Al-Qiyamah

¹Ako (Dios) nanumpa sa Adlaw sa Pagkabanhaw (ug Paghukom).

²Ug nanumpa ako pinaagi sa nagbadlong ug nagbasol sa kaugalingon nga kalag 'sa magtotoo' (nga ikaw siguradong mahimong mabanhaw).

³Naghunahuna ba tawo nga Kami dili magtapok iyang mga ka-bukogan 'sa pagbanhaw kaniya alang Paghukom'?

⁴Apan oo, Kami makahimo sa pagpasig-uli (bisan pa) sa tumoy sa iyang mga tudlo (sa hingpit nga pagkahan-ay).

⁵Apan ang tawo nagtinguha nga magpadayon sa pagpakasala (ug pagpanghimakak sa unsay anaa sa iyang unahan).

⁶nga naga-pangutana ˹sa pagbiaybiay˺: "Kanus-a ang Adlaw sa Pagkabanhaw (ug Paghukom)?"

⁷Busa sa diha nga ang ang panan-aw nakugang (sa pagkakurat ug pagkahadlok),

⁸Ug ang bulan midulom,

⁹ug ang adlaw ug ang bulan gihiusa[1],

¹⁰Ang tawo moingon nianang Adlawa: "Hain (ang dalangpanan) aron sa pagkalagiw (pag-ikyas)?"

¹¹Apan dili, wala nay dapit nga dalangpanan!

¹²Anaa sa imong Ginoo (Allah) lamang nianang Adlawa ang dapit nga kapahulayan.

¹³Nianang adlawa, ang tawo paga-tug'anan sa unsay ang iyang gipadala unahan ug gibiyaan (sa kung maayo o daotan nga mga buhat).

¹⁴Hinoon, ang tawo maoy saksi batok sa iyang kaugalingon,

¹⁵Bisan pa siya maga-himog pama-libad (aron sa pagtabon sa iyang mga sayop nga buhat).

¹⁶Ayaw ilihok (O Propeta Muhammad) ang imong dila sa pagdali (pagsubli sa unsay madayag kanimo sa Qur'an sa wala pa kini makompleto).

¹⁷Sa pagkatinuod ngadto Kanamo ang paghimo kanimo sa pag-saulo ug aron sa paghatag kanimo sa katakos sa pagbasa (sa Qur'an).

¹⁸Busa sa diha nga Kami maglitok niini (pinaagi ni anghel Gabriel) nganha kanimo (Oh Muhammad), sunda ang paglitok niini.

¹⁹Ug ngadto Kanamo (sa Allah) ang (katungdanan sa) pagpatin-aw niini nganha kanimo (oh Muhammad).

²⁰Apan kamo (mga manlilimod) naghigugma ang hamubo kinabuhi,

²¹Ug pagpasagad sa Pikas Kinabuhi.

²²(Ang uban sa) mga nawong nianang Adlawa maghayag,

²³Nagtan-aw sa ilang Ginoo 'Allāh'.

²⁴Ug "uban" nga mga nawong nianang Adlawa mangitngit uban sa pagkawalay paglaum,

²⁵Sa pagkahibalo nga ang pipila ka dagkong Katalagman muabotay na ngadto kanila.

²⁶Apan sa dihang ang kalag makaabot sa kwelyo bukog 'samtang kini mobiya',

²⁷Ug iga-ingon: "Kinsa ba ang makaayo kaniya ug makaluwas kaniya gikan sa kamatayon?"

²⁸Ug siya masayod nga kini mao na ang (panahon sa) pagbiya (kamatayon).

²⁹Ug sa diha nga ang usa ka tiil idikit na ngadto sa pikas (nga mao ang pagputos aron sa paglubong);

³⁰Ngadto sa (Allah) nga imong Ginoo nianang Adlawa mao ang dapit kapadulngan.

³¹Busa siya wala gayod sa motoo o nag-ampo,

³²Apan siya misalikway (sa Kamatuoran sa Islam) ug mitalikod (gikan niini),

³³Unya miadto siya sa iyang katawhan, nga naglakaw nga mapahitas-on.

³⁴Alaut kamo, ug labaw pa nga alaut!

³⁵Pag-usab, alaut kamo, ug labi pang alaut!

³⁶Naghunahuna ba ang tawo nga siya pasagdan nga maglatagaw nga walay katuyoan (ug dili mobalik ngadto sa Allah alang sa Paghukom)?.

³⁷Dili ba siya usa lamang ka tulo sa semilya nga migawas,

³⁸Unya siya nahimo nga usa ka tibugol nga dugo, ug Siya (Allah) milalang (kaniya) ug miumol (kaniya) sa tukma nga hulma (o hulagway).

³⁹Ug gikan niana, Siya 'Allāh' mibuhat sa duha ka matang, lalaki ug babaye.

⁴⁰Dili pa kana (Allah, ang Manlalalang ), makahimo sa pagbanhaw sa mga patay[2]?