Al-Qamar

¹Igihe cy’imperuka kiregereje ndetse n’ukwezi kwarasadutse.[1]

²N’iyo (abahakanyi) babonye igitangaza, batera umugongo bakavuga bati “Ubu ni uburozi bugikomeje!”

³Barahakanye banakurikira irari ryabo, kandi buri kintu kizagira iherezo.

⁴Kandi rwose bagezweho n’inkuru zibabuza (gukora ibibi),

⁵(Izo nkuru ziri muri Qur’an) zuje ubushishozi buhebuje, ariko uko kubaburira nta cyo kwabamariye.

⁶Bityo (yewe Muhamadi), birengagize kandi (unabibutse) umunsi umuhamagazi azahamagarira kugana ku kintu kibi cyane (gucirwa urubanza ku munsi w’imperuka),

⁷Bazaba bubitse amaso (kubera ikimwaro), basohoka mu mva bameze nk’inzige zinyanyagiye.

⁸Bihuta bagana uhamagara. Abahakanyi bazavuga bati “Uyu ni umunsi ugoye.”

⁹Na mbere yabo, abantu ba Nuhu bahinyuye umugaragu wacu, maze baravuga bati “Ni umusazi”, ndetse aranamaganwa.

¹⁰Nuko asaba Nyagasani we (agira ati) “Rwose njye naneshejwe, ngaho tabara!”

¹¹Nuko dufungura amarembo y’ikirere, hamanuka amazi yisuka ari menshi.

¹²Nuko isi tuyikuramo amasoko, maze amazi (yo mu nsi no hejuru) arahura ku bw’itegeko ryagenwe.

¹³Maze (Nuhu) tumutwara mu gikozwe mu mbaho n’imisumari (inkuge).

¹⁴Cyagendaga (hejuru y’amazi) tugihanze amaso; (ibyo) biba igihembo cy’uwo bahakanye.

¹⁵Rwose (iyi nkuru ya Nuhu) twarayiretse ngo ibe ikimenyetso (n’isomo ku bazaza nyuma ye). Ese hari uwibuka (ngo bimugirire akamaro)?

¹⁶Mbega uko ibihano byanjye no kuburira kwanjye byari bimeze!

¹⁷Kandi rwose Qur’an twarayoroheje kugira ngo ibe urwibutso. Ese hari uwibuka (ngo bimugirire akamaro)?

¹⁸Aba Adi bahinyuye (Intumwa yabo Hudu); mbega uko ibihano byanjye no kuburira kwanjye byari bimeze!

¹⁹Mu by’ukuri twaboherereje inkubi y’umuyaga uvuza ubuhuha ku munsi w’amakuba akomeye,

²⁰Uterura abantu bakamera nk’ingiga z’ibiti by’imitende byaranduwe.

²¹Mbega uko ibihano byanjye no kuburira kwanjye byari bimeze!

²²Kandi rwose Qur’an twarayoroheje kugira ngo ibe urwibutso. Ese hari uwibuka (ngo bimugirire akamaro)?

²³Aba Thamudi bahinyuye kuburira (kwacu)

²⁴Nuko baravuga bati “Ese ni gute twafata umuntu umwe unadukomokamo ngo tube ari we dukurikira? Rwose ubwo twaba turi mu buyobe n’ubusazi!”

²⁵Ese ubu koko urwibutso ni we wenyine muri twe rwahawe? Ahubwo we ni umubeshyi akaba n’umwibone.

²⁶Bidatinze bazamenya umubeshyi w’umwibone uwo ari we.

²⁷Tugiye kuboherereza ingamiya (y’ingore) kugira ngo tubagerageze; bityo bagenzure unabihanganire.

²⁸Unababwire ko amazi bagomba kuyasangira na yo (ingamiya); buri wese azajya agira igihe cye cyo kuyanywaho.

²⁹Ariko bahamagaye mugenzi wabo (afata inkota) arayica.

³⁰Mbega uko ibihano byanjye no kuburira kwanjye byari bimeze!

³¹Mu by’ukuri twaboherereje urusaku rumwe gusa, maze bamera nk’ibyatsi byumye byaribaswe.

³²Kandi rwose Qur’an twarayoroheje kugira ngo ibe urwibutso. Ese hari uwibuka (ngo bimugirire akamaro)?

³³Abantu ba Lutwi bahinyuye kuburira (kwacu),

³⁴Twaboherereje inkubi y’umuyaga uvanze n’amabuye (ubarimbura bose), usibye gusa umuryango wa Lutwi twarokoye mu rukerera,

³⁵(Ibyo twabikoze) ku bw’ingabire ziduturutseho. Uko ni ko duhemba ushimira.

³⁶Nyamara (Lutwi) yari yarababuriye ko bazahura n’ibihano byacu, nuko bashidikanya kuri uko kuburira (kwacu).

³⁷Baranamwinginze (ngo abahe) abashyitsi be (kugira ngo babakorere ubutinganyi). Nuko tubahuma amaso (tuvuga tuti) “Ngaho nimusogongere ibihano byanjye no kuburira (kwanjye)!”

³⁸Kandi rwose twabazindukirije mu bihano bikomeza (kuzageza ku munsi w’imperuka).

³⁹Ngaho nimusogongere ibihano byanjye no ku byo najyaga mbaburira!

⁴⁰Kandi rwose Qur’an twarayoroheje kugira ngo ibe urwibutso. Ese hari uwibuka (ngo bimugirire akamaro)?

⁴¹Kandi rwose kuburira (kwanjye) kwageze ku bantu ba Farawo,

⁴²Bahinyuye ibitangaza byacu byose, nuko turabafata tubahanisha ibihano by’Umunyacyubahiro bihebuje, Ushobora byose.

⁴³Ese abahakanyi banyu (b’i Maka) ni bo beza kurusha abo (abantu ba Adi, aba Thamudi, aba Nuhu n’aba Farawo, boretswe)? Cyangwa mufite ubudahangarwa bwanditse mu bitabo (bwo kutazahanwa)?

⁴⁴Cyangwa (abo bahakanyi) baravuga bati “Twe turi benshi dushyize hamwe, dushoboye kwitabara!”

⁴⁵Nyamara abo bishyize hamwe bazatsindwa banayabangire ingata.

⁴⁶Ahubwo umunsi w’imperuka ni cyo gihe basezeranyijwe (cyo kuzahanirwaho), ndetse imperuka izaba iteye ubwoba cyane kandi irura.

⁴⁷Mu by’ ukuri, inkozi z’ibibi ziri mu buyobe (hano ku isi) kandi zizahanishwa umuriro utwika!

⁴⁸Umunsi uburanga bwabo buzakururirwa mu muriro (bazabwirwa bati) “Ngaho nimwumve igihano cy’umuriro.”

⁴⁹Mu by’ukuri buri kintu twakiremye ku rugero twagennye (igeno ryacyo).

⁵⁰Kandi itegeko ryacu ni (ijambo) rimwe; (ryihuta) nko guhumbya no guhumbura.

⁵¹Kandi rwose tworetse abantu bameze nkamwe (mu buhakanyi). Ese hari uwibuka (ngo bimugirire akamaro)?

⁵²Kandi buri kintu cyose bakoze cyandikwaga mu bitabo (by’ibikorwa byabo).

⁵³Na buri kintu, cyaba gito cyangwa kinini, kiranditse.

⁵⁴Mu by’ukuri abagandukira Allah bazaba bari mu busitani n’imigezi (Ijuru),

⁵⁵Mu byicaro by’icyubahiro, hafi y’Umwami, Ushobora byose.