Al-Inshiqaq

¹Sa dihang ang langit nagkapikas-pikas,

²Ug naminaw sa iyang Ginoo (Allāh sa bug-os nga pagtuman), nga kini kinahanglan gayud nga mahimo sa ingon.

³Ug sa diha nga ang yuta mao giinat ug palawig,

⁴Ug ginasalibay ang unsay anaa sa sulod niini ug nahimong walay sulod,

⁵Ug naminaw sa iyang Ginoo (Allāh sa bug-os nga pagtuman), nga kini kinahanglan gayud nga mahimo sa ingon.

⁶Oh tawo, sa pagkatinuod ikaw naghago ngadto sa imong Ginoo (Allah) uban sa (dako) nga pagpaningkamot, ug matagboan (ang mga resulta o sangpotanan sa inyong buhat).

⁷Unya mahitungod kaniya nga gihatagan sa iyang talaan sa iyang toong kamot,

⁸Siya pagahukman uban sa gaan ​​nga pag-ihap;

⁹Ug siya mobalik sa iyang katawhan nga malipayon.

¹⁰Ug alang kaniya nga gihatagan sa iyang talaan sa iyang likod,

¹¹Siya mosinggit alang sa (kaugalingong) kalaglagan (kamatayon),

¹²Ug siya mosulod ngadto sa nagdilaab nga Kalayo.

¹³Sa pagkatinuod, siya nagmalipayon kauban sa iyang katawhan.

¹⁴Sa pagkatinuod siya naghunahuna nga siya dili na mobalik (sa Allah).

¹⁵Apan oo, sa pagkatinuod ang iyang Ginoo (Allah) kanunay nga Nagbantay kaniya.

¹⁶Busa Ako (Dios) manumpa pinaagi sa kilumkilom sa pagsalop sa adlaw,

¹⁷Ug pinaagi sa kagabhion, ug sa unsay natigum niini sa kangitngit,

¹⁸Ug pinaagi sa bulan sa diha nga kini motakdol na,

¹⁹Nga kamo sa pagkatinuod mosulod sa usa ka kahimtang, human sa usa ka kahimtang.

²⁰Nan, unsa ba ang hinungdan nga sila wala motuo?

²¹Ug sa diha nga ang Qur’an gilitok ngadto kanila sila dili mohapa (ni mupailalom sa mga Kamandoan niini)?

²²Apan sila nga wala nagtuo (sa Allah ug sa Iyang mga Pinadayag) nagsalikway sa Kamatuoran.

²³Ug ang Allah labing nakahibalo sa unsay ilang gitagoan (sa ilang mga dughan),

²⁴Busa ipahibalo kanila ang usa ka sakit nga silot,

²⁵Gawas niadtong mituo ug nagbuhat ug matarung nga buhat. Alang kanila mao ang usa ka Ganti nga dili gayud maputol.