Al-Muddaththir

¹Ewe wipfutse impuzu!

²Haguruka ugabishe abantu ku bihano vy’Imana Allah;

³Ninahaza wongere ukuze n’Imana yawe Rurema Allah, mu kuyiyegereza mu vyo ukora vyose;

⁴Sukura n’impuzu zawe ibihumanya kuko isuku ry’ibiboneka riranga isuku ry’umushaha n’ibitaboneka;

⁵Bandanya witandukanye n’ibigirwamana vyose ntukavyegere;

⁶Kandi ntugatange uzeye gusubirizwa mu ndumane umurengera;

⁷Kubera ugushimwa n’Imana yawe Rurema Allah, niwihanganire ishira mu ngiro ry’amabwirizwa yayo.

⁸Nihavuzwa inzamba ya kabiri yo kuzuka;

⁹Uwo musi, ni wo uzoba uremereye cane ku bagarariji;

¹⁰Ntuzoborohera na gato kubera ibibazo vy’iharurirwa.

¹¹Ntumwa y’Imana! Ndekera Jewe Allah, uwo Naremye mu nda ya nyina ari wenyene, ata matungo ata n’abana yavukanye;

¹²Ndaheza Ndamuha amatungo menshi amaze kuvuka;

¹³N’abana bama hambavu yiwe i Makka;

¹⁴Ndamworohereza no mu buzima bw’isi, Ndamuhesha n’icubahiro;

¹⁵Hanyuma akipfuza ko Nomwongerereza ku vyo afise, kandi yarangararije!

¹⁶Eka, nateshwe ate, arahumba! Mu vy’ukuri, ni umuntu yama yarwanije Aayah n’ivyemezo vyacu;

¹⁷Nzomuha ibihano bikomakomeye cane ata gahengwe[1].

¹⁸Mu vy’ukuri, yaricaye ariyumvira ico yotegekanya, kugira atyoze Qor’ani n’Intumwa Muhamadi (nyakugira amahoro n’impuhwe z’Imana Allah).

¹⁹Nyakuvumwa n’Imana Allah! Ukuntu yategekanije iryo tyoza!

²⁰Hanyuma, nyakuvumwa n’Imana Allah! Ukuntu yategekanije iryo tyoza!

²¹Hanyuma arihweza ico yovuga mu gutyoza Qor’ani n’Intumwa Muhamadi (nyakugira amahoro n’impuhwe z’Imana Allah);

²²Araheza arijirirwa mu maso, aranyinyirwa kuko atorohewe kuronka ico yovuga.

²³Hanyuma arirengagiza ukuri n’amanyama menshi ku bwishime;

²⁴Aca avuga atyoza Qor’ani ati: “Iyi Qor’ani si ikindi, kiretse ko ari uburozi, Muhamadi yarazwe n’ab’aho hambere;

²⁵Mu vy’ukuri Qor’ani si ikindi, kiretse ko ari amajambo yabuye ku bantu b’abakurambere, araheza ayitirira Imana”.

²⁶Jewe Allah, Nzomuta mu muriro ubabura.

²⁷Mbega ni igiki cokumenyesha uwo muriro ubabura ico ari co?

²⁸Nta co usigaza utakirigise, nta n’ico urekura ngo gicaruke;

²⁹Ubabura urukoba rw’umubiri mu kanya isase;

³⁰Ucungerewe n’abamalayika b’ibihangange cumi n’icenda, bakaba ari na bo bajejwe guhana.

