Al-Mutaffifin

¹Uguhanwa nya guhanwa, ni ukw’abazirika umunzani n’abadakwiza ingero (igipimo);

²Abitwararika gukwirizwa ku munzani n’ingero mu gihe bapimiwe n’abandi bantu.

³Iyo naho bapimiye abandi bantu ku ngero canke ku munzani, ntibakwiza urugero.

⁴Mbega, ntibazi ko bazozurwa bakanahemberwa ivyo bakoze!

⁵Ku musi w’intureka zihambaye.

⁶Umusi abantu bose bazohagarara imbere y’Imana yabo Rurema Allah, Umubungabunzi w’ibiremwa vyose, kugira Ibahembere ivyo bakoze vyose.

⁷Nibateshwe bate, barahumba! Mu vy’ukuri, ubushikiro bw’inkozi z’ikibi ni mu kaga “Sijjiini”.

⁸Mbega, ni igiki cokumenyesha akaga “Sijjiini” ico ari co?

⁹Ni ibihano bibabaza vy’akataraboneka bategekanirijwe, vyanditswe mu buryo ata kwihenda kurimwo.

¹⁰Uguhanwa nya guhanwa, ni ukw’abahakanyi;

¹¹Bahakana bivuye inyuma ko hari umusi w’impera.

¹²Nta wuhakana uwo musi atari uwimonogoje mu buhakanyi, umunyavyaha ruhebwa;

¹³Iyo asomewe Aayah zacu za Qo’rani, aca avuga ati: “Ivyo, ni imigani n'ibitito vy’ab'aho hambere”.

¹⁴Nibateshwe bate, barahumba! Ahubwo ni amajambo y’Imana Allah Yahishuriye Intumwa yayo. Bananiwe kwemera Qor’ani, kuko imitima yabo yaguye ingese, itewe n’ibicumuro bakoze.

¹⁵Nibateshwe bate, barahumba! Ahubwo mu vy’ukuri, abahakanyi kuri uwo musi w’izuka, bazobuzwa kubona Imana yabo Rurema Allah[1];

¹⁶Hanyuma binjire mu muriro ururumba, bawote;

¹⁷Hanyuma babwirwe n’abamalayika bawucungereye bati: “Ibi, ni vya bihano mwahora muhakana mwivuye inyuma”.

¹⁸Emwe! Nibateshwe bate barahumba! Mu vy’ukuri, ivyanditswe ku beranda biri ku rwego ruhanitse “Illiyyiina” mu Bwami bw’ijuru.

¹⁹Mbega, ni igiki cokumenyesha urwego ruhanitse “Illiyyiina” ico ari co!

²⁰Ni ivyagenewe aberanda, vyanditswe mu buryo ata kwihenda kurimwo;

²¹Bibonwa n’abamalayika b’abishikira.

²²Mu vy’ukuri aberanda, bazoba bari mu nema z’Ubwami bw’ijuru;

²³Bicaye ku bitanda bisharije vy'iteka biteye igomwe, baraba Imana yabo Allah hamwe n’ingabirano n’ivyiza bahawe;

²⁴Uzobona basayangana mu maso kubera akamwemwe ku kandi gatewe n’inema z’Imana Allah;

²⁵Bazoherezwa inzoga zitaboreza, zipfundikiye neza zitwararitswe.

²⁶Uwuhejeje kunywa kuri nya nzoga, mu kanwa hasigara akamoto ka “Miski”. Mu gutsindira izo nema rero, nibarushanwe abarushanwa.

²⁷Iyo nzoga yengeshejwe amazi ya “Tasniim”;

²⁸Ni iriba, abatoni b’Imana Allah bazonywako.

²⁹Mu vy’ukuri abahakanye Imana Allah, bahora batwenga abemeramana bakiri kw’isi;

³⁰Mu gihe babarenganye, bavunanira urugohe ku gasuzuguro;

³¹Mu gihe naho batashe mu miryango yabo, bagataha baryohewe batera inkuru z’ukuntu basuzuguye abemeramana;

³²Iyo naho babonye ingendanyi zamaze kwemera Intumwa Muhamadi (nyakugira amahoro n’impuhwe z’Imana Allah), bavuga bati: “Mu vy’ukuri, abo ni bo bahuvye, bari mu muzimiza”.

³³Kanatsinda, ntibatumwe kugira ngo bazicungere.

³⁴Uno musi w’izuka rero, abemeye Imana Allah n’Intumwa yayo bakubahiriza n’amabwirizwa yayo, baratwenga abagararije basuzuguritse mu bihano;

³⁵Abemeramana bazoba bicaye ku bitanda vy'iteka bisharije biteye igomwe, baraba Imana yabo Allah hamwe n’ingabirano n’ivyiza bahawe;

³⁶Bazovuga bati: “Mbega yemwe! Abagarariji boba bahembewe ivyo bari barakoze kw’isi?”.