Al-Mutaffifin

¹Alaut ang mga limbongan (sa mga timbang ug sukod),

²Sila, nga sa dihang sila mokuha ug sukod (sa ilang mga bahin) gikan sa mga tawo, sila nagakuha niiini sa hingpit (ug hustong sukod),

³Apan sa diha nga sila mosukod o motimbang alang sa uban, sila maghatag ug mas ubos ug hinungdan sa pagkawala.

⁴Wala ba sila maghunahuna nga sila pagabanhawon (ug mubangon gikan sa mga patay alang sa pag-ihap ug pagpanimalos),

⁵Alang sa usa ka dakong Adlaw,

⁶(Nga mao) Ang Adlaw nga ang tanang mga tawo mobarog atubangan sa Ginoo sa tanang linalang[1].

⁷Apan dili, sa pagkatinuod ang talaan sa mga makasasala, (gitipigan) sa Sijjeen,

⁸Ug unsa ang makapahibalo kanimo kon unsa ang Sijjeen?

⁹Kini ang ilang padulngan nga natala sa usa ka rehistro nga gisulat[2].

¹⁰Alaut nianang Adlawa alang sa mga manlilimod,

¹¹Kadtong naglimod sa Adlaw sa (Paghukom ug) Pagbalus.

¹²Ug walay milimod niini gawas sa tanang matag nakasala nga malapason.

¹³Sa diha nga ang Among mga Bersikulo (ang Qur'an) ilitok ngadto kaniya, siya miingon: 'Mga Sugilanon sa mga karaan.'

¹⁴Dili, hinunoa, ang ilang gibuhat kaniadto (nga mga sala) nagbutang ug taya sa ilang mga kasingkasing.

¹⁵Sa pagkatinuod sila nianang Adlawa magbulag gikan sa ilang Ginoo (Allah).

¹⁶Unya sa pagkatinuod sila makasulod sa Kalayo sa Imperno.

¹⁷Unya kini igasulti (ngadto kanila): "Kini mao ang inyong naandan sa paglimod."

¹⁸Sa pagkatinuod ang talaan sa mga matarung anaa sa (gitipigan) nga 'illiyyeen.

¹⁹Ug unsay makapahibalo kanimo kon unsa ang Iliyyeen?

²⁰Kini ang ilang destinasyon nga natala sa usa ka rehistro nga gisulat[3].

²¹(Nga diin) gisaksihan sa mga labing duol (gikan sa taliwala sa mga anghel).

²²Sa pagkatinuod, ang mga matarung maanaa sa Tanaman sa Kabulahanan (Paraiso),

²³Panggilingkod nga malipayon' sa mga trono (sa dignidad), nga sila nagalantaw 'sa tanang mga panalangin'.

²⁴Imong mailhan sa ilang mga nawong ang kasidlak sa Kalipay.

²⁵Ang ilang kauhaw matagbaw pinaagi sa usa ka lunsay nga ilimnon, nga sinilyohan.

²⁶Ang kataposan niana (nga bino) mao ang humot sa musk; ug alang niana pasagdi (ang tanan) nga naningkamot, maningkamot (sa pagtuman sa Allah).

²⁷Ug kining nasagol mao ang tubig sa Tasneem (gikan ang kinatas-ang tubod sa Paraiso),

²⁸Usa ka tubod diin ginaimnan niadtong mga labing duol sa Allah.

²⁹Sa pagkatinuod sila nga mga dautan nagkatawa niadtong mga nagatoo.

³⁰Ug sa diha nga sila molabay kanila, sila mangidhat sa usag-usa (sa pagbiaybiay).

³¹Sa diha nga sila mobalik ngadto sa ilang mga katawhan sila mobalik nga malipayon 'pagbiaybiay sa mga magtotoo'.

³²Ug sa diha nga sila makakita kanila (nga mga magtutuo), sila moingon: 'Sa pagkatinuod kini mao mga nahisalaag!'

³³Apan sila nga (manlilimod) wala ipadala aron mahimong mga magbalantay ibabaw kanila (nga mga magtutuo).

³⁴Apan niining Adlawa (sa Paghukom) kadtong mga mituo magkatawa sa mga manlilimod;

³⁵Panggilingkod nga malipayon' sa mga trono 'sa dignidad', nga sila nagalantaw 'sa tanang mga panalangin'.

³⁶Ang mga manlilimod ba wala gibalosan (sa hingpit) alang sa unsay ilang gibuhat kaniadto (ni kadautan)?