Nuh

¹Min nulii Nuuhu haa e yimɓe makko ɓeen, won'de : "Jeertin yimɓe ma ɓen, ado lette mu'usuuɗe arde e maɓɓe".

²O maakani [ɓe] : "ehey yimɓe am, miin ko mi jeertinoowo on ɓannguɗo.

³won'de yo on ndewu Allah, kulon mo, ɗoftoɗon kam.

⁴O haforanat on bakkatuuji i mon ɗin, O neeɓna on haa e lajal taƴaangal. [Ko woni tan] lajal Allah ngal si hewtii, ngal neeɓnetaake, si tawii hoɗon nganndunoo!".

⁵O maaki : "Joomi am, miin mi noddirii yimɓe am ɓeen jehma e ñalawma,

⁶kono noddaandu am nduun ɓeydaani ɓe, si wonaa dogugol.

⁷Tuma kala kadi nde mi noddi ɓe fii no kafaranaa ɓe, ɓe mbaɗat kolli maɓɓe ɗiin ka ndeer noppi maɓɓe, ɓe buumora comci maɓɓe ɗiin, ɓe deppitoo, ɓe townitora townitaadee.

⁸Refti mi noddirii ɓe e kene.(Feeñi).

⁹Refti mi feññinani ɓe, mi suuɗanii ɓe suuɗaandee.

¹⁰Mi wi'i [ɓe] : "Imsinanee Joomi mon, tawde o siforii won'de kaforoowo.

¹¹O wurtira toɓo ngo e mon dewnindiral,

¹²O ɓeydira on jawɗe e ɓiɗɓe, o waɗana on gese, o waɗana on caatli.

¹³E ko heɓi on, on njoortaaki manngural Allah ngal,

¹⁴Jojji o tagir on taaɓe-taaɓe?

¹⁵E on nji'ataa no Allah tagiri kammuuji jeeɗiɗi tegondirɗi?

¹⁶O waɗi lewru ndun jalɓundu e majji, o waɗi na'ange ngen pitilol.

¹⁷Ko Allah fuɗniri on ka lesdi puɗnugol.

¹⁸Refti o ruttirat on e mayri, o yaltina on yaltinndee.

¹⁹Allah waɗiranii on leydi ndiin weertaandi.

²⁰fii yo on naatir e mayri laabi jaacɗi".

²¹Nuuhu maaki : "Joomi am, ɓee njeddii kam, ɓe njokkii on mo jawɗe mum e ɓiɗɓe ɓeydaani ɗum si wonaa hayrugol.

²²Ɓe pewji fehre mawnde.

²³ɓe mbi'i: "Wota on terto dey deweteeɗi mon ɗiin: wota on terto Wudda, e Suwaa'a, e Ya'uuqatha, e Nasr".

²⁴Ko pellet, ɓe majjinii ko ɗuuɗi. [Joomi] wota A ɓeydir tooñɓe ɓeen, si wonaa majjere.

²⁵Ko sagu goopi maɓɓe ɗiin ɓe njooliranoo, ɓe naatna Yiite, ɓe heɓanaano ko'e maɓɓe paabotooɗo ga Allah".

²⁶Nuuhu maaki kadi : "Joomi am, wota a accu e leydi ndin, hay keefeero dilloowo.

²⁷Ko pellet, si a accii ɓe, ɓe majjinat jiyaaɓe maa ɓen, ɓe njibinoytaako si wonaa bonnooɓe ɗuuɗuɓe jeddi.

²⁸Joomi am, kaforanam miin e jibinɓe kam ɓen, e ɓen gooŋɗinɓe naatuɓe ka suudu am, e gooŋɗinɓe worɓe ɓen e gooŋɗinɓe rewɓe ɓeen; wata A ɓeydir tooñuɓe ɓeen, si wonaa halakuyee.