Sad

¹Saad (su Allah i mataw kanu ma’na nin), Saki (Allah) idsapa ku su Qur’an sa napayag lun i langun taman.

²Ugayd na su manga kafir na natagu kanu kabpapulu bu endu kapagukag (kanu manga nabi).

³Madakel den i bininasa nami a nawna pan sa kanilan a manga taw sa nakapanawag silan kanu kinawma na tyuba sa kanilan sa dala den waktu a kapalaguy.

⁴Endu nagayp silan sa nakawma sa kanilan i sinugu a bansa nilan bun, endu pidtalu nu manga kafir: pasi-sih’r a kalbutan.

⁵Ngintu ka pembaluyn nin su manga kadenan sa isa bu ka su Allah bu, na saben-sabenal sa galebek ni (Muhammad) na isa kanu di matalima.

⁶Endu ginumanat su kadakel nilan sa pidtalu nilan: lu kanu den endu edsabar kanu sa kanu mga kadenan nu, ka pidtalu nu (Muhammad) na isa kanu di matalima.

⁷Ka da tanu makineg inan kanu kaped a agama, na dala bun inan ya tabya na kadalbutan bu.

⁸Ngintu nakatulun i Qur’an sa lekanin na di kena sekanin i masla a taw? Pulingan bu i penduwa-duwa silan kagina dala nilan pan kananami su siksa ku (Allah) sa kanilan.

⁹Atawaka ngintu lu kanilan su gunsi nu limu nu Kadenan nengka a sekanin (Allah) i mapulu a bangenyan?

¹⁰Atawaka kanilan a gamilikan su manga langit endu su lupa endu su pageletan nin? Na mamusug silan sa panikan (u benal i pedtalun ilan).

¹¹Sundalu a malubay, na makandedsa kanu lumpukan nilan.

¹²Napandalbut bun su nawna sa kanilan su taw nu Nuh endu su Aad endu su Fir’awn na aden buladtek nin (kayu a ipambadas).

¹³Endu su Thamud, endu su taw nu Lut endu su manga tagapeda nu Aikah (manga taw sa Madyan), silan na midtatagapeda.

¹⁴Da kanu uman isa a di kena napandalbut sa sinugu, na wagib su siksa (sa kanilan).

¹⁵Endu da kapagangapan nilan a salakaw kanu kayup a makaisa kanu kabangkit sa dunya sa dala kadsunudan nun.

¹⁶Endu pidtalu nilan: Kadenan nami i sya nengka den sa lekami su kitab a sinulatan sa galebek nami sa di pan gawma i gay a mawli.

¹⁷Edsabar ka (Muhammad) kanu kadtalu nilan, ya ka tademi su ulipen nami a si Daud ka sekanin na mabagel i simba nin, ka ya nin bu galebek na kasuwatan nu Allah.

¹⁸Saben-sabenal a pinandayan nami sa lekanin su manga palaw, a bagamung pedtasbih sa lekanin sa magabi-malamag.

¹⁹Endu su papanuk a pembuligbulig sa bagamung (kanu Daud) uman isa na bangeni sa kasuwatan (nu Allah).

²⁰Endu binagel nami su kadatu nin endu inenggan nami sekanin sa ka-nabi endu kapya na kadatu.

²¹Endu nakawma sa leka (Muhammad) su tudtulan kanu duwa kataw a di bagayun sa linudepan nilan (Daud) kanu pedsambayangan nin sa makagayp.

²²Kinaludep nilan kanu Daud na natekawan sa kanilan, ya nilan pidtalu: da ka kagilek ka di kami bagayun, pendupangan na isa su kaped nin, na kukum kami sa bantang endu da ka lumamig, endu tutulu kami sa bantang a lalan.

²³Saben-sabenal a nan i suled ku anan na aden unta nin a syaw-pulu endu syaw, na aden laki a sawalu, (pidtalu nin): ipatuganul nengka salaki i leka anan, na dala aku makagaga sa kadtalu, nakwa nin su laki a sawalu bu.

²⁴Tig nu Daud: saben-sabenal a dinupang ka na kaped nengka anan sa kinwa nin su leka a sawalu ka namba i kadakelan sa pedtumpuk na dupangen nin su ped nin, ya tabya su manga bamaginugut endu minggalebek sa manga mapya, na paydu bu i maytu ba (tinidtwanan), endu natawan nu Daud i binatalu sekanin, na nangeni sa ampun sa Allah endu linundangan nin i karuku-kasugyud endu midtawbat.

