Al-Ghashiyah

¹Mbega Ntumwa y’Imana! Warashikiriwe n’inkuru y’umusi uhwikira ibiremwa!

²Uwo musi, abagarariji bazosuzugurika bijirirwe mu maso kubera ibihano;

³Bakore bita ku rutare, baruhe;

⁴Bazokwinjira mu muriro udahera, unyengetera cane;

⁵Banyweshwe mw’iriba ry’amazi asebura akaryimara;

⁶Nta mfungurwa bazohabwa atari amahwa yumye;

⁷Ntavyibusha namba eka ntanavuna n’inzara (ntanahembura) na gato.

⁸Uwo musi rero, abemeramana bazorangwa n’akamwemwe mu maso;

⁹Bashime mu buzima bw’inyuma yo gupfa ibikorwa vyabo bakoze kw’isi;

¹⁰Bazoba bari mu Bwami bw’ijuru bw’iteka;

¹¹Ntibazokwumvamwo insaku n’amajambo ata co amaze;

¹²Harimwo iriba ry’amazi atemba;

¹³Harimwo n’ibitanda vy’icubahiro bihanitse;

¹⁴N’ibirahuri bishinguwe neza, vyabategekanirijwe;

¹⁵N’imisego itondeshejwe neza;

¹⁶N’ibisaswa vy’iteka bishashwe neza.

¹⁷Mbega yemwe, abagarariji ntibitegereza ingamiya ingene yaremwe!

¹⁸N’ijuru ingene ryahanitswe, ata nkingi!

¹⁹N’imisozi ingene yashimitswe!

²⁰N’isi ingene yashashwe, yagutse!

²¹Ntumwa y’Imana! Kubera ivyo rero, Ibutsa abirengagiza ukuri, ko mu vy’ukuri wewe ujejwe kwibutsa gusa;

²²Wewe ntushinzwe kubahatira kwemera.

²³Ariko uwugenza umugongo, agatsimbatara mu kugarariza;

²⁴Uyo, Imana Allah Izomuha ibihano ruhasha mu muriro.

²⁵Mu vy’ukuri, igaruka ryabo - nibazuka - ni iwacu Twebwe Allah;

²⁶Hanyuma, nta nkeka ko ari Twebwe Allah, Tujejwe kubaharurira ku musi w’impera.