Al-Haqqah

¹Igitegerezwa kuba.

²Ico, ni igiki gitegerezwa kuba?

³Ntumwa y'Imana! Ni igiki cokumenyesha ico gitegerezwa kuba, ukuntu giteye n'intureka zaco?

⁴Bene Thamuudi barungikiwe Intumwa Swalehe (nyakugira amahoro y’Imana Allah), na Bene Aadi barungikiwe Intumwa Huudi (nyakugira amahoro y’Imana Allah), barahakanye bivuye inyuma umusi w’inkuramutima, ari wo muhero w’isi.

⁵Ni uko rero, Bene Thamuudi bahonejwe n’ijwi rimena amatwi.

⁶Nayo Bene Aadi, bahonejwe n’igihuhusi c’igikonyozi kirandurana n’imizi ico ari co cose bihuye;

⁷Imana Allah, Yakibarungikiye amajoro indwi n’imirango umunani ikurikirana ata gahengwe, maze kirabahonya. Waraheza ukabona abantu bitega imyereka bagwa hasi nk’ibishitsi vy’itende vyariwe n’umuswa, bitagira intimatima;

⁸Mbega woba ukibona n’umwe muri bo yarokotse, akarusimba! Barahonye bose.

⁹Mu nyuma, haje Firawuni n’ubugaba bwiwe, haza n’abahakanyi bo hambere yiwe, hamwe n’abantu bo mu bisagara vyimonogoje mu bugaba, barungikiwe Intumwa Luutwi (nyakugira amahoro y’Imana Allah);

¹⁰Umugwi wose muri bo, warahakanye wivuye inyuma Intumwa warungikiwe n’Imana yawo Rurema Allah, maze Iraheza Irawushikura mu kuwuhana bimwe bikomeye.

¹¹Mu vy’ukuri, igihe isegenya ryahitana vyose rero, Twebwe Allah Twararokoye mu guheka mu bwato bureremba, abo mwakomotseko hamwe n’Intumwa Nuhu (nyakugira amahoro y’Imana Allah);

¹²Ivyo Twabigize kugira ngo bibabere urwibutso, maze ugutwi kwumva na kwo kwumvireho.

¹³Igihe rero havugijwe n’umumalayika Israafiili inzamba ya mbere yo guhonya ibiremwa vyose;

¹⁴Maze isi hamwe n’imisozi bigakurwaho, bigahondwa rimwe gusa;

¹⁵Uwo rero, ni wo musi w’imperuka w'igitegerezwa kuba, uzoba washitse;

¹⁶Aho ijuru rizosatagurika. Kuri uwo musi, ijuru rizoba ridakomeye namba;

¹⁷Abamalayika na bo bazoba bari ku mfuruka zaryo. Abamalayika umunani b’ibihangange bazoba bareruye hejuru yabo Ubuhangamo bw’Imana yawe Rurema Allah;

¹⁸Bantu! Kuri uwo musi, muzoshengezwa mwese mucirirwe imanza, muheze muhemberwe ivyo mwakoze, kandi nta banga ryanyu rizonyegezwa.

¹⁹Uwuzohabwa rero igitabu c’ibikorwa vyiwe mu kuboko kwiwe kw’iburyo, azoca avuga ahimbawe cane ati: “Ehe bantu! Akire, nimwisomere iki gitabu canje;

²⁰Mu vy’ukuri, nari nzi yuko nzoronka impembo yanje, ndaheza ndayikorera”;

²¹Uyo rero, azobaho ubuzima bw’akanyamuneza nta ngere;

²²Bazoba bari mu Bwami bw’ijuru bw’iteka;

²³Ivyamwa vyo muri Bwo vyamira hafi cane, bikamurwa vyoroshe;

²⁴Bazobwirwa bati: “Nimufungure, mwongere munywe n’akayabagu kenshi ku vyo mwakoze kw’isi”.

²⁵Nayo uwuzohabwa igitabu ciwe mu kuboko kwiwe kw’ibubamfu, azovuga yihebuye ati: “Amagorwa arama yemwe! Iyo ntahabwa iki gitabu canje;

²⁶Ngatako simenye impembo yanje;

²⁷Yoo! Iyo urupfu napfuye kw’isi rumarira vyose sinzuke;

²⁸Ehe yemwe! Amatungo yanje yose nta co yamariye;

²⁹Eka n’ivyireguzo vyanje vyose vyampereyeko”.

³⁰Abamalayika bacungereye umuriro, bazoca babwirwa bati: “Nimufate uyo munyavyaha mukomanye amaboko n’izosi, muce mumudadira n'amapingu;

³¹Hanyuma mumujugunyire mu muriro ururumba;

³²Muheze mumuboheshe umunyororo muremure cane”;

³³Mu vy’ukuri, ntiyigeze yemera Imana Imwe Rudende Allah, Nyenicubahirogisumbavyose.

³⁴Kandi ntiyitaho guhimiriza gufungurira abakenye mu bakene n’aboro, n’abandi.

³⁵Uno musi rero, nta mukunzi nkoramutima afise ngo amukingire ibihano;

³⁶Nta n’ibifungurwa ahabwa, atari amashira n’ibindi bitemba biva mu nyenga y’umuriro;

³⁷Nta muntu anabifungura, atari abanyavyaha b’abahakanyi ruhebwa.

³⁸Jewe Allah, Ndarahiye ku bintu mubona n’amaso!

³⁹No ku vyo mutabona mu binyegejwe ibiremwa!

⁴⁰Ko mu vy’ukuri iyo Qor’ani, ari amajambo y’Imana Allah asomwa n’Intumwa yubashwe.

⁴¹Kanatsinda, si n’amajambo y’umwivuzi w'amazina nk'uko mwibwira. Burya mwemera gake!

⁴²Kandi si n’amajambo y’umurozi atongera. Burya mwibuka gake, ngo mushobore kubitandukanya!

⁴³Ahubwo iyo Qor’ani, ni amajambo y’Imana Allah yamanuwe n’Umubungabunzi w’ibiremwa vyose ku Ntumwa Muhamadi (nyakugira amahoro n’impuhwe z’Imana Allah).

⁴⁴Iyo rero Muhamadi ahirahira ngo arementanye bimwe mu vyo avuga, Tutigeze Tubimuhishurira;

⁴⁵Nta nkeka ko Twari kumuhana, Tukanamuca n’ukuboko kw’iburyo;

⁴⁶Twari no kumuca umutsi mukuru w’umurindi w’amaraso, agapfa;

⁴⁷Kandi nta n’umwe muri mwebwe yoshoboye kumukingira.

⁴⁸Mu vy’ukuri iyi Qor’ani ntagatifu, ni n’urwibutso rwibutsa canecane abagamburukiramana bubahiriza amabwirizwa y'Imana Allah.

⁴⁹Bantu! Mu vy’ukuri, Turazi ko muri mwebwe harimwo abahakana iyi Qor’ani, ntibayemere.

⁵⁰Kandi kutayemera, bizotera abagarariji agahombo n’umubabaro.

⁵¹Mu vy’ukuri iyi Qor’ani, ni kwo kuri nyakwo kudahinyuzwa.

⁵²Ntumwa y’Imana! Kubera ivyo rero, shishikara uninahaza Imana yawe Rurema Allah, Nyenicubahirogisumbavyose.