An-Nazi'at

¹Mianiana Aho amin'ireo anjely izay manongotra amin-kery ny aina,

²sy amin'ireo anjely izay manala malefaka ny aina;

³amin'ireo anjely mpivezivezy mpamita iraka,

⁴amin'ireo anjely izay mitari-dalana ireo fanahin'ireo mpino,

⁵ary mandrindra ny zava-drehetra,

⁶amin'ny andro izay hisian'ny horohoro nohon'ny fidoboky ny anjomara voalohany,

⁷hanaraka izany koa ny fidoboky ny anjomara faharoa,

⁸amin'izay andro izay dia ho feno tebiteby ny fo,

⁹ary ny fijerin'izy ireo dia hitanondrika,

¹⁰Hiteny izy ireo hoe: "Ahoana no hiverenantsika ho toy ny teo aloha indray?";

¹¹" Raha toa isika ka ho taolana sy ho vovoka feno fahalovana? "

¹²hilaza izy ireo hoe: " Dia ho fiverenana hamono antoka izany "

¹³Aza mangataka ny hanalavitra fa tsy hisy afa-tsy antso tokana ihany izany.

¹⁴Ary dia indro izy ireo ho eo ambonin'ny tanim-pitsarana

¹⁵Moa ve tonga taminao ny tantaran'i Moosa?

¹⁶Tamin'ny niantsoan'ny Tompony azy tao an-dohasaha masin'i To'a?

¹⁷Mandehana ianao any amin'ny Farao, fa raha ny tena marina dia efa mpikomy izy.

¹⁸Ary lazao azy hoe: " Manana faniriana hanadio tena ve ianao?

¹⁹Ka hotarihiko ho amin'ny fanompoana ny tomponao mba hanampahatahorana Azy ?

²⁰Ary dia nasehony azy ny famantarana lehibe.

²¹Nihevitra izany ho lainga anefa izy ka dia tsy nankato,

²²Fa nihodina nanda ny finoana izy ireo ary lasa faingana nanao ny faharatsiana

²³Dia namory ireo olony izy ary nanao fanambarana.

²⁴ka nilaza hoe: " Izaho no tomponareo, ilay avo indrindra."

²⁵Nohon'izany dia nampiharin'I Allah taminy ny sazy teto an-tany ary homeny koa ny any an-koatra,

²⁶Izany toe-javatra izany dia fampieritreretana lehibe tokoa ho an'izay manana fahatahorana an'I Allah.

²⁷Moa ve ny fahariana anareo dia nanao sarotra tokoa nohon'ny nahariana ny lanitra izay naoriny.

²⁸Nataony ho ambony toerana ary vita mitovy tantana,

²⁹Nataony ho maizina ny alina ary nohazavany ny androny,

³⁰Ary ny tany kosa taorian'izany dia nataony midadasika,

³¹ka avy taminy no namoahany ny rano sy ny kijana firaofanan'ny biby.

³²Ary ireo tendrombohitra dia nataony andry iankinany;

³³Mba hahasoa anareo sy ireo biby fiompinareo,

³⁴rehefa ho tonga ny fikorontanana lehibe,

³⁵amin'ny andro izay hahatsiarovan'ny olombelona ny asa rehetra nataony,

³⁶dia hibaribary amin'izay mijery ny Afo be,

³⁷Fa izay nikomy tsy nankato an'I Allah kosa

³⁸sy nifidy ny fiainana eto ambonin'ny tany,

³⁹dia ny Afo be no hitoeran'izy ireo,

⁴⁰Ary ho an'izay natahotra ny fihaonan'izy ireo eo anoloan'ny Tompony sy nitandrina ny tenany tamin'ny filan-dratsin'ny nofo kosa;

⁴¹dia ny paradisa no ho fonenan'izy ireo,

⁴²Hanontany anao ny amin'ny andro farany izy ireo hoe: "Rahoviana anga no ahatongavan'izany? "

⁴³Amin'ny fomba ahoana no hilazanao izany amin'izy ireo?

⁴⁴any amin'ny Tomponao ny fahalalana izany.

⁴⁵Satria ianao dia mpampitandrina ihany an'izay manana fahatahorana an'izany,

⁴⁶Amin'ny andro izay hahitan'izy ireo ny andro farany dia tahaka ny tsy nonina tety an-tany afa-tsy indray maraina na indray hariva fotsiny izy ireo,