³¹Twebwe Allah, ntitwashizeho abacungera uwo muriro, atari abamalayika b’ibihangange. Ntitwanagize ico gitigiri cabo, atari ukugira ngo kibe ikigeragezo ku bagarariji; kugira n’abahawe Igitabu bamenye ko Qor’ani ari ukuri; no kugira ngo ukwemera kw’abemera Imana Allah n’Intumwa yayo bakubahiriza n’amabwirizwa yayo, kwiyongere; no kugira ngo abahawe Igitabu n’abemeramana ntibasubire gukekeranya mw’idini ku vyerekeye igitigiri c’abamalayika bacungereye Jahannamu[2]; no kugira ngo abafise indwara y’uburyarya mu mitima yabo n’abagarariji, bavuge batangara bati: “Mbega, Imana Allah Yashatse kuvuga iki mu gutanga aka karorero k’igitigiri c’abamalayika bacungereye umuriro!”. Ni nk’ukwo nyene rero Imana Allah, Ihubisha uwo Ishatse kuko yahisemwo uguhakana, Ikarongora mu nzira yayo uwo Ishatse, kuko yahisemwo ukwemera. Nta n’umwe rero azi igitigiri c’ingabo z’Imana yawe Rurema Allah uko kingana, atari Yo Yonyene ubwayo, kanatsinda uwo muriro wa Jahannamu si ikindi, kiretse ko ari urwibutso ku bantu.

³²Eka nibateshwe bate, barahumba! Si uko bahakanye Intumwa na Qor’ani! Jewe Allah, Ndarahiye ku kwezi!

³³No kw’ijoro iyo bwije hakijima!

³⁴No ku gitondo iyo hakeye bugatamanzura!

³⁵Ko mu vy’ukuri uwo muriro wa Jahannamu, ari kimwe mu ntureka zihambaye!

³⁶Kugira ngo habe igabishwa ry’abantu ku bihano vy’Imana Allah;

³⁷Ku wo ari we wese muri mwebwe ashaka gutera intambwe mu kwemera, canke ashaka gutera asubira inyuma mu buhakanyi.

³⁸Umuntu wese rero azogirwa ingwati ku vyo yakoze, ntazobohorwa kiretse mu gihe yoba yakoze ibitunganye canke ahanwe;

³⁹Havuyemwo gusa abantu b’iburyo, bazohabwa ibitabu vy’ibikorwa vyabo mu minwe yabo y’iburyo.

⁴⁰Abo rero, ni bo bazoba bari mu mirima itotahaye yo mu Bwami bw’ijuru, babazanya;

⁴¹Ukuntu abanyavyaha bamerewe.

⁴²Bazobabaza bati: “Mbega, ni igiki catumye mwinjira mu muriro ubabura wama wegenyejwe?”.

⁴³Na bo bazobishura bati: “Tukiri kw’isi, ntitwari mu basenga amasengesho-bwirizwa;

⁴⁴Ntitwigeze tunafungurira abakene;

⁴⁵Twahora dukora n’ivyaha hamwe n’abanyavyaha;

⁴⁶Twahora tunahakana ko ata n’umusi w’impera uriho;

⁴⁷Kugeza n’aho dushikiriwe n’urupfu, tukiri nk’uko turi”.

⁴⁸Kuri uwo musi rero, ivugira ry’abavugira abandi[3] nta co rizobamarira namba.

⁴⁹Mbega bafashwe n’iki, ko birengagiza kwibutswa n’iyo Qor’ani!

⁵⁰Wogira ngo ni imparage zivudutse zitekewe n’ubwoba;

⁵¹Zihunze intambwe.

⁵²Ahubwo umwe wese muri bo, agomba ko yohabwa Igitabu ciwe bwite, cemeza ko wewe uri Intumwa y’Imana.

⁵³Eka nibateshwe bate, barahumba! Si nk’uko bibaza namba, ahubwo ntibatinya ibihano vyo mu buzima bw'inyuma yo gupfa n’iharurirwa, ngo baheze bavyitegurire.

⁵⁴Eka, nibateshwe bate, barahumba! Mu vy’ukuri iyo Qor’ani, ni urwibutso rukwiye ku wushaka kwibuka.

⁵⁵Uwo wese rero ashaka kunyurwa n’iyo Qor’ani, aranyurwa.

⁵⁶Ntibazonyurwa atari uko Imana Allah Ibishatse. Ni Yo Nyenugutinywa Ikagamburukirwa, ni na Yo Nyenimbabazi.