²⁵Na inampun nami sa lekanin, endu makasupag pan sa lekami endu mapya pan kawliyan nin.

²⁶Hay seka Daud! Binaluy nami seka a khalifa (datu) sya sa lupa na kukum ka su manga taw sa bantang, endu di ka baginugunuti i nafsu-hawa nengka, ka tadingen ka nin sa lalan sa Allah, ka su manga taw a gatading kanu agama nu Allah na kanilan i siksa a mapasang, kagina nalimpangan nilan i gay a mawli.

²⁷Endu di kena nami binaluy su manga langit endu su lupa endu su pageletan nin sa batil, entuba i antapan nu manga kafir, na su bawgan sa naraka na kanu kafir a pegkalaw-kalaw.

²⁸Atawaka binaluy nami su manga bamaginugut a minggalebek sa manga mapya sa mana su manga taw a pakabinasa kanu dalpa, atawaka baluyan nami su manga taw a magilek sa Allah sa mana su manga darwaka.

²⁹Kitab a initulun nami sa lekanin (Muhammad) a barakat ka endu nilan mapanuliman su manga ayat nin, endu ma-indaw su manga taw a aden akal nin.

³⁰Endu inenggay nami kani Daud si Sulayman a ngin den a kapya na ulipen ka mategel a benal semangul sa Kadenan nin.

³¹Su kutika na ini-adu sa lekanin sa ulyan na dhuhur i manga kuda a manga mapya gayd a pegkudan.

³²Pidtalu ni (Sulayman): namba i kalinyan ku sabap sa jihad sa Allah, taman sa dala makadsambayang sa asar taman sa sinumedep su senang.

³³(Tig nu Sulayman): imbalingan nu sa laki su kuda, ka tinebpedan su lisen endu lig (na kuda, sabap sa nasimpang sa simba sa Allah).

³⁴Endu saben-sabenal a binatalu nami su Sulayman sa aden initapes nami kanu bagagayananin a lawas (a shaytan), mawli na midtawbat (su Sulayman).

³⁵Pidtalu nin (Sulayman): Kadenan ku ampun ka sa laki endu enggi aku sa kadatu a di dayt u mawli sa laki, ka seka (Allah) i Kadenan a bangenggay.

³⁶Na pinandayan nami sa lekanin su sambel a balalaguy sa kyug nin, sa mananaw sa apya endaw i kyug nin.

³⁷Endu su manga shaytan i pembalay endu su kaped na pedseneb sa lagat.

³⁸Endu su kaped na pinamawik sya sa lantay-lantay.

³⁹(Pidtalu nu Allah kanu Sulayman): namba i inenggay nami na enggay ka su pegkyugan nengka atawaka di ka menggay na di bun idsa sa leka.

⁴⁰Endu aden lekanin sya sa lekami a kapyanan a kawliyan nin.

⁴¹Endu labit ka (Muhammad) su ulipen nami si Ayub, a tinawag nin su kadenan nin: saki na nasugat aku na shaytan sa makagkayd endu siksa.

⁴²(Pidtalu nu Allah sa lekanin): ibagkuway nengka su ay nengka, ka nan i pebpaygwan a matenggaw endu baginemen.

⁴³Endu inenggay nami su kaluma nin endu su manga wata nin a limu ebpun sa lekami, endu indawan kanu aden akal nin.

⁴⁴Endu kwa ka su sakumpungan (salumpuk) ka ibetay nengka kanu kaluma nengka, endu di ka kasapalan kagina masabar (Ayub), ngin den i kapya nin a ulipen, ka sekanin na di gapinda sa kalumping nin sa Kadenan nin.

⁴⁵Endu labit ka su ulipen nami a su Ibrahim endu su Ishaq endu su Ya’kub a mabagel i simba nilan endu matindu i kailay nilan.

⁴⁶Sekami na pinapa-ikhlas nami silan sa tadem sa gay a mawli.

⁴⁷Endu silan na kuyug silan kanu manga pinamili a manga mapya.

⁴⁸Endu labit ka su Ismail endu su Alyasa endu su Zul-kif’l, endu uman isa sa kanilan na ebpun sa mapya.

⁴⁹Namba i tademan a mapya, endu saben-sabenal su magilek sa Allah na mapya i kadsunudan (kambalinganan) nin.

⁵⁰Surga a tatap, binukan sa kanilan i manga pintuwan nin.

⁵¹Pedsandeng silan, endu apya ngin i kyugan nilan a manga unga na kayu na madakel endu baginemen na aden sa kanilan.

