Al-Buruj

¹Inã rantsuwa da sama mai taurãrin lissafin shekara.

²Da yinin da aka yi alkawarin zuwansa,[1]

³Da yini mai shaidu, da yini da ake halarta[1] a cikinsa

⁴An la'ani mutãnen rãmi.[1]

⁵Wato wuta wadda aka hura.

⁶A lõkacin da suke a kan (gefen) ta a zazzaune.

⁷Alhãli sũ, bisa ga abin da suke aikatãwa ga mũminai, sunã halarce.

⁸Kuma ba su tuhumce su ba, fãce kawai domin sun yi ĩmãni da Allah Mabuwãyi, wanda ake gõdewa.

⁹Wanda Yake shi ne da mulkin sammai da ƙasa, kuma Allah a kan kõme halarce Yake.

¹⁰Lalle ne waɗanda suka fitini mũminai maza da mũminai mãta, sa'an nan ba su tũba ba to, sunã da azãbar Jahannama, kuma sunã da azãbar gõbara.

¹¹Lalle ne waɗanda suka yi ĩmãni, kuma suka aikata ayyukan ƙwarai, sunã da gidãjen Aljanna, ƙoramu na gudãna daga ƙarƙashin gidãjen. Wancan abu fa shi ne rabo babba.

¹²Lalle ne damƙar Ubangijinka mai tsanani ce ƙwarai.

¹³Lalle ne Shĩ, Shi ne Mai ƙãga halitta, kuma Ya mayar da ita (bãyan mutuwa).

¹⁴Kuma Shi ne Mai gãfara, Mai bayyana sõyayya.

¹⁵Mai Al'arshi mai girma

¹⁶Mai aikatãwa ga abin da Yake nufi.

¹⁷Ko lãbãrin rundanõni yã zo maka.

¹⁸Fir'auna da samũdãwa?

¹⁹Ã'aha! waɗanda suka kãfirta sunã cikin ƙaryatãwa.

²⁰Alhãli, Allah daga bãyansu, Mai kẽwaye su ne (da sanin Sa).

²¹Ã'aha! Shi Alƙur'ãni ne mai girma.

²²A cikin Allo tsararre.