Al-Jinn

الجن

The Jinn • 28 ayahs • Meccan

بِسْمِ ٱللَّهِ ٱلرَّحْمَٰنِ ٱلرَّحِيمِ

قُلۡ أُوحِيَ إِلَيَّ أَنَّهُ ٱسۡتَمَعَ نَفَرٞ مِّنَ ٱلۡجِنِّ فَقَالُوٓاْ إِنَّا سَمِعۡنَا قُرۡءَانًا عَجَبٗا﴿١﴾

1Edtalu ka (Muhammad) sa kanilan: aden nakikineg kanu kapembatya kanu jin a pidtalu nilan kanu manga tagapeda nilan i nakineg nami i Qur’an a makagayp.

يَهۡدِيٓ إِلَى ٱلرُّشۡدِ فَـَٔامَنَّا بِهِۦۖ وَلَن نُّشۡرِكَ بِرَبِّنَآ أَحَدٗا﴿٢﴾

2Ka pedtutulu kanu makagkapya na pinangimbenal nami endu di kami den a bnal sumakutu sa Kadenan apya maka-isa.

وَأَنَّهُۥ تَعَٰلَىٰ جَدُّ رَبِّنَا مَا ٱتَّخَذَ صَٰحِبَةٗ وَلَا وَلَدٗا﴿٣﴾

3Endu mahasuti a masla su Kadenan tanu da pamaluy sa kaluma endu wata nin.

وَأَنَّهُۥ كَانَ يَقُولُ سَفِيهُنَا عَلَى ٱللَّهِ شَطَطٗا﴿٤﴾

4Endu ya pidtalu nu (Iblis/Shaytan) kanu Allah na subra a kalbutan.

وَأَنَّا ظَنَنَّآ أَن لَّن تَقُولَ ٱلۡإِنسُ وَٱلۡجِنُّ عَلَى ٱللَّهِ كَذِبٗا﴿٥﴾

5Endu saben-sabenal a sekami na ga-antap nami i di madtalu na manusya endu jin i kalbutan sa Allah.

وَأَنَّهُۥ كَانَ رِجَالٞ مِّنَ ٱلۡإِنسِ يَعُوذُونَ بِرِجَالٖ مِّنَ ٱلۡجِنِّ فَزَادُوهُمۡ رَهَقٗا﴿٦﴾

6Endu aden mama na manusya a ya nilan lindungan sa ginawa nilan na mama a jin, na kawmanan bun silan na kadarwakan.

وَأَنَّهُمۡ ظَنُّواْ كَمَا ظَنَنتُمۡ أَن لَّن يَبۡعَثَ ٱللَّهُ أَحَدٗا﴿٧﴾

7Endu silan na antapan nilan na magidsan bun kanu antapan nu sa di den mapambwat su Allah sa apya maka-isa bu (sugun a manusya atawaka jin).

وَأَنَّا لَمَسۡنَا ٱلسَّمَآءَ فَوَجَدۡنَٰهَا مُلِئَتۡ حَرَسٗا شَدِيدٗا وَشُهُبٗا﴿٨﴾

8(Pidtalu nu manga jin): saben-sabenal a kinembil nami su langit na nawma nami i napenu na pembantay a mapasang endu bitun a pegkaleg.

وَأَنَّا كُنَّا نَقۡعُدُ مِنۡهَا مَقَٰعِدَ لِلسَّمۡعِۖ فَمَن يَسۡتَمِعِ ٱلۡأٓنَ يَجِدۡ لَهُۥ شِهَابٗا رَّصَدٗا﴿٩﴾

9Endu sekami paganay na bamagagayan kami sa bakikineg lu sa pulu, entayn i makakineg saguna na nya nin mawma na apuy a pinagadil.

