Al-Waqi'ah

¹Kur të ndodhë Ngjarja (Kiameti),

²ardhjen e saj askush nuk do ta mohojë.

³Disa do t’i ulë e disa do t’i lartësojë.

⁴Kur Toka të dridhet fuqishëm,

⁵malet të thërrmohen copë-copë

⁶e të shndërrohen në pluhur të shpërndarë,

⁷ju, (o njerëz) do të ndaheni në tri grupe:

⁸njerëzit e së djathtës[353] - sa të nderuar do të jenë fatlumët!

⁹njerëzit e së majtës[354] - sa të poshtëruar do të jenë fatkeqët!

¹⁰dhe ata që kanë prirë (në besim) e që do të prijnë (edhe në Xhenet).

¹¹Ata janë të afërtit (tek Allahu),

¹²në kopshtet e kënaqësisë.

¹³Shumica e tyre janë prej të lashtëve,

¹⁴ndërsa një pakicë prej brezave të mëvonshëm.

¹⁵Ata do të qëndrojnë në divane të stolisura me ar e gurë të çmuar,

¹⁶të mbështetur në to përballë njëri-tjetrit.

¹⁷Do t’u sillen rreth (për shërbim) djelmosha përherë të rinj,

¹⁸me kupa, ibrikë dhe gota me pije të kulluar, që rrjedh

¹⁹e prej së cilës nuk do t’u dhembë koka dhe nuk do t’u humbë mendja,

²⁰e me fruta të cilat do t’i zgjedhin vetë

²¹dhe mish shpendësh që ua ka ënda.

²²Për ata ka edhe hyri symëdha,

²³të ngjashme me margaritarët e ruajtur,

²⁴si shpërblim për atë që kanë punuar.

²⁵Aty nuk do të dëgjojnë biseda të kota, as fjalë gjynahesh,

²⁶por vetëm fjalët “Paqe, paqe”!

²⁷E njerëzit e së djathtës – sa të nderuar që janë fatlumët!

²⁸Ata do të qëndrojnë në mes të lotusëve pa gjemba

²⁹dhe bananeve të mbushura me fruta,

³⁰nën hije të gjera,

³¹pranë një uji rrjedhës,

³²dhe mes frutave të llojllojshme,

³³të cilat kurrë nuk sosen, as nuk janë të ndaluara;

³⁴dhe në shtroje të ngritura (ku i presin hyritë),

³⁵të cilat Ne i kemi krijuar në një formë të veçantë (jo të lindura),

³⁶dhe i kemi bërë ato virgjëresha,

³⁷të dashura për bashkëshortët e tyre dhe moshatare me ta,

³⁸për njerëzit e së djathtës.

³⁹Janë shumë nga të lashtët

⁴⁰e shumë edhe nga të mëvonshmit.

⁴¹Po njerëzit e së majtës – sa të poshtëruar janë fatkeqët!

⁴²Ata do të jenë në afshin përcëllues të zjarrit dhe ujit të valuar

⁴³dhe nën hijen e një tymi të zi,

⁴⁴e cila nuk do të jetë as e freskët e as e këndshme.

⁴⁵Ata, para kësaj, jetonin në luks

⁴⁶dhe në vazhdimësi bënin gjynahe të rënda[355],

⁴⁷duke thënë: “Vallë, pasi të vdesim e të bëhemi pluhur e eshtra, vërtet do të ringjallemi?!

⁴⁸Vallë, edhe të parët tanë të lashtë?!”

⁴⁹Thuaju (o Muhamed): “Me siguri, edhe të parët, edhe të mbramët,

⁵⁰do të tubohen në një ditë të caktuar.

⁵¹Dhe atëherë ju, o jobesimtarë të humbur,

⁵²me siguri që do të hani nga pema e zekumit,

⁵³me të cilën do të mbushni barkun.

⁵⁴Pastaj do të pini ujë të valuar,

⁵⁵madje do të pini ashtu siç pi deveja e etshme”.

⁵⁶Kështu do të jetë gostia e tyre në Ditën e Llogarisë!

⁵⁷Ne ju krijuam – e pse nuk e pranoni të vërtetën?

⁵⁸A e keni parë farën që e hidhni?

⁵⁹A jeni ju që e krijoni atë apo jemi Ne krijuesit e saj?

⁶⁰Ne e caktojmë vdekjen tuaj dhe askush nuk mund të na pengojë

⁶¹që t’jua ndryshojmë trajtën dhe t’ju rikrijojmë ashtu si nuk e dini (në Ditën e Ringjalljes).

⁶²Sigurisht, ju e dini krijimin e parë (prej një pike fare), atëherë përse nuk mendoni?!

⁶³A shihni atë që mbillni?

⁶⁴Vallë, ju e bëni atë që të mbijë apo jemi Ne rritësit e saj?

⁶⁵Nëse duam, Ne e lëmë fyçkë dhe ju do të çuditeni

⁶⁶(e do të thoni): “Ne jemi të dëmtuar,

⁶⁷madje jemi krejt të privuar (nga furnizimi)!”

⁶⁸A e shihni ujin që pini?

⁶⁹Vallë, ju e zbrisni atë prej reve apo Ne e zbresim?

⁷⁰Nëse duam, Ne e bëjmë atë të njelmët, andaj përse nuk jeni mirënjohës?!

⁷¹A e shihni zjarrin që e ndizni?

⁷²Vallë, ju i keni bërë drutë për të apo Ne i kemi bërë?!

⁷³Ne e kemi bërë atë përkujtues (të zjarrit të Xhehenemit) dhe, që t’u sjellë dobi nevojtarëve,

⁷⁴prandaj lavdëroje emrin e Zotit tënd të Madhërishëm!

⁷⁵Betohem në çastin e perëndimit të yjeve,

⁷⁶- e ky është betim i madh, veç sikur ta dinit

⁷⁷se ky është vërtet një Kuran i nderuar,

⁷⁸në Librin e ruajtur.

⁷⁹Atë (Kuranin) e prekin vetëm të pastrit.

⁸⁰Ai është Shpallje prej Zotit të botëve.

⁸¹Vallë, një Fjalë të tillë ju e mohoni

⁸²dhe e bëni detyrën tuaj (të përditshme) ta përgënjeshtroni?!

⁸³Atëherë, përse kur (dikujt) i vjen (shpirti) në grykë

⁸⁴para syve tuaj,

⁸⁵- ndërkohë që Ne jemi më afër atij se ju, por ju nuk e vini re

⁸⁶përse pra, nëse nuk do të gjykoheni (në jetën e përtejme),

⁸⁷ju nuk ia ktheni shpirtin atij? Përgjigjjuni kësaj, nëse thoni të vërtetën!

⁸⁸Kështu, nëse ai (në agoni) është nga ata që janë të afërt (me Allahun),

⁸⁹do të ketë prehje, kënaqësi dhe dhunti të Xhenetit.

⁹⁰E, nëse është nga njerëzit e së djathtës,

⁹¹(ai do të përshëndetet) “Paqe për ty” nga njerëzit e së djathtës.

⁹²Por, nëse (ai në agoni) është nga përgënjeshtruesit e humbur,

⁹³ai do të gostitet me ujë të valuar

⁹⁴dhe do të përcëllohet në Zjarrin e flakëruar (të Xhehenemit).

⁹⁵Pa dyshim, kjo është e Vërteta e sigurt.

⁹⁶Andaj lavdëroje emrin e Zotit tënd të Madhërishëm!