At-Tur

¹M wẽen ne Tʋʋre (yaa tãng yʋʋre).

²La ne gaf sẽn maneg n gʋlse.

³N be bũn-gʋlsdg pʋg n yadge!

⁴La ne Roogã Mɑlεk-rãmbã sẽn gũm-ɑ sɑɑsẽ wã, tɩ yɑɑ Wẽnd tũudum.

⁵Lɑ M wẽen ne Sɑɑgã sẽn zẽkã n yɑɑ beengã.

⁶Lɑ ne mogrã sẽn dems ne koomɑ.

⁷Ad fo Soabã namsgã na n yɩɩme.

⁸A pa tar tusd ye.

⁹Raar ning saagã sẽn na n leng n dãmb rãmbg tεkẽ

¹⁰Tɩ tãmsã na n kẽn ne kẽna.

¹¹Rẽn Wɩɩbd be ra-kãng raarã ne yagsdbã.

¹²Neb nins sẽn be-b faoob pʋgẽ n wɩsdã.

¹³Raar ning b sẽn tusd-b n tʋgd Gεhannam bugmẽ wã ne pãnga.

¹⁴Yãoondã la Bugum ning yãmb sẽn da yɩ n yagsdẽ wã.

¹⁵Yaa tɩɩm la woto bɩ, bɩ yãmb pa ne-ɑ?

¹⁶Kẽ-y-yã-a. Y maanda sugri, y pa maand sugri, fãa yaa yembr yãmb zugu. Ad b sẽn rol yãmbã yaa y sẽn da tʋmdɑ keoore.

¹⁷Ad wẽn-zoεtbã bee Arzãn-dãmb pʋgẽ la neema.

¹⁸N wʋmd noog ne bũmb ning b Soabã sẽn kõ-ba, la b Soabã gũ-b ne Gεhɩɩm Bugmã.

¹⁹Rɩ-y la y yũ; yaa beelg ne yãmb sẽn da yɩ n tʋmdẽ wã.

²⁰Bãmb yaa sẽn kɩll gãas sẽn tedg zugu, la b loe b fur ne Hʋʋr-aeen-rãmba.

²¹La neb nins sẽn kõ sɩda, tɩ b koambã me pʋg-b ne Liimaoongo, b paamsda bãmb ne b koambã. Tõnd pa mongd b tʋʋmẽ wã baa fʋɩ, ned fãa yaa sẽn gãneg ne a sẽn tʋm bũmb ningã wã.

²²La D paas-b tɩ-biis la nemd b sẽn maan nonglem.

²³B tata taab a pʋgẽ ko-teese, gom-zaal pa be a pʋgẽ, beegr yell me pa be a pʋgẽ.

²⁴La gilgda b zugu, koamb-bãɑngo tɩ yɑɑ bãmb sõgneg yĩngɑ, b yaa wa Lʋʋlʋʋ(koom n sãnem) sẽn solge n be ɑ wʋʋgẽ.

²⁵Tɩ b sãnda togl sãnda n sogsd taaba.

²⁶N yetẽ: "ad tõnd ra yɩɩme n be d nebẽ wã n yaeesdẽ, wãndã taoore.

²⁷Tɩ Wẽnd maan tõnd neema la A gũ tõnd n yi Samuum naongã (naon-zẽndga).

²⁸Tõnd da yɩɩme n pĩnd n kot-A. Ad Yẽnda, Yẽ la manegda, Yẽ la Yoalsda.

²⁹Bɩ f tẽege; ne f Soabã neema, (Alkʋrãɑnɑ), tɩ fo pa yɩ ne neemã wã sɑbɑbo n yaa bag-bʋgd ye, f pa gãeeng me.

³⁰Bɩ b yetame tɩ yaa yɩɩl-yɩɩnda tɩ d koalld-a ne zamaan yel-soald ɑ kũum wɑ rɩkɑ, tɩ d pɑɑm d mengɑ.

³¹Yeele: koll-y-yã-a, tɩ ad ma me lagma yãmb n yaa koallda.

³²Bɩ bãmb yam rãmbã n sagend-b ne woto, bɩ bãmb yaa neb sẽn yaa kεdgba?

³³Bɩ b yetame: "a pasa zĩri?". Pa woto ye! B pa kõt sɩd ye.

³⁴Bɩ b wa ne gomd sẽn wõnd-a tɩ b sã n yaa sɩd rãmba.

³⁵Bɩ b naana bãmb ne zaalem, bɩ yaa bãmb la naandbã?

³⁶Bɩ bãmb n naan saasã la Tẽngã? Pa woto ye! B pa bãng n wãag ye.

³⁷Bɩ fo Soabã sãnem baoã bee bãmb nengẽ, bɩ yaa bãmb la windbã.

³⁸Bɩ bãmb tara raodg n kεlgd a pʋgẽ, bɩ b kelgdã wa ne tagmas sẽn yaa vẽenega.

³⁹Bɩ Yẽ n tar kom-pugli tɩ yãmb n tar kom-ribli?

⁴⁰Bɩ fo sokd-b-la keoore, tɩ bãmb be samd pʋgẽ tɩ zɩsg b zugu?

⁴¹Bɩ bãmb tara sẽn solge, tɩ bãmb gʋlsdẽ?

⁴²Bɩ yaa rabs-wẽng la b rata? Rẽnd neb nins sẽn kɩfl-bã, bãmb bɑl la b sẽn rabs rab-wẽnga.

⁴³Bɩ bãmb tara soab sẽn pa Wẽnde? Wẽnd yɩlgame n yi bũmb ning bãmb sẽn maan lagem-n-taarã.

⁴⁴La b sã n yã gɩrg sẽn yi saasẽ wã n yaa sẽn lʋɩtẽ la b sẽn yete: "yaa sawat gũmdi".

⁴⁵Bɩ f bas-b hal tɩ b wa sεg b raar ning b sẽn na n gõgsd a pʋgẽ (tɩ yaa wala saag n wẽ-ba).

⁴⁶Raar ning bãmb rabrã sẽn ka nafd-b n yi ba fʋɩ; bãmb me, b pa na n sõng-ba.

⁴⁷La be ne sẽn wẽgd-bã, naong sẽn pa rẽnda; la ad b wʋsg fãa pa mi ye.

⁴⁸La f maan sugr ne fo Soabã bʋʋdã, tɩ fo bee Tõnd nenem pʋga. La f yɩlg ne fo Soabã pẽgr wakat ning fo sẽn wat n yiki.

⁴⁹La yʋngã, bɩ f yɩlg-A, la ãdsã kõom wakato.