وَأَنَّا لَا نَدۡرِيٓ أَشَرٌّ أُرِيدَ بِمَن فِي ٱلۡأَرۡضِ أَمۡ أَرَادَ بِهِمۡ رَبُّهُمۡ رَشَدٗا﴿١٠﴾

10Endu saben-sabenal a di nami katawan upama mawag i kaghanda sa taw sya sa lupa, atawaka ya kahanda nu Allah sa kanilan na mapya.

وَأَنَّا مِنَّا ٱلصَّٰلِحُونَ وَمِنَّا دُونَ ذَٰلِكَۖ كُنَّا طَرَآئِقَ قِدَدٗا﴿١١﴾

11Endu saben-sabenal a aden sa lekitanu i manga mapya na aden bun di kena mapya sa lekitanu na embida-bida tanu (supak/matidtu).

وَأَنَّا ظَنَنَّآ أَن لَّن نُّعۡجِزَ ٱللَّهَ فِي ٱلۡأَرۡضِ وَلَن نُّعۡجِزَهُۥ هَرَبٗا﴿١٢﴾

12Endu natagu sa ginawa nami i di tanu malepas kanu kahanda nu Allah sya kanu dalpa endu di tanu kapalaguyan.

وَأَنَّا لَمَّا سَمِعۡنَا ٱلۡهُدَىٰٓ ءَامَنَّا بِهِۦۖ فَمَن يُؤۡمِنۢ بِرَبِّهِۦ فَلَا يَخَافُ بَخۡسٗا وَلَا رَهَقٗا﴿١٣﴾

13Endu saben-sabenal a guna nami makineg su tutulu na pinangimbenal nami, sa entayn i mangimbenal kanu Kadenan nin na di magilek sa kakulangan su mapya nin atawaka kawmanan su kawag nin.

وَأَنَّا مِنَّا ٱلۡمُسۡلِمُونَ وَمِنَّا ٱلۡقَٰسِطُونَۖ فَمَنۡ أَسۡلَمَ فَأُوْلَٰٓئِكَ تَحَرَّوۡاْ رَشَدٗا﴿١٤﴾

14Endu saben-sabenal a aden sa lekitanu i Muslim endu aden bun i pendarwaka, entayn i sumangkup na silan i migkahanda sa kambantangan.

وَأَمَّا ٱلۡقَٰسِطُونَ فَكَانُواْ لِجَهَنَّمَ حَطَبٗا﴿١٥﴾

15Endu su manga dupang na silan i belalag kanu naraka.

وَأَلَّوِ ٱسۡتَقَٰمُواْ عَلَى ٱلطَّرِيقَةِ لَأَسۡقَيۡنَٰهُم مَّآءً غَدَقٗا﴿١٦﴾

16Umana bu ka midtinidtwan silan kanu lalan (Islam) na bubwan nami silan sa rizki a maleges-

لِّنَفۡتِنَهُمۡ فِيهِۚ وَمَن يُعۡرِضۡ عَن ذِكۡرِ رَبِّهِۦ يَسۡلُكۡهُ عَذَابٗا صَعَدٗا﴿١٧﴾

17Ka batalun nami silan kanu rizki, na su taw a di nin tademan su Kadenan nin na paludepen nami kanu siksa a mapasang.

وَأَنَّ ٱلۡمَسَٰجِدَ لِلَّهِ فَلَا تَدۡعُواْ مَعَ ٱللَّهِ أَحَدٗا﴿١٨﴾

18Endu saben-sabenal su masgit na kanu Allah na da kanu sumakutu sa Allah sa apya maka-isa.

وَأَنَّهُۥ لَمَّا قَامَ عَبۡدُ ٱللَّهِ يَدۡعُوهُ كَادُواْ يَكُونُونَ عَلَيۡهِ لِبَدٗا﴿١٩﴾

19Endu saben-sabenal a guna pedtindeg su ulipen nu Allah (Muhammad) sa kapedsambayang nin na (silan a manga jin) na pamakadtatambaka sa kabpakikineg (kanu batyan nu rasul).