⁵²Endu aden pan manga kaluma nilan a manga laga, a kaluma nin bu i kyugan nin.

⁵³Namba su pedsinganin nu sya sa gay a mawli.

⁵⁴Saben-sabenal a namba rizki nami na dala kadtamanan nin.

⁵⁵Namba i kanu bamaginugut, endu saben-sabenal su manga darwaka na kanilan i sangat i kawag nin a kadtamanan.

⁵⁶Su naraka jahannam i kaludepan nilan, na ngin den i kawag nin a kadtakenan.

⁵⁷Namba i kanilan, na nanami nu pan i mayaw endu manga dana a madu gayd.

⁵⁸Endu aden pan kaped a siksa a mimbyas-byas.

⁵⁹Nanden su tumpuk a kaped nu beludep (tig nu kaunutan nilan) dala kapya nu manga taw a minunut sa lekami, makaludep tanan sa naraka.

⁶⁰Madtalu nu namangunut: sekanu i dala kapya nin, ka sekanu ba i namegkafir sa lekami, na ngin den i kawag nin i kambetadan tanu.

⁶¹Ya nilan madtalu: kadenan nami takep ka su siksa kanu nadsabapan a kinaludep nami sa naraka.

⁶²Endu madtalu nilan: nginya ka di nami mailay su manga mama a inibilang nami sa mawag a manga taw (entu ba su manga bamaginugut).

⁶³Bagungaten nami bu lu sa dunya, ngintu naawa sa kanilan su kailay ka dili nilan gailay.

⁶⁴Saben-sabenal na namba na di ebplis na manggula i kapamagukag nu manga taw sa naraka.

⁶⁵Edtalu ka (Muhammad) sa kanilan: saki na papegkagilekan ku sekanu (sa naraka) endu da kadenan a wagib a simban ya tabya su Allah a pakapegas.

⁶⁶A Kadenan nu manga langit endu lupa endu su pageletan nin a mapulu a bangampun.

⁶⁷Edtalu ka sa kanilan (su Qur’an) na masla a bandingan (tudtulan).

⁶⁸Na sekanu na pembalawagan nu su Qur’an.

⁶⁹Na da sa laki i kasabutan ku i kapebpalawa nilan (malaikat).

⁷⁰Da ipewahi sa laki ya tabya na saben-sabenal a saki na manginggilek aku sa mapayag.

⁷¹(Labit ka) su kutika a kinadtalu nu Kadenan nengka kanu manga malaikat sa saben-sabenal a saki (Allah) na bamaluy aku sa manusya ebpun sa lupa.

⁷²Na amayka napasad ku endu na yupan ku den sa nyawa na embaba kanu sa lekanin a sugyud.

⁷³Na sinumugyud su malaikat sa langun nilan.

⁷⁴Ya tabya na su Iblis ka mimamasela, na nakuyug kanu manga kafir.

⁷⁵Tig nu Allah: Iblis ngin i nakasapal sa leka sa kasugyud kanu binaluy ku kanu lima ku, mimamasela ka atawaka mibpapulu ka.

⁷⁶Pidtalu nu Iblis: saki pan i mapya sa lekanin, ka ya ku asal na apuy, si Adam na binaluy sa lupa.

⁷⁷Tig nu Allah: liyu ka sa surga ka seka na perajamen ka.

⁷⁸Endu saben-sabenal a nanget sa leka su mulka ku taman sa gay a mawli.

⁷⁹Pidtalu nu Iblis: Kadenan ku pakalendu ka i umur ku taman sa kagubal sa dunya.

⁸⁰Tig nu Allah: kuyug ka kanu malendu i umur nin.

⁸¹Taman bu kanu waktu a mapayag.

⁸²Pidtalu nu Iblis: sabap kanu kapulu nengka na tadingen ku silan tanan.

⁸³Ya tabiya na su ulipen nengka a manga ikhlas.

⁸⁴Tig nu Allah: su bantang na edtalun ku su bantang.

⁸⁵Penun ku su naraka jahannam sa leka endu su langun nu minunut sa leka sa langun nilan.

⁸⁶Edtalu ka (Muhammad) sa kanilan: di kena aku pegkwa sa lekanu sa sukay, endu di kena aku penggedteb sa laki bu a kadtalu.

⁸⁷Saben-sabenal a dala kanu Qur’an ya tabya na indawan kanu taw nu dunya.

⁸⁸Endu di ebplis na katawan nu bu su kabenal nu tudtulan sa di mawget.