Al-Qiyamah

¹Мен Кыямат күнүнө ант ичип,

²Жемелөөчү напси[1] менен ант ичип, (айтамын:)

³“Инсан (өзүнчө), Биз анын сөөктөрүн (Кыямат күндө кайра тирилтүү үчүн) эч качан чогулта албайбыз деп ойлойбу?!”

⁴Жок! Биз анын бармактарын да өз ордуна (далма-дал) келтирүүгө кудуреттүүбүз![1]

⁵Балким (шекчил) инсан өзүнүн келечегин(деги кайра тирилүүнү) жалганга чыгаргысы келээр...,

⁶(Жана шектенүү менен) «Кыямат күнү качан?» деп сураар!

⁷Качан (Кыяматтын убактысы келгенде) көз(дөр коркуудан) чекчейип калат.

⁸Айдын нуру өчөт

⁹жана Күн менен Ай бириктирилет.[1]

¹⁰Ошол күнү инсан «кайда качсам экен!» деп калат!

¹¹Жок! Качып бара турган орун жок!

¹²Ал күнү (ар бир адам жеке Өзүнө сурак берүү үчүн) Раббиңе гана кайтуу бар.

¹³Ал күнү (ар бир) инсанга мурдагы жана кийинки жасаган (жакшы-жаман) иштери жөнүндө кабар берилет.

¹⁴Ал гана эмес, инсан(дын көз, кулак, кол, жана буту) өзүнүн зыянына күбөгө өтөт.[1]

¹⁵Жана эгерде шылтоо-себептерин айтса да (кабыл алынбайт).[1]

¹⁶(Оо , Мухаммад, сага Жебирейил периште окуп берген аяттарды жаттоого) шашылып тилиңди кыймылдата бербе![1]

¹⁷Аны (сенин жүрөгүңө) чогултуу да, окулушу(н тилиңе бекем орноштуруу) да Биздин милдет.

¹⁸Эми, качан Биз(дин элчибиз Жебирейил) аны окуп бүткөндө анын кыраатына (жайбаракат) ээрчигин.

¹⁹Андан соң аны (маани-маңызы сакталган бойдон) түшүндүрүп берүү дагы Биздин милдет.

²⁰Жок, (эй, күнөөкөр адамдар!) силер өткөөл дүйнөнү сүйөсүңөр.

²¹жана (түбөлүк) Акыретти таштап койосуңар.[1]

²²Ал күнү (ыймандуу) жүздөр нурданып,

²³Раббисине (үмүт менен) карап турат.

²⁴Ал эми, (ыймансыз) жүздөр ал күндө капаланып,

²⁵өздөрүнө запкылуу азап берилишин билип калат.

²⁶Акыйкатта, (пенделердин жаны) алкымына капталганда...,

²⁷«Ким дем салып койоор экен?!» деп (кабатыр сөздөр) айтылганда...,

²⁸(Күнөөкөр пенде «Дүйнөдөн) ажыроо дегени ушул турбайбы» деп ойлоп калганда...,

²⁹Жана балтыр балтырга жабышып, тыбырчылаганда...,

³⁰Дал ошол күндө Раббиңдин алдына айдап келүү болоор![1]

³¹Ал эми (каапыр болсо, пайгамбарды да) тастыктабады, намаз да окубады.

³²Бирок, «жалган» деп далысын салып койду.

³³Андан соң текеберленип (каңгыраган, бош жүрөк менен) үй-бүлөсүнө кетти.

³⁴Өлүм болсун сага өлүм!

³⁵Андан соң (дагы) сага өлүм болсун, өлүм!

³⁶(Күнөөкөр) инсан өзүн (дүйнөдө) бей-максат таштап коюлган деп ойлойбу?![1]

³⁷Ал (түпкүлүгүндө) атырылган бел суунун бир тамчысы эмес беле?!

³⁸Анан коюу кан болду. Анан (Аллах) аны кадыресе адам шекилине келтирди (жана жан киргизди)

³⁹Анан аны (түйүлдүктү) эки жуп: эркек менен аял кылып жаратты.

⁴⁰Эми, ушул (Аллах) өлүктөрдү (экинчи ирет) тирилтүүгө кудуреттүү эмеспи?!