Al-Ghashiyah

¹(Ey Peyğəmbər!) Qiyamətin xəbəri sənə gəlib çatdımı?

²O gün (neçə-neçə) üzlər (qorxudan) zəlil bir görkəm alacaqdır.

³Çalışıb, yorulacaq,

⁴qızmar oda girəcək,

⁵qaynar çeşmədən (su) içirdiləcək.

⁶Onların daridən (acı və pis qoxulu tikanlı bitkidən) başqa bir yeməyi olmayacaqdır.

⁷(O yemək onları) nə doydurar, nə də aclıqdan qurtarar.

⁸O gün (neçə-neçə) üzlər sevinəcək,

⁹(dünyadakı) səylərindən razı qalacaq,

¹⁰uca Cənnətdə olacaq,

¹¹orada faydasız bir söz eşitməyəcək.

¹²Orada axar çeşmələr vardır;

¹³Orada hündür taxtlar,

¹⁴qoyulmuş piyalələr,

¹⁵yan-yana düzülmüş yastıqlar,

¹⁶və sərilmiş xalçalar var.

¹⁷Məgər dəvəyə baxmırlar ki, necə yaradılmışdır?

¹⁸Göyə (baxmırlar ki) necə ucaldılmışdır?

¹⁹Dağlara (baxmırlar ki) necə dikəldilmişdir?

²⁰Yerə (baxmırlar ki) necə döşədilmişdir?

²¹(Ey Peyğəmbər!) Sən öyüd-nəsihət ver! Sən yalnız öyüd-nəsihət verənsən.

²²Sən onların üzərində hökmdar deyilsən.

²³Lakin kim üz döndərib küfr edərsə,

²⁴Allah onu ən böyük əzabla cəzalandırar.

²⁵Şübhəsiz ki, onların dönüşü Bizədir.

²⁶Sonra onları hesaba çəkmək də Bizə aiddir.