Al-Ma'arij

¹Yarasavye umusavyi[1] igihano gitegerezwa gushika;

²Kizoshikira abagarariji ku musi w’izuka, nta n’umwe ashoboye kugihagarika;

³Kiva ku Mana Allah, Nyeninzira zicamwo gusa abamalayika mu kirere;

⁴Abamalayika hamwe na Mutimamweranda Jibrili, bazoduga muri izo nzira baja ku Mana Allah, ku musi w’izuka, ku ntureka zawo uzoba ungana n’imyaka yo kw’isi ibihumbi mirongo itanu[2].

⁵Ntumwa y’Imana! Ihanganire ata kwidogera itebura ry’abagarariji mu kwihutira gusaba ko bohanwa.

⁶Mu vy’ukuri, abagarariji babona ko ibihano vyo kuri uwo musi biri kure cane, bitazonabashikira;

⁷Na Twe Allah, Tukabibona ko nyabuna biri hafi cane, kandi bitegerezwa gushika.

⁸Umusi ijuru ryabaye nk’ubutare bw’umujumpu bwayongejwe;

⁹Imisozi nayo ikaba nk’ubwoya bwashwiragijwe n’umuyaga mu kirere;

¹⁰Umugenzi, ntazobaza mugenziwe uko amerewe.

¹¹Abakunzi bazobonana banamenyane, maze umunyavyaha yipfuze ko yotuma yigomboza mu bihano vy’uwo musi, abana biwe;

¹²N’umukenyezi wiwe, hamwe na mwenewabo;

¹³N'abo akomokako, bahora bamurwanako kw’isi;

¹⁴Hamwe rero n’ibiremwa vyose vyo kw’isi; yiyumvira ko ivyo vyose vyomurokora mu bihano.

¹⁵Nateshwe ate, arahumba! Si nk’uko avyipfuza, ntibazomurokora namba. Mu vy’ukuri uburuhukiro bwiwe, ni mu muriro wa Jahannamu ururumba n’inguvu nyinshi;

¹⁶Ushishura urukoba rw’umutwe n’urw’ibindi bihimba vy’umubiri;

¹⁷Uhamagara uwo wese yirengagiza ukuri akiri kw'isi, akanagenza umugongo mu kutumvira Imana Allah n’Intumwa yayo;

¹⁸Yishinga kwegeranya no kuziganya amatungo yiwe; atayatangako ishikanwa-bwirizwa, n’izindi mperezwa.

¹⁹Mu vy’ukuri, kiremwa-muntu yaremanwe igihababu;

²⁰Iyo akozweko n’ikiza c’ubukene canke indwara n'ibindi, ntiyihangana;

²¹N’iyo yorohewe mu buzima, aba ingumyi;

²²Havuyemwo gusa abasenga;

²³Batsimbataza amasengesho yabo ku mwanya wayo bakamizako;

²⁴N’abafise umugabane uzwi mu matungo yabo, bagaheza bakawutangako ishikanwa-bwirizwa;

²⁵Bagahereza umukene yubahuka agasega n’uwipfa agasoni, ntasabirize.

²⁶Havuyemwo n’abemera umusi w’impera, bakawitegurira mu gukora ivyiza bitegetswe;

²⁷N’abatinya ibihano bivuye ku Mana yabo Rurema Allah, maze bakavyiyubara;

²⁸Mu vy’ukuri ibihano vy’Imana yabo Rurema Allah, nta wokwijajara akiha amahoro mu kwiyemeza ko azobikira;

²⁹N’abacungera ubwambure bwabo, ntibasambane;

³⁰Kiretse gusa ku bakenyezi babo, canke abari mu minwe yabo mu ncoreke. Kuri abo rero, nta mwikomo bazogirirwa, nta kabi kabo.

³¹Mugabo abazorengera ku bitari ivyo, bazoba barenze imbibe z’ibirekuwe, bavogereye imbibe z’ibibujijwe;

³²N’abacungera imbitso baragijwe n’Imana Allah n’izo babikijwe n’abantu, bagashitsa n’amasezerano biyemeje;

³³N’ababa ivyabona vy’ukuri mu kutanyegeza canke guhindura ukuri bazi;

³⁴N’abasenga amasengesho yabo bakayatunganya nk’uko bisabwa.

³⁵Abo barangwa n’izo ngeso nziza rero, bazoterwa iteka mu Bwami bw’ijuru bwuzuye inema.

³⁶Mbega, ni igiki gituma abagararije Imana Allah bahurumbira kuza bagukanuriye amaso!

³⁷Bagukikije iburyo n’ibubamfu bwawe, bari mu migwimigwi, batangazwa n’ubutumwa ubashikiriza!

³⁸Mbega umwe wese muri bo, yipfuza kwinjizwa mu Bwami bw’ijuru bwuzuye inema; nk’abislamu bicisha bugufi!

³⁹Nibateshwe bate, barahumba! Si nk’uko bavyipfuza, ntibazopfa babwinjiye. Mu vy’ukuri Twebwe Allah, Twabaremye mu mazi y’intanga bazi.

⁴⁰Jewe Allah, Ndarahiye kw’izina ryanje, Jewe Imana Muremyi Yaremye ubuseruko n’uburengero vy'izuba, vy'ukwezi n'ivy'izindi nyenyeri[3], ko Twebwe Allah Dushoboye vyose!

⁴¹Turashoboye kubahindura mu kubasubiriza hakaza ibindi biremwa nkabo, vyubaha Imana Allah kubarusha, kandi ntitwonanirwa n’ivyo!

⁴²Kubera ivyo rero, bareke gutyo babandanye guhakana no gufyinata, kugeza aho bazokwibonera ubwabo uwo musi wabo w'izuka basezeraniwe ko bazohanwa;

⁴³Umusi bazutse bava mu kuzimu banyaragasa, nk’aho boba basiganwa gushika ku bigirwamana bahora basenga kw’isi, bishinze imbere yabo;

⁴⁴Amaso yabo, azoba araba hasi ku guteterwa, bagayitse. Uwo rero, ni wa musi bari barasezeraniwe bakiri kw’isi ko uzobashikira, bakawuhakana.