Al-Qiyamah

¹Jewe Allah, Ndarahiye ku musi w’izuka ry’ibiremwa n’iharurirwa ryavyo!

²Ndanarahiye no ku mutima winegura kenshi[1]! Ko ibiremwa bizozuka.

³Mbega, umuntu w’umugarariji yibaza ko Tutazosubira kwegeranya amagufa yiwe inyuma yo gupfa!

⁴Vyobuzwa n’iki! Twebwe Allah Tuzosubira kuyegeranya, ahubwo Turashoboye no kuringaniza intoke n’amakanda yazo nk’uko zari ziri imbere yo gupfa.

⁵Ahubwo rero, umuntu ahakana yivuye inyuma izuka ry’ibiremwa, ashaka ko yoguma mu vyaha;

⁶Maze akabaza atangara n'itebura n'akantu ati: “Mbega izuka ry’ibiremwa rizoshika ryari!”.

⁷Igihe umugarariji yakanutse amaso ku bwoba bw’intureka z’uwo musi;

⁸Ukwezi kukazima, hakaba ubwirakabiri;

⁹Izuba hamwe n’ukwezi bigashirwa hamwe, ntihasubire kuba ijoro n’umurango;

¹⁰Kuri uwo musi, umuntu azovuga ati: “Ubuhungiro bwo gukira ibihano buri hehe!”.

¹¹Muntu! Eka teshwa ute, urahumba! Si nk’uko uvyipfuza, nta buhungiro, eka nta n’ubukiriro;

¹²Kuri uwo musi, amaherezo y’ibiremwa vyose n’ubutururo bwavyo, ni ku Mana yawe Rurema Allah.

¹³Umuntu kuri uwo musi, azomenyeshwa ivyo yakoze vyose; ivyiza n’ibibi, n’ivyo yagizemwo uruhara bigakorwa yarapfuye.

¹⁴Ahubwo rero, burya umuntu wenyene ku gatwe kiwe, ni isura ku vyo yakoze n’ivyo atakoze;

¹⁵N’aho yotanga ivyireguzo yisigura ku vyaha yakoze, nta co bizomwungura.

¹⁶Ntumwa y’Imana! Ntugasubiremwo Qor’ani mu gihe co kuyihishurirwa, imbere yuko umumalayika Jibrili aheraheza, wihutira kuyifata neza ku mutwe ku mpungenge z’uko woyibagira.

¹⁷Mu vy’ukuri ni Twebwe Allah, Tujejwe kuyitururuza mu mushaha wawe no kugushoboza kuyisoma ku mutwe.

¹⁸Iyo Intumwa yacu Jibrili iyigusomeye rero, ba ukurikirana igisomwa ata kuyiciramwo.

¹⁹Hanyuma mu vy’ukuri, ni Twebwe Allah Tujejwe kuyigusigurira.

²⁰Babangikanyamana! Teshwa mute, murahumba! Si nk’uko mwibaza ko ata zuka ry’ibiremwa rihari, ahubwo murakunda ivy’isi bisayangana mukarenza urugero;

²¹Mukareka gukora ivyiza bizobafasha mu buzima bw’inyuma yo gupfa.

²²Abemeramana kuri uwo musi, bazoba basayangana mu maso, akanyamuneza ku kandi kabasya;

²³Baraba bitegereza Imana yabo Rurema Allah ukuri kwamye.

²⁴Abanyavyaha na bo kuri uwo musi, bazoba bijiriwe mu maso, babihiwe;

²⁵Bazi neza ko bashikiwe n’ibihano vy'agacamugongo.

²⁶Nateshwe ate, arahumba mu gukunda ivy’ isi! Igihe inkomoko y'ubuzima "Roho" yageze mu muhogo ari ku mpfiro;

²⁷Maze uwuri hafi, akabwirwa n’abari ng’aho ati: “Mbega yemwe, ni nde yomukiza!”;

²⁸Uwuri ku mpfiro na we azoba yamaze kumenya neza na neza ko hageze gusezera isi;

²⁹Maze intureka zo gusezera isi zigahura n’intureka zo gutangura ubuzima bw’inyuma yo gupfa, imirundi igafatana atera akagere ka nyuma.

³⁰Kuri uwo musi w'izuka ry'ibiremwa rero, ibiremwa bizoshorerwa ku Mana yawe Rurema Allah[2].

³¹Umugarariji, ntiyigeze yemera Intumwa na Qor’ani, eka ntiyigeze anasenga amasengesho-bwirizwa;

³²Ahubwo yarahakanye Qor’ani yivuye inyuma, yirengagiza n’ukwemera Intumwa;

³³Hanyuma agenda agana ku muryango wiwe n’amanyama n’ubwirasi n'akantu.

³⁴Muhakanyi! Uragahanwa n’Imana Allah! Uragahanwa n’Imana Allah!

³⁵Hanyuma kandi, uragahanwa n’Imana Allah! Uragahanwa n’Imana Allah!

³⁶Mbega, umuhakanyi w’izuka ry’ibiremwa, yibaza ko azokwihozwa akarekwa uko ashaka, ntahabwe amabwirizwa ngo aheze abazwe ko yayubahirije!

³⁷Mbega, ntiyari ima ry’intanga ryakororewe mu gitereko!

³⁸Hanyuma aba amaraso avuze, ni uko rero Imana Allah Iraheza Iramurema, Iraringaniza indemo yiwe n’ibihimba vyiwe; kimwe cose aho kigenewe, kibereye;

³⁹Hanyuma Imugiramwo ibitsina bibiri: igitsina-gabo canke igitsina-gore.

⁴⁰Mbega Imana Allah Ishoboye gukora ivyo vyose, ntishoboye kuzura abapfuye, Ikabasubiza ubuzima!