Al-Haqqah

¹E Vërteta e pashmangshme![375]

²Ç’është e Vërteta e pashmangshme?

³E kush do të ta shpjegojë ty se ç’është e Vërteta e pashmangshme?

⁴Fiset Themud dhe Ad e mohuan Gjëmimin e tmerrshëm[376],

⁵prandaj fisi Themud u shkatërrua nga një ulërimë e tmerrshme,

⁶kurse fisi Ad u shkatërrua nga një furtunë shungulluese të rreptë,

⁷të cilën Allahu ua dërgoi atyre shtatë net dhe tetë ditë pareshtur. Atëherë mund t’i vëreje njerëzit të përmbysur si trungjet e hurmave të kalbura.

⁸A sheh ndonjë gjurmë të tyre?

⁹Faraoni, ata para tij dhe populli i qyteteve të rrënuara[377] kryen gjynahe të mëdha,

¹⁰dhe e kundërshtuan të dërguarin e Zotit të tyre, andaj Allahu i zhbiu ata me dënim të ashpër.

¹¹Kur vërshoi uji i madh, Ne ju ngarkuam ju[378] në anije,

¹²për ta bërë atë një paralajmërim, që ta dëgjojë çdo vesh i vëmendshëm.

¹³Dhe kur t’i fryhet një herë Surit,

¹⁴kur toka dhe malet të ngrihen lart e të thërrmohen me një goditje shkatërrimtare,

¹⁵atëherë do të ndodhë Ngjarja e pashmangshme (Kiameti).

¹⁶Dhe do të çahet qielli, që atë ditë do të jetë i thyeshëm.

¹⁷Engjëjt do të rrinë skajeve të tij, kurse tetë prej tyre do të mbajnë Fronin e Zotit tënd.

¹⁸Atë Ditë do të mbeteni zbuluar dhe asnjë fshehtësi juaja nuk do të mbetet pa u shfaqur:

¹⁹Ai, të cilit do t’i jepet libri i veprave të tij nga ana e djathtë, do t’u thotë (njerëzve të tij): “Ja, lexoni librin tim!

²⁰Vërtet, unë kam qenë i bindur se do të jepja llogari.”

²¹Kështu, ai do të ketë jetë të lumtur,

²²në një kopsht të lartë,

²³frutat e të cilit do t’i kapë lehtë.

²⁴(Njerëzve të tillë u thuhet:) “Ju bëftë mirë, hani e pini për atë, që keni bërë në ditët e kaluara!”

²⁵Por ai, të cilit do t’i jepet libri i veprave të tij nga ana e majtë, do të thotë: “Ah, sikur të mos më ishte dhënë libri im

²⁶dhe të mos e kisha ditur llogarinë time!

²⁷Ah, të kisha qenë i vdekur (e të mos isha ringjallur)!

²⁸Pasuria ime nuk më solli dobi

²⁹dhe më la fuqia ime!”

³⁰(Do të thuhet) “Kapeni dhe lidheni në pranga,

³¹pastaj digjeni në zjarrin përvëlues,

³²mandej lidheni në zinxhirë prej shtatëdhjetë kutesh,

³³sepse ai, me të vërtetë, nuk ka besuar në Allahun e Madhërishëm

³⁴dhe nuk është kujdesur për të ushqyer të varfrit e shkretë.

³⁵Prandaj, ai sot këtu s’ka mik të afërt

³⁶e as ushqim tjetër, përveç qelbit,

³⁷të cilin e hanë vetëm gjynahqarët.

³⁸Betohem për gjithçka që ju shihni

³⁹dhe për gjithçka që nuk e shihni,

⁴⁰se ky (Kuran) është vërtet fjalë e (kumtuar prej) një të Dërguari të nderuar (Muhamedit a.s.)

⁴¹e nuk është fjalë poeti; sa pak që besoni!

⁴²Nuk është as fjalë e ndonjë falltari; sa pak që po reflektoni!

⁴³Ai është shpallje e zbritur nga Zoti i botëve!

⁴⁴Sikur ai (Muhamedi), në mënyrë të rreme, të Na kishte veshur ndonjë fjalë,

⁴⁵Ne do ta kapnim atë për dorën e djathtë

⁴⁶dhe me siguri që do t’ia prisnim damarin e qafës

⁴⁷e askush prej jush nuk do të mund ta mbronte.

⁴⁸Natyrisht, Kurani është përkujtesë për ata që i frikësohen Zotit!

⁴⁹Ne e dimë mirë se ka prej jush që e mohojnë atë.

⁵⁰Ai është keqardhje për mohuesit.[379]

⁵¹Ai është, pa dyshim, e vërtetë e pamohueshme.

⁵²Prandaj, lartësoje emrin e Zotit tënd të Madhërishëm!