Qaf

¹Qaaf.[1] Mi wooɗndirii Alqur'aanaare teddunde ndeen!

²Si ko woni, ɓe ŋalɗu ko tawi kon jeertinoowo arii ɓe iwɗo e maɓɓe ; he'eferɓe ɓen mbi'i: "Ɗuum ɗoo ko hu'unde haawniinde.

³Kere si min maayii, min ngoontii mbulmbuldi...? Ɗuum ɗon ko duttitagol goɗɗungol noon !"

⁴Gooŋɗii miɗen nganndi ko leydi ndin ñaamata kon e maɓɓe ; hino ka Amen gaa deftere reennde.

⁵Si ko woni, ɓe njeddu goonga kan tuma nde ka arnoo e maɓɓe, hiɓe e ndeer fiyaaku jilɓuɗo.

⁶E ɓee ndaaraani kammu ngun dow maɓɓe, ko honno Min mahiri ngun Min cuɗini ngu ; hara perɗi alanaa ngu?

⁷Leydi ndin kadi, Min mbeerti ndi Min mberlii e mayri pelle, Min puɗini e mayri kala nooneeji [puɗi] gooɗuɗi.

⁸fii tasakuyee e waaju wonan'de kala jiyaaɗo duttotooɗo.

⁹Min njippini kadi ndiyam mbarkinaaɗam ummaade ka kammu, Min puɗiniri ɗam gese e gabbe coñeteeɗe.

¹⁰e leɗɗe tamaro juutɗe gon'dude e piindi fawondirndi,

¹¹ko arsike jeyaaɓe ɓen. Min nguurnitiri ɗam kadi leydi yoorundi. Awa ko noon woni fii ummital ngal.

¹²Ado maɓɓe, yimɓe nuuhu ɓen, e yimɓe Ɓunndu ɓeen e Samuuda'en [fof] f Njedduno,

¹³e 'Aadi'en, e Fir'awna e musiɗɓe Luutu ɓeen.

¹⁴e yimɓe fitaare nden, e yimɓe Tubba' ɓeen. Kala maɓɓe jedɗuno Nulaaɓe ɓeen, kammbaa am on jojji.

¹⁵Kere Min ndoŋkuno fii tagoore ado nde? Ko woni kamɓe, hiɓe e jiɓaare fii tagiteede laawol kesol.

¹⁶Gooŋɗii Min tagii neɗɗaŋke on, Meɗen nganndi ko woŋkii makko kin sowinsinirta mo. Ko Minen ɓuri ɓadaade mo e dii ɗaɗol (makko) daande ngol.

¹⁷tuma nde jaɓɓoytooɓe ɓeen ɗiɗo jaɓɓoroytoo [golle makko ɗeen] ñaamo e nano, hara hiɓe njooɗii.

¹⁸O wowlataa konngol, si wonaa hino takko makko binndoowo tawaaɗo.

¹⁹Ɗeɗɗere maayde nden ardi e goonga : "Ko ɗuum wonnnoo ko ndogaynoɗaa".

²⁰Wuttee ka alaandu ; ko nden woni Ñalaande kammbaa ndeen.

²¹Woŋkii kala ara, hara hiki won'di e coggoowo e ceedotooɗo.

²²"Gooŋɗii a laatinoke belsindiiɗo e ndee. Min kunci wirngallo maa ngon kisan; gite maa ɗeen hannde ko ceeɓɗe".

²³Gonndiijo makko on wi'a: "Ko ɗuum ɗoo woni ka am ɗoo, maandinaa-ɗum".

²⁴Bugee ka Jahannama onon ɗiɗo, kala jedduɗo canndallo.

²⁵Kaɗoowo moƴƴere, jaggitoowo, cikkitiiɗo,

²⁶on baɗiduɗo e Allah deweteeɗo goo. Bugee mo ka ndeer lepte caɗtuɗe".

²⁷Cinndadiijo makko (seytaane) on wi'i: "Joomi amen, mi bewinaali oo; si ko woni, ko e majjere woɗɗunde o wonnoo e mum".

²⁸[Allah] daala : "Wota on njeddondir ka Am ɗoo ! Nde tawnoo Mi ardiniino e mon kammbaa.

²⁹Konngol waɗtitetaake ka am ɗoo ; Mi siforaa kadi tooñoowo jiyaaɓe ɓen".

³⁰Ñande Min mbi'anoyta Jahannama o : "E a heewii?" Nge wi'a: "Ko ɓeydee hino woodi?"

³¹Aljanna on ɓaɗtinanee gooŋɗuɓe ɓen, hara wonaa ka woɗɗi.

³²"Ko ɗum ɗoo woni ko podaɗon, wonan'de kala duttiiɗo [e Joomi mun] deeniiɗo.

³³oon kuluɗo Joom Hinaranke oon ka wirnii, o ardi e ɓernde laaɓunde.

³⁴Naatiree mo e jam". Ko nden woni ñalaande luttaynde ndeen.

³⁵Hino woodani ɓe toon kala ko ɓe faaletee, hara kadi ɓeydaari hino ka Amen.

³⁶Ɗuuɗii e gire ɗen Min kalki ado maɓɓe, ko ɓeen ɓurnooɓe doole, ɓeen mbanngorii e leydi ndiin, ndaarugol taw si ɓe keɓay laaworde.

³⁷Pellet, woni e ɗuum, waajo wonan'de kala jom ɓernde, maa tuɗuɗo noppi hara ko tawaaɗo.

³⁸Gooŋɗii Min tagii kammuuji ɗiin e leydi ndin e kon ko woni hakkunde majji, ndeer balɗe jeegoo, tampere woo heɓaani Min.

³⁹Muñño e ko ɓe kaalata kon, subbunhinanoɗaa Joomi maa ado puɗal na'ange ngen e ado mutal ngal.

⁴⁰Jemma on kadi, subbunhinanoɗaa mo e ka battane [juluɗe] farlaaɗe.

⁴¹Heɗo, ñande noddoowo o noddoyta e nokkuure ɓattiinde,

⁴²ñande ɓe naniroyta ha'acaango ngon e hoore goonga. Ko ndeen woni Ñande yaltugol ngol [ka genaale].

⁴³Pellet, ko Monen nguurnata Min mbara, ko ka amen kadi woni ruttorde nde.

⁴⁴Ñalnde leydi ndiin seekotoo [ɓe njaltira] keñagol; ko nde woni mooɓirde newaniinde Min.

⁴⁵Ko Minen ɓuri anndude ko ɓe kaalata kon. A wonaa dooloowoɓe. Haray waajor Alqur'aanaare nden, kala kuloowo kammbaa an on.