قُلۡ إِنَّمَآ أَدۡعُواْ رَبِّي وَلَآ أُشۡرِكُ بِهِۦٓ أَحَدٗا﴿٢٠﴾

20Edtalu ka (Muhammad): ya ku bu simban su Kadenan ku, endu di ku sakutun sekanin sa apya maka-isa bu.

قُلۡ إِنِّي لَآ أَمۡلِكُ لَكُمۡ ضَرّٗا وَلَا رَشَدٗا﴿٢١﴾

21Edtalu ka i saben-sabenal na saki na di ku kagkaydan sekanu endu di ku makapagkapya sekanu.

قُلۡ إِنِّي لَن يُجِيرَنِي مِنَ ٱللَّهِ أَحَدٞ وَلَنۡ أَجِدَ مِن دُونِهِۦ مُلۡتَحَدًا﴿٢٢﴾

22Edtalu ka i saben-sabenal a saki na da makalepas lun a salakaw sa Allah endu da salakaw sa lekanin a kalumpingan (kabpawangan) ku.

إِلَّا بَلَٰغٗا مِّنَ ٱللَّهِ وَرِسَٰلَٰتِهِۦۚ وَمَن يَعۡصِ ٱللَّهَ وَرَسُولَهُۥ فَإِنَّ لَهُۥ نَارَ جَهَنَّمَ خَٰلِدِينَ فِيهَآ أَبَدًا﴿٢٣﴾

23Ka saki na papedsampay ku bu (su haqq) ebpun sa Allah endu su manga hukuman nin, su taw a supaken nin su sinugu na lekanin su naraka sa di den makalyu.

حَتَّىٰٓ إِذَا رَأَوۡاْ مَا يُوعَدُونَ فَسَيَعۡلَمُونَ مَنۡ أَضۡعَفُ نَاصِرٗا وَأَقَلُّ عَدَدٗا﴿٢٤﴾

24Taman sa amayka mailay nilan su siksa nilan na katawan nilan den u entayn i malubay i tabang nin endu paydu i bilangan nin (i mapya nin).

قُلۡ إِنۡ أَدۡرِيٓ أَقَرِيبٞ مَّا تُوعَدُونَ أَمۡ يَجۡعَلُ لَهُۥ رَبِّيٓ أَمَدًا﴿٢٥﴾

25Edtalu ka (Muhammad): di ku katawan u masupeg su siksa sa lekanu amayka di kanu mangimbenal, atawaka aden bun binaluy nin a kawma nin.

عَٰلِمُ ٱلۡغَيۡبِ فَلَا يُظۡهِرُ عَلَىٰ غَيۡبِهِۦٓ أَحَدًا﴿٢٦﴾

26Sekanin (Allah) i mataw sa gayb, da mataw kanu gayb nin apya sakataw,

إِلَّا مَنِ ٱرۡتَضَىٰ مِن رَّسُولٖ فَإِنَّهُۥ يَسۡلُكُ مِنۢ بَيۡنِ يَدَيۡهِ وَمِنۡ خَلۡفِهِۦ رَصَدٗا﴿٢٧﴾

27Ya tabya na su nasuwatan nu Allah a sinugu nin a pailayn nin sa mu’jizat saleta na pembantayan nu malaikat i kasangulan-taligkudan nilan.

لِّيَعۡلَمَ أَن قَدۡ أَبۡلَغُواْ رِسَٰلَٰتِ رَبِّهِمۡ وَأَحَاطَ بِمَا لَدَيۡهِمۡ وَأَحۡصَىٰ كُلَّ شَيۡءٍ عَدَدَۢا﴿٢٨﴾

28Ka endu nilan katawan i saben-sabenal su pinasampay nilan kanu manga ayatan nu Kadenan nilan, endu langkap kanu hadapan nilan endu su langun nu engagga-isa.

← NuhAl-Muzzammil→

RELATED SURAHS

41

Fussilat

Explained in Detail

6

Al-An'am

The Cattle

15

Al-Hijr

The Rocky Tract

1

Al-Fatiha

The Opening

Browse all 114 surahs