bw’ijuru.