Al-Haqqah

¹Kiran gaskiya!

²Mẽne ne kiran gaskiya?

³Kuma mẽ ya sanar da kai abin da ake cẽwa kiran gaskiya?

⁴Samũdãwa da Ãdãwa sun ƙaryatar da kiran gaskiya mai dũkar zũciya!

⁵To, amma Samũdãwa to, an halakãsu da tsãwa mai tsanani.

⁶Kuma amma Ãdãwa to, an halaka su da wata iska mai tsananin sauti wadda ta ƙẽtare haddi.

⁷(Allah) Ya hõre ta a kansu a cikin dare bakwai da yini takwas, biye da jũna, sabõda haka, kana ganin mutãne a cikinta kwance. Kamar sũ ƙirãruwan dabĩno ne, waɗanda suka fãɗi.

⁸To, kõ kanã ganin abin da ya yi saurã daga cikinsu?

⁹Kuma Fir'auna yã zo da waɗanda ke gabãninsa, da waɗannan da aka kife ƙasarsu, sabõda laifi.

¹⁰Dõmin sun sãɓã wa manzon Ubangijinsu, sabõda haka ya kãmã su da wani irin kãmu mai ƙãruwar (tsanani).

¹¹Lalle ne, Mũ, a lõkacin da ruwa ya ƙẽtare haddi, Munɗauke aaku a cikin jirgin ruwan nan.

¹²Dõmin Mu sanya shi, gare ku abin tunãwa kuma wani kunne mai kiyayewa ya kiyaye (shi).

¹³To, idan an yi bũsa a cikin ƙaho, bũsa ɗaya.

¹⁴Kuma aka ɗauki ƙasa da duwãtsu, kuma aka niƙa su niƙãwa ɗaya.

¹⁵A ran nan, mai aukuwa zã ta auku.

¹⁶Kuma sama zã ta tsãge, dõmin ita a ran nan, mai rauni ce.

¹⁷Kuma malã'iku (su bayyana) a kan sãsanninta, kuma wasu (malã'iku) takwas na ɗauke da Al'arshin Ubangijinka, a sama da su, a wannan rãnar.

¹⁸A rãnar nan zã a bijirã ku (dõmin hisãbi), bãbu wani rai, mai ɓoyewa, daga cikinku, wanda zai iya ɓõyẽwa.

¹⁹To, amma wanda aka bai wa littãfinsa a dãmansa, sai ya ce wa (makusantansa), "Ku karɓa, ku karanta littafina."

²⁰"Lalle ne ni, nã tabbata cewa ni mai haɗuwa da hisãbina ne."

²¹Sabõda haka, shi yana cikin wata rãyuwa yardadda.

²²A cikin Aljanna maɗaukakiya.

²³Nunannun 'yã'yan itãcenta makusantã ne (ga mai son ɗĩba),

²⁴(Ana ce musu) "Ku ci, kuma ku sha a cikin ni'ima, sabõda abin da kuka gabãtar a cikin kwãnukan da suka shige."

²⁵Kuma wanda aka bai wa littãfinsa ga hagunsa, sai ya ce: "Kaitona, ba a kãwo mini littãfina ba!"

²⁶"Kuma ban san abin da (ke sakamakon) hisãbina ba!"

²⁷"In dã dai ita, tã kasance mai halakã ni gabã ɗaya ce!

²⁸"Dukiyãta ba ta wadatar da ni ba!"

²⁹"Ĩkona ya ɓace mini!"

³⁰(Sai a ce wa malã'iku) "Ku kãmã shi, sa'an nan ku sanyã shi a cikin ƙuƙumi."

³¹"Sa'an nan, a cikin Jahĩm, ku ƙõna shi."

³²"Sa'an nan, acikin sarƙa, tsawonta zirã'i saba'in, sai ku sanya shi."

³³"Lalle ne, shi ya kasance ba ya yin ĩmãni da Allah, Mai girma!"

³⁴"Kuma ba ya kwaɗaitarwa ga (bãyar da) abincin matalauci!"

³⁵"Sabõda haka, a yau, a nan, bã ya da masõyi."

³⁶"Kuma bãbu wani abinci, sai daga (itãcen) gislĩn."

³⁷"Bãbu mai cin sa sai mãsu ganganci."

³⁸To, ba sai Nã yi rantsuwa da abin da kuke iya gani ba,

³⁹Da abin da bã ku iya gani.

⁴⁰Lalle ne, shi (Alƙur'ani) tabbas maganar wani manzo (Jibirilu) mai daraja ne.

⁴¹Kuma shi ba maganar wani mawãƙi ba ne. Kaɗan ƙwarai zã ku gaskata.

⁴²Kuma bã maganar bõka ba ne. Kaɗan ƙwarai zã ku iya tunãwa.

⁴³Abin saukarwã ne daga Ubangijin halitta duka.

⁴⁴Kuma dã (Muhammadu) yã faɗi wata maganã, yã jingina ta garẽ Mu.

⁴⁵Dã Mun kãma shi da dãma.

⁴⁶sa'an nan, lalle ne, dã Mun kãtse masa lakã.

⁴⁷Kuma daga cikinku bãbu wasu mãsu iya kãre (azãbar Mu) daga gare shi.

⁴⁸Kuma lalle ne shi (Alƙur'ãni) tanãtarwa ce ga mãsu taƙawa.

⁴⁹Kuma lalle, ne Mũ, wallahi Munã sane da cẽwa daga cikinku alwwai mãsu ƙaryatãwa.

⁵⁰Kuma lalle ne shi (Alƙarãni) wallahi baƙin ciki ne ga kãfirai.

⁵¹Kuma lalle, ne shi gaskiya ce ta yaƙini.

⁵²Sabõda haka, ka tsarkake sũnan Ubangjinka, mai girma.