Al-Inshiqaq

¹Igihe ijuru ryasadutse rigatabuka ku musi w’umuhero w’isi;

²Rikumvira Imana yaryo Rurema Allah, kandi ritegerezwa nta kibuza;

³Igihe n’isi yasanjwe;

⁴Igasohora abantu n’ubutare biri muri yo, igasigara igaragara;

⁵Ikumvira Imana yayo Rurema Allah, kandi itegerezwa nta kibuza.

⁶Ewe muntu! Mu vy’ukuri wewe, ugana ku Mana Allah, ukita ku rutare mu bikorwa, vyaba vyiza canke bibi, kugeza aho uzohura n’Imana yawe Rurema Allah Ikabiguhembera.

⁷Uwo wese rero azohabwa igitabu c’ibikorwa vyiwe mu kuboko kwiwe kw’iburyo;

⁸Uyo, ni we azoharurirwa ibiharuro vyoroshe;

⁹Maze agasubira mu bantu biwe mu Bwami bw’ijuru akanyamuneza kamusya.

¹⁰Nayo uwuzohabwa igitabu c’ibikorwa vyiwe inyuma y’umugongo wiwe;

¹¹Uyo rero, azoheza yisabire urupfu;

¹²Yinjire no mu muriro wama wegenyejwe;

¹³Kuko mu vy’ukuri, yahorana akanyamuneza mu muryango wiwe akiri kw’isi, nta co yategekanirije uyu musi.

¹⁴Mu vy’ukuri, yibaza ko atazosubira ku Mana yiwe Allah ngo Imuharurire.

¹⁵Yobuzwa n’iki gusubira ku Mana Allah! Mu vy’ukuri Imana yiwe Rurema Allah, Yamye ari Nyenukubona, Yaramubona we n’ivyo yakora.

¹⁶Jewe Allah, Ndarahiye ku bicu bitukura bugorovye!

¹⁷No kw’ijoro n’ivyo rinyegeje!

¹⁸No ku kwezi iyo gukwijije umuco mu mfato!

¹⁹Bantu! Ni ukuri muzohura n’ibihe bigoye bisumbasumbana[726].

²⁰Mbega, abantu babuzwa n’iki kwemera Imana Allah n’umusi w’iherezo, kandi basomerwa Aayah za Qor’ani zitomoye!

²¹N’iyo basomewe Qor’ani, ntibubamira Imana Allah ngo bemere amabwirizwa yayo.

²²Ahubwo abagararije bahakana Qor’ani bivuye inyuma, izuka n’iharurirwa ry’ibiremwa.

²³Burya Imana Allah, ni Yo Izi neza ivyo bahishije mu mishaha yabo.

²⁴Ntumwa y’Imana! Bashikirize rero inkuru y'incamugongo yo guhabwa ibihano bibabaza.

²⁵Ariko abantu bemeye Imana Allah n’Intumwa yayo bakanakora n'ivyiza bitegetswe, barafise impembo idahera bagenewe mu buzima bw’inyuma yo gupfa.